兄弟海南雞飯

营业中

休息中

啱啱喺聯和墟街市買完餸，就上2/F or 3/F的熟食市場睇吓有咩外賣可以買返屋企做午餐。千揀萬揀，揀咗呢一間兄弟海南雞飯，見佢餐牌寫住$50招牌海南雞飯，轉雞髀就加$7。於是我就同個貌似老細嘅男人講：海南雞飯轉脾外賣，要白飯，個男人話得返油飯啫，白飯賣晒。我話OK咁要油飯。等咗一陣係個阿姐攞盒飯俾我，阿姐要收我$59，佢話個水牌啱啱轉左，未改返轉脾加$8，另外1蚊外賣盒。 返到屋企打開盒飯，谷鬼氣，佢比隻雞翼我，佢又識收我加$8轉雞髀，我都算，因為已經返咗屋企，唔通再揸返15分鐘車去換盒飯咩？ 海南雞冇味嘅，仲有隻雞好肥， 啲雞皮黐住好多肥膏，睇見都唔想食，但係差唔多60蚊一個飯，勉為其難食咗三份一，我好後悔喺呢間度買外賣，早知買隔籬檔嘅炒粉麵算啦！呢間嘢唔會再幫襯

今次去呢間專做海南雞既餐廳係間小店，無分店，咁岩今晚係熟食中心見到就好奇試下我地三人同行， 但一致都認為晚市二人餐再加碟小菜及串燒已經可以好飽。套餐可以點兩份主食及小食另外仲會送椰子湯同飲，我地叫左一份滷水豬髀飯及香葉肉碎蛋飯，小食就叫左泰式炒通菜及加錢叫左半隻海南雞，另外再叫左疊咖哩蟹同串燒，所有食物份量好多，海南雞好滑，菜都炒得好好味，咖哩蟹同香葉肉碎飯係心食之選，我就覺得豬髀飯可以再整淋多啲就更合我口味。串燒黎講，佢燒得好香，而且外皮香脆，一啲都唔算燶，明顯係好用心燒出黎，而家食落去肉質好好，唔會太熟又唔生。咁岩撞正鋪頭開第一晚晚市，老闆仲請我地食燒蠔，當然肉質肥美，火喉剛好，值得一試