籠太子點心專門店 (Closed)

突然好想食點心，openrice見到呢間野都幾出名，所以專程過黎試下。呢到既餐牌好新奇有趣，好多野食睇完個名都唔知係咩，所以我地望住旁邊個大拇指落單。先講下呢個全場最貴既原隻鮑魚燒賣，雖然$28得兩粒，不過貨真價實，面頭的確有隻小鮑魚，味道都唔錯，幾新鮮。然後叫左籠蝦餃， 紅油抄手，蘿白糕，味道都還可以，無咩特別。甜品叫左個香芒沙律盞，呢個真係食到摸不著頭腦，因為食黎食去都食唔到芒果，只有大量既蘋果粒。流沙奶黃包正，熱辣辣既包中間蛋漿湧流。雪山叉燒包都幾得意，面頭係菠蘿包既皮，裡面係叉燒包既餡。香滑反斗糕個名好有gimmick，味道有D似馬拉糕。不是炸兩幾有驚喜，大家都估左好耐到底裡面有無炸兩，原來係腸粉皮包住一D菜同肉。最後叫左海皇芝士千絲卷，唔係好食得出有芝士味，好似食左一舊炸粉咁，麻麻地。整體黎講，呢間野味道都OK，不過要小心嗌，最好叫番D多人推介既點心，以免中伏🤣