樂記煲仔飯粥麵專家

营业中

休息中

今次用餐經驗非常失望。首先，店員服務態度極差，入去完全無人理，點餐時竟然連續落錯三次單，浪費大量時間，最後勉強送來正確的食物。煲仔飯完全無應有的飯香和焦香，飯粒濕軟像焗飯一樣，毫無口感，雞肉份量極少，而且不夠滑嫩；臘味硬到根本咬唔開，好難食，完全係無誠意。香辣魚皮更加離譜，無辣味無爽口感，而且份量少但收$69，高價低質，性價比極低。整體感覺食物無誠意，服務混亂，完全不值得再來，也不會推薦給任何人。真心唔會再食。

✨北菇滑雞煲仔飯 $62推薦度：9/10雞件份量好多，雞肉嫩滑，偏多細骨，食個陣要小心❕香菇新鮮多汁，米飯軟硬度適中，煲仔飯底下有飯焦，飯焦好香好有咬口🤤✨公司臘味煲仔飯 $62推薦度：8.2/10 切到好碎嘅臘腸潤腸，每一啖都會食到臘腸潤腸，配埋啲蔥花豉油好香口，但整體偏鹹🙆🏻‍♀️✨炸兩腸粉 $25推薦度：8.5/10腸粉包住油炸鬼，油炸鬼酥脆，腸粉夠薄夠滑，有白芝麻點綴幾香口，小編好鍾意食🤲🏻

自己落錯單，仲要態度惡劣，覺得自己有錯係好正常，轉左名再開都係一樣咁衰格。野食又淡又冇味，價錢愈來愈貴己經算數，但係料愈落愈少，皮蛋瘦肉粥得一少拙瘦肉。 兩蚊成本都要慳。今次仲要得皮蛋冇瘦肉，賤格到一個頂點。仲要打電話去解釋番怪責番你轉頭。上幾次食煲仔飯，叫臘腸排骨煲仔飯冇臘腸，又冇豉油，次次都係返到屋企先發現，特登揸車過去，想唔燥底都唔得。喺外賣平台叫，外賣員次次嚟親都投訴叫我唔好叫呢間嘢。真係垃圾鋪頭。

話就專登揸車入去呢到食叫外賣返屋企食，都唔係住附近不過咁岩係大埔就去試下，叫左個粥同腸粉，返到去勁肚餓，諗住開餐，點知個粥佢唔錯左單，之後打返去同個鋪頭講返，佢仲要鬧 返我，話唔一定會100%岩啊喎，咁忙一定會有錯，咁你想點呀，一係你依家過黎我比返錢你囉，呢個唔係個幾十蚊既問題，我叫得野食就預左會比錢，依家係你自己落錯單仲要大支野覺得冇問題個客要接受，咁既態度點都唔會再黎食

買個煲仔飯 09分買 話等15分鐘 等到42都未比到我 問仲要幾耐 話出梗 2分鐘 我確認 兩分鐘？ 話係最後47攞到飯 鍾意排隊可以試下要等唔係問題 你可以講一個鐘我可以選擇唔排 而唔係up一個你做唔到既時間

自後陳漢記在疫情不久結業後，隔了一陣子便由新投資者聯合一批舊伙記，在原址經營了一間樂記，便保留了原來的裝修及食物。 這天專誠過來試下水準，可惜腸粉師傅病了，吃不到傳說中的纖薄腸粉，惟有叫了一客狀元及第粥及鹹肉糭的粥麵餐，及第粥的材料很豐富，有豬潤、豬肚丶豬腸、其它豬什和肉丸，材料不算非常鮮味，但又不致於沒有肉鮮味，而鹹肉糭則夠結實又多餡料，不會一挾就散開成碎件，以五十九元一客粥麵餐算交足功課了。 日後有機會再來便要吃它的煲仔飯，好跟往日陳漢記的出品比較一下。#樂記粥麵煲仔飯

話說上次平日食左次普通牛腩麵，覺得OK喎，琴晚假期食完飯經過，諗住就去食多次，再飽肚啲回家，點知今次就出事了，唔知點解啲牛腩差左又少左之如，個價錢仲要貴左，普通牛腩麵成60蚊一碗？！！究竟係假日加價定係點情況呢？ 講真行幾步去食香港人魚蛋佢地既牛腩仲抵食，就算唔係隔離苑記或者香港仔，佢地既質素同份量都多好多，仲要平啲，認真講我相信呢個價錢，我唔會再來食碗麵了，60蚊食呢碗牛腩麵實在不值呢，純個人意見。

