巨型金莎+抹茶拿破崙 Valérie
圖：tracyisapig，shell_we_eat
喺網上相當紅嘅甜品店，最吸睛嘅一定係好似放大版金莎嘅Salute to Rocher蛋糕，唔單止包裝似，切開朱古力脆皮入面有雲呢拿慕絲、朱古力醬、法國榛子醬、朱古力脆脆同真·金莎！層次分明又唔過甜。濃香宇治抹茶拿破崙名副其實，日本宇治M6頂級綠茶粉加自家制吉士滑得嚟仲有少少回甘，加上酥脆又有牛油香嘅拿破崙皮同雜莓等點綴，水準之作。
華麗實際兼備3D蛋糕 樂怡餅屋
圖：tazthemonster，Yan~*，ryu_ng
想蛋糕外形獨一無二？自己設計然後請整餅人幫手啦！估唔到粉嶺呢間街坊餅店暗藏一位人稱整餅人嘅高手，佢整嘅翻糖3D蛋糕全部都相當細緻而且栩栩如生，無論係各種卡通人物定自己設計嘅手繪圖案都保證滿意。雖然翻糖難免色素較多而且偏甜，但可以放心嘅係蛋糕底相當有保證，無論係雜果定朱古力味都甜而不膩又鬆軟。
和風精緻蛋糕 瓜破
圖：食神歸位，chloe_1123
如果朋友或者另一半鐘情日本簡約風嘅話，呢間就啱哂啦。好似清新嘅咲唔單止外形簡約，裡面嘅香梨慕絲同香梨啫喱搭配焦糖慕絲同玉桂蛋糕令蛋糕感覺特別清爽，適合送畀平時怕蛋糕太甜嘅朋友同親戚。而M其實係紅桑子加朱古力，一層層紅桑子慕絲、74%特濃朱古力忌廉、青檸慕絲同杏仁蛋糕疊起有Opera Cake效果，層次豐富酸甜醒神。
自己設計華麗蛋糕 Cake 2
圖：Lemon Tea，four_month
特別嘅日子當然要有特別嘅蛋糕，呢間做結婚蛋糕嘅糕餅店連門面都特別優雅，不過佢亦有訂造其他忌廉蛋糕或翻糖蛋糕嘅服務。例如有會員就訂咗一個勞力士錶造型嘅蛋糕，出嚟唔單止造型相當細緻認真，入面嘅咖啡蛋糕亦有咖啡香。最拿手嘅結婚蛋糕更加係非常華麗，無論係糖霜細花同蝴蝶定係忌廉玫瑰都精緻到好似藝術品咁。
媲美酒店出品 貴族蛋糕
圖：Lawrence Lau，Marshy
老字號街坊餅店，唔單止有經典壽桃3D蛋糕，亦接受訂造自己設計造型嘅2D或3D造型蛋糕，蛋糕鬆軟而且食得出材料新鮮。不過最吸引嘅，一定係佢地嘅玫瑰花造型蛋糕，一塊塊朱古力花瓣相當逼真，Grand到唔講仲以為係出自酒店大師之手！而且入面嘅一層層蛋糕同鮮果忌廉依然係簡單得嚟無欺場。
朱古力迷最愛 Awfully Chocolate
圖：catcatgogogo，herbert
雖然幾乎間間餅店都會有朱古力蛋糕，但如果要送蛋糕畀忠實朱古力Fans嘅話，就可以考慮呢間嚟自新加坡嘅過江龍。All Chocolate蛋糕名副其實由外到內都係黑朱古力，口感濕潤幼滑而朱古力味非常香濃。Chocolate Banana就加咗兩層香蕉蓉，香甜得嚟同朱古力非常夾。而Chocolate Rum & Cherry當中嘅冧酒中和咗甜味，係大人成熟嘅口味。
搶眼呃Like蛋糕 Ms B's Cakery
圖：sophronia1995，ki918
喺相機食先嘅年代，有搶眼賣相當然值得加分，而呢間餅店嘅出品唔單止靚仲非常有特色。例如連個名都搞鬼過人嘅Better than Sex蛋糕上面就有個紅唇烈焰，下面其實係朱古力蛋糕，食落綿密，朱古力味濃郁而唔過甜，淋埋鹽味拖肥醬味道層次就更豐富。Butterfly Kisses更有無論8歲定80歲女士都咁鐘意嘅蝴蝶裝飾，切開入面仲要係鮮果彩虹蛋糕，無得輸。
隨時接收最新資訊
讚好OpenRice專頁！