珍香園 (已結業)

放假經過西灣河，我和朋友再次去珍香園食下其他小食，首先緊係叫咗個熱豆腐花$10、朋友就叫芝麻糊豆腐花$13、然後再叫一碟鹵水豆腐$12、一件生煎葱油餅$8、一個蒸菜肉飽$7。今次大家都覺得呢間店舖最好食嘅係鹵水豆腐，啲汁好香，豆腐好入味，好好食！生蔥蔥油餅大大件，唔會覺得油，亦唔會煎得好硬，我哋覺得係第二好食，至於蒸菜肉飽就一般，芝麻糊豆腐花唔夠芝麻香味，下次唔會再叫。總括：以上食物全部都好大衆化價錢，抵食！

星期二下晝大約6點，突然好想食豆腐花，於是我和朋友兩人就去咗西灣河間珍香園。一入到去諗都唔使諗就叫咗凍及熱豆腐花各一碗($10×2=$20)，可以自己落糖水或黃糖，如果想加薑糖水可以出聲，職員會攞過嚟倒入碗內，不過我哋都無叫到加薑糖水，怕搶咗黃豆嘅香味，然後朋友再叫咗炸釀豆腐、炸鯪魚球、炸釀紅腸及炸雲吞各二($12×2=$24)。當食緊嘅時候，老闆就向食客推介佢哋個特色豆腐花，其實就係豆漿加豆腐花，唔需要加糖，可以食出清淡嘅豆香味，於是我都叫咗一碗試下($10)。總結：豆腐花唔夠豆味，而特色豆腐花因加咗豆漿，所以比普通豆腐花多少少豆味，感覺豆漿本身已有少少甜味，所以真係唔需要再加任何糖水，特色豆腐花最啱食清淡嘅我。至於炸嘅小食，都有一定嘅水準，亦沒有特別嘅驚喜，價錢都算抵食。

豆腐花賣相完美，像是一個球形一樣，有點像原球的水牛芝士，滑一滑，唔會有石膏味又唔會太水，有彈性。呢度仲有特別嘅豆花款，參考星加坡做法嘅星洲豆花，豆花加甜豆漿，唔使再加糖，老闆強烈推介，但今次食得太飽唯有下次再試。滷水豆腐大大件，吸哂汁，滷水偏向白滷水，看上去透明淺啡黃像油的顏色，比較少見，一口咬落去爆哂汁，記得要食得小心啲，唔係一身都係。另外叫咗啲煎釀三寶，蘿蔔絲餅，蔥油餅，三寶中還是招牌貨豆腐最突出，外脆內滑有豆香，魚肉份量唔多但新鮮彈牙。蘿蔔絲餅有大量蘿蔔粗絲，無咩溝粉，用料實在。

舊式街市裡通常也有家豆品店,北河街的公和、廣東道的廖同合或人和、馬寶道的德興隆、順寧道的順興隆桂記也同樣有著一定歷史也較為人熟悉。其實西灣河也有著一家區內有名的豆品店--珍香園,此乃居於此處的前前同事曾向我大力推介之食店,雖然跟她已沒聯絡一段日子,這個推介我仍然記得。 珍香園位處小食勝地太安樓對面的露天市場,在肉檔魚檔間的豆品店,實在為一眾主婦提供方便一條龍服務;此店外觀比之前提及過的豆品店簇新,煎炸食品都以膠蓋蓋好,衛生或安全程度又好像比較良好。店內桌椅也較新型也坐得較舒適,只餘格仔地磚較有老店氣息,窗明几淨的豆品店不只新式連鎖店才有的唷。豆腐花($9.5)售價比荃灣區的進取很多,所用飯碗較細,份量似乎有點迷你;豆腐花片得不太薄,吃來較有咀嚼勁,不是新式絲滑若無的滑不溜口質感,未加糖時嚐到黃豆味,加點糖水食味變得更好。窩貼($10/2隻),如太子爺的大男孩會以老式大鐵鍋加熱後才奉客,窩貼不像傳統上海館子般厚皮,反而有點像煎餃子般,椰菜豬肉餡裡還有肉汁,明顯薑味更是特別,剛剛煎好一定更好吃。同場叔叔的豬皮豬紅好大一盤,每片豬皮煮至淋淋的極入味似的,吃一碗也夠飽了。

今日行過呢間舖頭就走咗入去食個下午茶, 一坐低就叫咗個豆腐花, 而家好難遇到咁滑既新鮮豆腐花喇, 一唔小心就滑咗2次入喉嚨到, 比起新界既山水豆腐花都要滑得多. 食完之後再叫咗個 魚肉釀豆腐, 係我未食過咁外脆內軟滑既釀豆腐, 平時食個D通常新鮮炸起都好啦個皮都會有D um, 而且通常用硬豆腐, 但呢個真係脆, 不過唔係燒肉皮或者麵包糠個種鬆脆, 但咬落去第一個感覺好脆, 跟住就係好軟滑, 魚肉好味到. 如果整體個豆味可以再重D就真係 perfect 喇, 下次有機再去要試埋其他嘢食. 其實係睇餐牌個時就發現有張通告, 一望之吓發現原來係善事嚟架, 真係估唔到好似呢D老舖都會有呢D活動, 抵讚抵讚.