有時夜麻麻口痕都想搵啲嘢食吓😊有車就好方便啦，去到邊度搵食都可以☺️今次就去左大埔搵食啦😀自從舊舖陳漢記執咗之後都冇嚟過呢邊食☺️開咗一間見佢改咗名之後都想入嚟試吓睇吓同之前有冇咩分別😊因為個日去食都成凌晨2點，所以附近選擇唔算多😀好彩搵到呢間俾我醫下肚仔🤗😋炸醬魚片麵炸醬既肉絲少少辣，肉絲又唔會太肥👍🏻魚片唔會腥味😚不錯👍🏻舔舔脷指數👉🏻6😋/10😋滿分 可以一試😋

以前係排晒隊嘅陳漢記，而家轉咗手叫樂記今次試咗兩款煲仔飯同一道白灼菜白灼牛柏葉鵝腸：呢個菜雖然係比較清淡，牛柏葉嘅質感處理得幾好，爽爽地，但鵝腸既味道就比較淡。豉油都幾提味，本身自己都係鍾意食牛柏葉同鵝腸，所以都唔錯白鱔雞飯呢個絕對係今日嘅亮點！雞肉滑溜溜，白鱔鮮味十足，兩樣夾埋一齊好夾。啲飯吸晒雞肉同白鱔嘅魚油精華，香噴噴，飯焦又脆口，食完仲想再食。臘味排骨煲仔飯臘味好香，排骨都幾入味，不過同滑雞白鱔煲仔飯比，呢個層次感就冇咁豐富。啲飯都吸咗臘味同排骨嘅味，唔鍾意食魚嘅人就可以叫呢款總括嚟講，滑雞白鱔煲仔飯最正，臘味排骨煲仔飯都唔錯，如果想試吓有魚油嘅味，白鱔煲仔飯絕對係首選。

天氣凍就係食煲仔飯嘅時間，今日幫襯咗呢一間位於大埔出名食煲仔飯嘅舖頭，整體覺得都滿意嘅。叫咗個黃鱔煲仔飯加潤腸，黃鱔畀想像中多而且都幾大舊，加咗潤腸明顯係好食啲，可能係潤腸啲油會滲埋落去啲飯度啦，侍應拎到嚟嘅時候都熱辣辣嘅，出曬煙咁樣，不過一揭開其實係有少少擔心，因為個煲仔飯畀預期之中係比較多水份比較濕，咁嘅情況好大機會冇飯焦。不過好彩食到尾佢好神奇地唔知點解啲水份好似收乾咗咁樣，刮到啲飯焦出嚟而且都幾大塊，又香又脆又唔會太燶。

黎到呢間曾經係大埔名物嘅食店雖然已經係下午茶時間，不過因為我仲未食飯，所以我就叫咗個咖哩牛腩飯，而我個Friend就叫咗D小食食。作為一家有粉麵賣嘅舖頭，賣埋牛腩飯其實都係好正常嘅。佢份牛腩都算多，不過比較瘦比較un，有部份牛腩要花少少氣力先咬得開，反而D牛筋幾正。小食先叫咗碟豬潤腸粉，呢個係咁多樣野之中最好食嘅一樣，D豬潤都幾新鮮，腸粉都滑。貪得意叫咗個炸鮮奶，味道只屬於一般，一碟有6條係比想像之中多嘅。最後仲叫咗碟腐乳通菜。

