Daap

Open Now

Now Closed

係上環外表唔起眼嘅小店。門口冇餐牌有d令人猶豫。不過anyway 都鼓起勇氣入去試下。午餐唔平，由$178至$250。菜單有新意，全部都係西餐加入中式fusion 嘅概念。冰菜馬友鹹魚凱撒沙律用好少見嘅冰菜做沙律菜好有新鮮感！口感爽脆。有脆脆嘅粒粒口感。唔似一般Caesar salad 醬汁嘅creamy 口感，而係較清爽，味道偏酸。黑毛豬肚手工意粉 配 胡椒酸菜（午餐$178）齋睇餐牌呢個名，完全幻想唔到係咩味道。不過本着最鐘意新奇味道，咩新奇嘢都想試一餐嘅精神，就點咗餐牌呢個最估唔到佢係咩料嘅意粉嚟試。一路等都驚驚地會伏。但當食第一啖就好驚喜！佢係用咗酸菜胡椒肚湯嘅味道，再變成濃郁creamy 嘅質感，出奇地又同個意粉好夾。食到濃郁嘅胡椒味，同埋淡淡酸菜豬肚湯嘅味道。材料方面，啲豬肚切到好細粒。酸菜唔係特別酸，味道剛剛好。手工意粉係闊條麵，口感爽硬，有嚼勁。總括而言，價格有點偏小貴，但係個味道新奇，食得滿意。佢餐牌仲有其他新奇fusion 菜式，會再想來試下！另外午餐時間，鋪頭都好少人，都驚驚地佢會執笠。覺得店主將個餐牌放喺舖頭外邊，可能吸引多啲人入來食。希望店主有緣見到呢個意見。