影片
更多
2015-03-21
1097 浏览
呢篇係小弟第一篇食評，希望大家多多指教。 話說前一晚電視台報導長洲嘅關公忠義亭啲櫻花已經開咗，小弟已經決心去嗰度趁下墟。但點知第二日起身都已經係晏晝，而且夜晚我有其他嘢做，不過都即刻爬起身，打算趕到一小時後班船都叫做衝入去影到先…………最後，究竟趕唔趕到班船呢？個答案就係 － 趕到班船就唔會有呢篇食評啦。 一蘭初期開業嘅印象對我黎講仲係記憶猶新，譬如係話排3，4個鐘先有得食、凌晨仲要排好耐隊等等。今次去一蘭嘅想法都係即興，見到長龍就即刻走嗰種心態。但點知一去到………咦，呢條街咁冷清嘅？呢間真係一蘭嚟？係咪閂咗門咋？呢幾條問題一直喺我腦中盤旋，直至到有人喺入面埋完單出嚟先知原來有開門。原來喺過咗熱潮過後嘅某平日晏晝，一蘭係完全可以WALK IN有位揀的。 一蘭只有一款豚骨拉麵揀，但我認為呢樣嘢有好有壞。壞嘅當然係無其他款俾人揀，但好嘅就係因為佢只係專注煮一款麵，令到我哋客人可以有更細節嘅選項可以揀，亦係我欣賞喜歡嘅地方。今次「初嚟報到」，決定唔揀「重口味」先揀咗湯底濃郁，２倍辣，軟硬度揀普通，有青蔥，有叉燒，另外再加隻溏心蛋($12)。一蘭嘅佈局唔洗我多講吧，呢個自修室佈局我個人覺
話說前一晚電視台報導長洲嘅關公忠義亭啲櫻花已經開咗，小弟已經決心去嗰度趁下墟。但點知第二日起身都已經係晏晝，而且夜晚我有其他嘢做，不過都即刻爬起身，打算趕到一小時後班船都叫做衝入去影到先…………最後，究竟趕唔趕到班船呢？個答案就係 － 趕到班船就唔會有呢篇食評啦。
一蘭初期開業嘅印象對我黎講仲係記憶猶新，譬如係話排3，4個鐘先有得食、凌晨仲要排好耐隊等等。今次去一蘭嘅想法都係即興，見到長龍就即刻走嗰種心態。但點知一去到………咦，呢條街咁冷清嘅？呢間真係一蘭嚟？係咪閂咗門咋？呢幾條問題一直喺我腦中盤旋，直至到有人喺入面埋完單出嚟先知原來有開門。原來喺過咗熱潮過後嘅某平日晏晝，一蘭係完全可以WALK IN有位揀的。
一蘭只有一款豚骨拉麵揀，但我認為呢樣嘢有好有壞。壞嘅當然係無其他款俾人揀，但好嘅就係因為佢只係專注煮一款麵，令到我哋客人可以有更細節嘅選項可以揀，亦係我欣賞喜歡嘅地方。今次「初嚟報到」，決定唔揀「重口味」先揀咗湯底濃郁，２倍辣，軟硬度揀普通，有青蔥，有叉燒，另外再加隻溏心蛋($12)。一蘭嘅佈局唔洗我多講吧，呢個自修室佈局我個人覺得好新鮮，亦都做到一個靜靜地嘅私人空間食，完全啱我呢種成日一支公搵嘢食又怕同人夾枱你眼望我眼嘅人。呢度點餐前點餐後、嘢食嚟嘅之前之後，都有員工講日文，係真係有一剎那令我感覺喺日本食。好，入番正題(前段好似講得太多XD)，碗麵好快就送上嚟。麵入面就同下圖一樣，由於我十分喜愛食蔥，見到有咁多我好開心，但得２塊叉燒我就覺得有點兒少。先呷一口湯，呢個「濃郁」湯底對我嚟講啱啱好，唔會話太鹹／太淡，豬骨味真係好濃，而且面頭嘅脂肪還可以接受。而且佢建議嘅２倍辣亦都十分好，既可以滿足我無辣不歡嘅口味，亦唔會因為太辣而搶走咗湯底本身嘅味道。再食一口麵，嗯，我覺得都唔錯。
喺我等麵嚟嘅期間，喺我眼水平線就俾我望到張關於一蘭嘅「博多文化」。博多文化主要嘅意思係叫你加底。而我亦都「入鄉隨俗」，叫多一個麵底($19)，今次麵底我就寫咗「超軟」。(題外話，因為我係食完之後加單時候先寫加麵底，所以個湯底都擺咗少少時間，到個麵底嚟嘅時候，個湯面頭嘅脂肪竟然已經結咗層膜）另外我覺得淨係加麵會好「寡」，所以另外加多$20要多碟叉燒。當叉燒嚟嗰陣嚇咗一嚇，廿蚊竟然係得３塊薄薄嘅叉燒（我番去同啲同事屋企人講個個都話我蠢……)…………今次嚟嘅超軟麵底絕對比叉燒收貨，$19對比一蘭其他食物嚟講真係超值。
今次嚟的確令我大開眼界，小弟本時無話特別留意拉麵邊間好食。呢次都係因為呢間聲名真係太大噪同埋我去唔到長洲先試，不過對我嚟講真係有驚喜，亦令我開始留意有關拉麵嘅食肆。是次嘅消費一共係（$89 + $12 + $19 + $20 + $29 =) $169。呢個價錢去食碗麵好似有點貴，但唔係經常嚟食個人嚟講覺得無所謂啦，最緊要有驚有喜有滿足感啫。我亦都好滿意呢度嘅服務，環境等等其他方面嘅細項，所以我評價俾佢「」係值得嘅。
题外话/补充资料：
小弟建議各位師兄師姐都有意嚟呢度「朝聖」食嘢而唔想排隊的話，我諗除咗清晨之外，平日晏晝都係一個好好嘅選擇。但當然個大前提係 － 你嗰日平日唔洗番工 XD
(以上食记乃用户个人意见 , 并不代表OpenRice之观点。)
张贴
