WIRED CAFE (Closed)

去咗美麗華廣場二期地庫，呢層好多都係服裝店，入面仲有間用湖水藍同黃色做主題嘅WIRED CAFE。餐廳啲梳化位擺咗唔同造型嘅咕o臣，幾得意。雖然無任何遮掩，商場嘅遊人可以輕易睇到餐廳入面嘅情況，不過嗰日人流唔多，都算舒服嘅。呢度仲有自助嘅Detox Water提供，不過要惠顧某啲套餐先可以享用。我哋呢次只試咗輕食同飲品，雜莓吐司上面鋪咗唔少鮮士多啤梨、藍莓同紅桑子，同埋淋咗士多啤梨醬，賣相吸引。我原本以為只係普通嘅吐司，切開之後先發現佢哋用嘅係多層兼鬆厚嘅丹麥方包，質感就好似牛角酥同方包嘅混合體，而且焗到外層酥脆，中間就吸滿牛奶吉士之類，食起上嚟軟綿濕潤，有啲麵包布甸嘅感覺，甜味亦唔會太高。不過因為麵包太厚，所以都幾飽肚。炸洋蔥圈，拎到嚟時熱辣辣。炸皮算薄脆，入面又唔乾身，可以蘸埋兩款醬咁食，唔覺唔覺就食晒喇。Lychee Sangria，佢加咗切粒紅蘋果、青蘋果同橙，都幾清新。Blue Lychee Fruit Tea，用咗藍莓點綴，由杯嘅側面睇係帶啲紅、紫嘅漸變色，入面嘅鮮西瓜同菠蘿切得幾大粒。飲起嚟荔枝味唔太突出，但酸酸甜甜兼有淡淡茶香，感覺討好。