兒時嘅風味，可謂買少見少🫠 呢日誤打誤撞過到嚟大埔墟，竟然發現「陳漢記2.0」翻生，仲改埋名變咗做「樂記」😅 一場嚟到，就試吓「樂記師傅」嘅手勢😉除咗招牌轉左名，舖裡舖外嘅裝修幾乎一模一樣😉 嚟得幫襯梗係要試吓佢哋馳名嘅 #煲仔飯 🍚 落單唔夠5分鐘，我哋要嘅 #鳳爪排骨煲仔飯煲仔，同埋 #鹹魚肉餅煲仔飯 已經嚟到我哋面前🤤 熱辣辣嘅煲仔飯灑上甜豉油特別香口，配料嘅豐富度更勝前身，滿滿嘅排骨同鳳爪鋪滿飯面，油香同飯粒夾雜，味道都唔錯🤤 不過我就比較喜歡鹹魚肉餅嘅口味，貪鹹魚味道夠香口，襯埋肉餅一齊入口，認真一流🤤🤤另外我哋仲叫咗 #蜆蚧鯪魚球、#叉燒腸 做主食，鯪魚球夠晒酥香又爽彈，不過點解六粒鯪魚球只係分得一粒 #蜆蚧 我哋做醬料😅 好在鯪魚肉本身夠晒味道，「五餅二魚」配搭還可以😉 不過碟 #叉燒腸 就認真迷你，同前身比，整個口味爭咗啲囉😅 之後我哋再加咗個 #艇仔粥，粥底好綿滑，味道都唔錯🤤 不過可惜新年期間炸豬扒飯冇得供應，我哋只好跟阿姐嘅提議，改成 #炸雞髀併太陽蛋飯 😅 熱辣辣嘅生炸雞髀本身都幾好食，但係肉質就乾身咗啲，不過加埋「中學回憶」嘅螢光茄汁撈埋啲飯一齊食，又幾有風味

從前這裏是已煲仔飯聞名於世的餐廳，可惜轉手之後今非昔比，今天再嚐煲仔飯，失望而回。點的是經典臘味雞煲仔飯和黃鱔田雞煲仔飯加潤腸，兩個煲仔飯不算很大煲，最敗筆的地方就是飯比較濕，吃不到煲仔飯應有的香味，幸好餸比較多，否則很難吃掉整個煲仔飯，另外雖然飯不夠乾身，但竟然也有飯焦，算是有驚喜吧。臘味雞煲仔飯的雞肉、潤腸和臘肉質素算不錯，可惜臘腸比較肥。黃鱔田雞煲仔飯的黃鱔數量亦算多，加九元的潤腸竟然有兩條，有驚喜。

又到左食煲仔飯既時節⛄️❄️前排見有人提及樂記煲仔飯，呢日去大埔就即管試下，夜晚都要排大半個鐘，對比西環或者荃灣幾間算快，可惜質素直接被比下去😂▪️ 白鱔排骨煲仔飯 （6/10）💲88一向偏好肥美白鱔，但係呢度既切得好薄身，口感差咁啲，但都要小心有頗多細骨，入口亦有點兒腥，而排骨就骨比肉多😮‍💨感覺飯底比較濕，同埋無咩飯焦👉🏻👈🏻▪️ 窩蛋牛肉煲仔飯 （6.5/10）💲62面頭有隻生雞蛋，加上份量適中既牛肉片，稱唔上好嫩滑，但係都唔會鞋韌🐮個飯底同樣唔夠入味，但起碼呢兜相比下乾身少少，底部亦有啲香脆飯焦🍚▪️ 炸鮮奶 （7/10）💲39 (6件)即炸上檯熱辣辣，炸漿雖然略厚，但外皮都夠脆口，內裡係類似奶凍，奶香唔錯🥛🔎 整體評分（6.5/10）

餐廳前身係陳漢記，聽講只係賣咗名，班底不變，見天氣凍凍地就去食煲仔飯。當日叫咗腐乳通菜，豬潤腸粉，白鱔排骨煲仔飯，咸蛋肉餅加窩蛋煲仔飯。先講服務，待應們確係好忙，但態度正常，茶記服務嚟講，我覺得可接受。坐位方面確係幾迫，人貼人要搭枱，唔中意搭枱嘅就要注意。食物方面：腐乳通菜，呢個時蔬依家好多粉麵店都無得食，可能因為通菜成本比其他菜高。樂記算幾大方，俾得大大碟好味指數：豬潤腸粉， 佢嘅腸粉皮係薄嘅，可惜上枱碟野係凍嘅，豬潤蒸得岩岩好，無過熟嚡口，可惜切得太細粒無曬口感。同以前陳漢記比高下立見。好味指數：煲仔飯， 一直覺得煲仔飯好唔好食係好個人，有d 人中意乾身有飯焦，有d 人中意偏濕。我自己就中意前者。樂記嘅煲仔飯係偏濕口感，有飯焦但唔多亦唔夠焦香。排骨骨多過肉，白鱔算大件，大概有五件。但等候時間有d 長，當日等左大約40分鐘。好味指數：整體嚟講，無需要特登去大埔食。但如果係街坊的話，當佢一般茶記就一試無妨。