C2 Lab

Open Now

Now Closed

睇咗YouTube 介紹去嘅。餐廳12:00開門，星期日冇得預約，我大概13:00到，等咗唔夠10分鐘就有位。其實我見差唔多13:30已經有空枱，而家食肆都真係好難做到兩三round turnover 。食咗鵝干、油封鴨髀、同一個鷄意粉午餐。油封鴨髀皮脆肉嫩做得非常好，好食過我響巴黎食（不過我響巴黎食嗰間餐廳又真係太過一般，咁樣比較唔係好公平），連個杏脯乳酪醬一齊食，唔覺得好腬。其實食完鵝干再油封鴨都唔覺得好腬，我覺得佢都幾勁。個鷄意粉加入咗一啲松籽，多一重咬口同香味，我覺得都幾有心機，整體都好好食。上菜都好快，唔使等好耐就有得食。期間我論論盡盡整跌支叉，侍應好快就幫我換返。冇諗過食完又封鴨，佢竟然有幫我換碟。服務都真係好好啦。個廁所超大，雖然唔係真係好靚，不過深水埗區小店有咁企理嘅廁所，都算好唔話得囉。