餃掂手工餃子雲吞專門店

灣仔餃子專門店！朋友介紹呢間湯餃好好味，梗係要嚟試試佢啦！我同朋友太肚餓嘅關係，叫下叫下都冇留意價錢，結果食到百二蚊一個人，不過餃子真係好好味！香煎軟心芝士餃7隻$55- 芝士味道濃郁，用咗平時食漢堡包嘅芝士片，有陣陣鹹香味，配上粟米粒啱啱好。煎餃皮脆，不過略嫌油膩左少少。壽喜燒牛肉湯餃7隻$52- 牛肉餃食落冇乜特別，唔重牛肉味，亦冇乜壽喜燒嘅感覺，可以不試。芫茜豬肉湯餃7隻$46- 要推介湯底！飲得出冇落味精，有淡淡嘅粉葛味，唔鹹。芫茜味重，正！推介！龍鳳松茸雙煎餃8隻$86- 高度推介！喜歡松露味道嘅朋友必試！黑松露醬嘅份量驚人，香氣撲鼻，一大享受。白松露菇菌味道收斂少少，都幾香同有口感。最後我忍唔住買埋龍鳳松茸生餃子、元貝豬肉生餃、芫茜豬肉生餃子，番屋企煮嚟食。