劉興記生煎包專門店

营业中

休息中

上環真係超級多野食！今次試下新開的生煎包!去到門口已經見到一條人龍，座位不多所以好多人叫外賣。好多打工仔都係買生煎包~我地叫左蟹皇生煎包同皇牌生煎包，兩款都爆多汁，難怪甘多人叫。蟹皇生煎包真係見到内餡有蟹黃同蟹肉架，呢個比皇牌生煎包更勝一籌！湯汁好甜好鮮。鷄絲粉皮好大份，呢度的粉皮係捲狀的，好滑，叫上芝麻醬好開胃。豆沙鍋餅好脆皮，配上甜甜的豆沙係我必叫的菜式。排骨葱油拌麵，超大份。係中上環地段甘的價錢同味道，真係好高性價比。

今日落大雨行過見無咩人就入去食, 呢間野要俾左錢先上野食都知伏伏地, 點知真係伏地more甘伏俾完錢啦, 問佢可唔可以走青瓜, 點知個唔知樓面定老闆話"你走埋雞絲走埋粉皮都得架" 如果唔係我已經找埋錢, 我一定拍佢檯兼走人, 你而家即係叫我食個碗呀....好啦, 態度已經夠衰, 算啦, 野食都應該係人間美食先做會咁沙塵吧, 個雞絲一陣雪味, d麻醬仲要杰到我要對爛佢個生煎包開希d先食到, 唯一可以讚既就係d醬真係好多之後到個so call馳名生煎包啦, 皮雖然唔係話好厚, 但又唔脆的, d肉雪味濃, 真係搞唔掂, 雖然好肚餓, 但係我都食剩半隻就唔再食唯一好d既就係個豆漿, 因為食完好頸渴, 俾我一野飲晒呢頭返工咁多年都好少打食評同都難搵到間令我印象深刻的食肆, 劉興記, 你係得既

爆汁生煎包! 上環開左分店~.招牌生煎包食剩指數：0/100呢度最出名就係生煎包生煎包即場包個底煎得好香脆一咬爆汁!入邊舊肉同啲湯汁都好熱！要小心食!.雞絲粉皮食剩指數：0/100麻醬落好多好香粉皮都幾滑加埋青瓜絲幾清新雞絲都唔算好少.排骨蔥油拌麵食剩指數：0/100排骨炸得幾好唔厚粉肉質都唔會好乾蔥油拌麵好惹味.鮮雞湯小雲吞食剩指數：0/100一碗有好多隻小雲吞好薄皮餡料好有味~.劉興記地址：上環文咸東街2號

生煎包不錯新鮮爆汁，酸辣湯正常水準 ，雲吞正常水準 但個湯太鹹 雞絲粉皮個醬汁太濃稠 食兩啖就會好滯 如果水返啲會好啲 ，杯豆漿真係好似水咁 冇乜味 最伏喺豆沙窩餅 似係街邊嗰啲一蚊咖喱角嘅口感🫠但勝在服務態度 前身拉麵店嘅時候態度一直都咁好 個雞絲粉皮都係佢臨收舖先送的 真係因為老闆先幫襯 改善下就應該唔使再轉營 老闆加油🥹

呢間新嘅餐廳位於喺上環，喺A出口行過去大概都係3分鐘嘅位置，完全唔難搵，我哋喺下午茶時間過去，比較好彩都冇乜人。我哋叫咗兩個set ，另外再加一個酸辣湯生煎包🎉，生煎包非常好食，入邊非常多湯，而且味道條配搭非常好，亦都係餐廳嘅鎮店之寶，我同朋友都非常鍾意食排骨菜飯🎉，佢嘅排骨菜飯都做得唔錯，而且份量都幾多，有少少可惜係佢嘅豬扒有少少乾，不過菜飯都係幾好食，整體味道都係夾酸辣湯🎉，酸辣湯味道都幾好，有好多唔同嘅配料，令到成個湯嘅口感昇華！

新開張，菜單精簡，價錢親民，食物種類不算很多，但很適合上班族。《雞絲粉皮》部份粉皮未煮透，過於彈牙，甚至帶點爽口，幸好醬料足，味道不錯。《排骨菜飯》豬扒很可口，炸粉很薄，啖啖肉。菜飯非常乾，菜太少，建議多放點白菜。《生煎包》滿是湯汁，較像鍋貼的皮，不像一般生煎包的皮，但我覺得也挺好吃的。《豆沙鍋餅》太油了，沒炸好，要帶回家翻烤。但餅皮尚算軟滑，如果堂食可能好些。----------注意只收現金，有點不方便。

今日同朋友係上環行完街，搵間餐廳食lunch~好耐冇食過生煎包啦😂咁啱見到附近有間食生煎包嘅餐廳就入咗去食👍🏽果然冇令我地後悔！我地兩個人叫左3樣野，再一人一杯豆漿就飽晒😋1. 招牌生煎包 (4粒) $30 ‼️一定要食‼️- 超級juicy😋爆汁！個生煎包一上枱熱辣辣，個底仲要好脆好有咬口，入面嘅豬肉好新鮮，配埋啲湯汁真係絕配，完全唔油膩，一個人食晒4粒都得😆2. 麻醬手撕雞絲粉皮粉皮 $35- 份量好夠，個粉皮好滑，雞絲都幾嫩👍🏽以35蚊做到人地舖頭70-80蚊嘅水準😂仲有個麻醬嘅花生味好岀，配埋青瓜絲，係夏天食，好爽😄3. 排骨蔥油拌麵 $42- 嘩！一上枱俾個擺盤嚇親，砌得好靚🥰個麵嘅醬係微微偏甜，啲麵幾爽口，係撈麵嘅感覺！個炸排骨外脆肉嫩，仲見到粉紅色同肉色嘅一層層😋完全唔會食到油膩嘅感覺👍🏽4. 豆漿 $10- 食上海菜不可決嘅飲品😂味道正常發揮，唔太甜，豆味適中，唔會有豆渣~