名人私房菜 (已搬遷) 新店位置

呢間私房菜喺每隔一排會轉menu，會 whatsapp 個菜單嚟confirm。我哋都冇乜點理，最主要係想試下個廚嘅手勢。同埋佢哋係唔會整小朋友份量（小朋友當大人計，勁唔抵），所以如果有小朋友嘅話就要考慮下！每人頭要300！ 入面感覺比較舊，都係房仔，可能得兩三間房？ 6餸 1湯 1甜品。  免加一送汽水。花雕蛋白蒸蟹，但蛋白完全冇花雕嘅酒香，蟹味都唔覺吖，失色！荷葉蒜茸蒸蝦飯會以為啲飯一定會好香！但係啲飯似係後加落荷葉度，而唔係包住嚟煮嘅！所以似係白飯，完全冇荷葉或蝦嘅香味… 頂多可以話係白飯底。即係拎啲蝦餸白飯咁。 蒜蓉粉絲蒸扇貝，略為過熟，老咗。鮮魚雜菌，冇咩特別… 雜菇湯。蘋果咕嚕肉，聽落幾特別，不過我都係鐘意傳統加菠蘿嘅咕嚕肉多啲。有個蒸海斑／大白菜豬肺湯／甜品冇影到。其實最滿意嘅竟然係個湯… 會唔會有啲奇呢？

訂位時，我千叮萬囑要訂房，跟住亦落實好哂所有嘢喇，去到果陣，佢居然夠膽死同我講：我即刻走..........依啲咁嘅（優質服務），您哋仲敢食呀？自己睇路啦~~~

今天晚上这私房菜確是生意兴隆，所有房间和大厅均高朋满座，都是供应同一菜式；或许这同时為那么多客人備餐影響了食物的質素：豬肺湯清淡無味、蒸海班味腥、食物不夠热、多碟食物同时上抬，並不照顾客人的用膳情况……等。招呼客人真的一般，並旡私房菜的親切体会……。

未曾吃私房菜的我，因班聚與舊中同學相約到名人私房菜，全部由搞手發板，我只係識黎到坐低動筷食野！首先黎係蒸海班，新鮮魚肉好滑，超好味，大隻又多肉，骨唔多，岩哂我最怕挑魚骨噶懶人，而且火喉時間好，連少食肉噶我都狂食，推介！！鮮魚湯什菌，什菌爽口新鮮， 好健康，仲有好多好味金菇，份量都好多仲有一味蘋果咕嚕肉，肉質鬆化， 骨都唔算好多，都幾多肉架每舊，其沙拉汁酸甜味夠，味道拿捏得剛剛好，甜酸剛剛好，令人開胃大家一邊吹水一邊食，因為我地人多所以可以獲得房間安排，聽搞手講都要早Book先有位。不過大家都食得好飽，差D都食唔哂咁濟，因為餐有送甜品飲品，每碟菜份量多，仲有其他咁多野又有湯，實在要有D胃量先得最重要係餐廳煮得好，每個都好用心好好味！！

慶功，老闆揀左呢到食飯，因呢到真材實料，個餐超豐富，$310一位。多野食到好飽，特別深刻印象以下菜式：花雕蛋白蒸蟹，好香，蛋白吸收晒蟹肉的鮮甜；荷葉蒜蓉蒸蝦飯，蝦好多又多肉，豉油提升到蝦味；飯粒粒分明，蒜蓉有爆過,夠哂鑊氣，好香口，送飯好開胃。金銀蒜粉絲蒸扇貝，粉絲蒸出來非常香而且入味～扇貝大隻味道好味爽口厚肉，配上蒜蓉粉絲蒸真的是最佳配搭，力推！！每樣都有D，唔同菜式，仲有包每人一罐汽水，仲有潤口雪耳糖水，超抵食！！

Farewell同事揀咗呢度食晚飯，想話Openrice 話地鐵站出口L5係會係地底兜咗個大圈，其實Isquare出口上地面行會快好多！！今晚個餐好多野食，豬肺湯十分滋潤，用料充足之餘，味道都很討好；花雕蛋白蒸蟹，蛋白好滑，花雕香得黎又唔會蓋過蟹肉鮮味，隻鉗又大隻好新鮮；荷葉蒜蓉蒸蝦飯，蒜蓉好惹味，但又無蓋過蝦嘅鮮味；鮮魚湯什菌，有好多種菜同雜菌，感覺健康；蘋果咕嚕肉，炸得外脆入面d肉又爽口軟韌有致，酸汁啱啱好，係我食過最好食嘅咕嚕肉！！今餐好美味滿意，無揀錯地方！！

朋友推介呢到嘅海鮮好得，book咗今晚準時抵達，果然係旺店記住要book，因每日只招呼幾枱，今晚係平日黎都全場滿座。每一間房仲有電視，啱我電視精～菜上得算快～湯係大白莱豬肺湯，料多，我食哂d肺，湯底清甜可口，真材實料無味精～花雕疍白蒸蟹，入面好多蟹肉，新鮮又香～荷葉蒜茸蒸蝦飯，海中蝦肉厚鮮甜，仲有精髓係d好香好惹味嘅蒜蓉，配埋d飯十分入味！蒸海班，大隻多肉少骨，蒸得好啱時間，推介！蒜蓉粉絲蒸扇貝，有粉絲及蒜蓉伴隨著大大扇貝，好滿足～呢度d海鮮果然好得，整體食物有水準，服務好～

生日飯，屋企人揀咗係「名人私房菜 」慶祝，因為知道呢道食物有水準！！叫咗個餐內容好豐富，一個湯+六個餸+一個糖水，特別推介如下：1）大白莱豬肺湯：個湯好足料無味精，我連d豬肺都食哂，因為好淋～2）花雕疍白蒸蟹：大大碟，5個人可以食好多次，好香好入味，入面仲有好多蟹肉同膏蟹，送飯一流！！3）荷葉蒜茸蒸蝦飯：又係大大盤好多隻蝦，每人食咗好多隻，蒜茸海中蝦多肉新鮮，煑得啱啱好一撕已成塊肉～4） 蒸海班：平時少食魚嘅我都覺得好好味，條魚好新鮮好滑同少骨，火喉啱啱好，煑得個時間好準確，肉同骨已好分明，好有鮮味，推介！！5）金銀蒜粉絲蒸扇貝：好新鮮鮮甜，大量蒜蓉，粉絲吸哂d汁，好味～6）蘋果咕嚕肉：煑得爽口而軟韌有致，甜酸適中，好好味～最後有糖水-冰糖雪耳作為尾聲，潤喉又滿足～所有食物都好有質素，好好味，份量多，用心製作，會再encore！！

有3間獨立房．大廳有一張大枱唔會聽到隔離枱傾計．啱晒朋友聚會1️⃣花鵰蛋白蒸蟹．蛋白鮮．滑．甜 帶出花鵰香味亦不會太搶蛋白蟹風頭2️⃣荷葉蒜茸蒸🍤飯．飯軟硬適中 蒜茸🍤加豉油撈飯一流3️⃣蒸海斑．魚新鮮 不過頭油少少淡 4️⃣鮮魚湯什菌．魚湯鮮甜配什菌好夾5️⃣🍎咕嚕肉．酸甜度適中 6️⃣蒜茸粉絲蒸扇貝．有少少overcook令元貝唔夠滑7️⃣白菜🐷肺湯．清甜無味精8️⃣芒果布甸．無特別 千期唔好有期望食物Overall不錯．只係甜品未能劃上完美句號Price: $310/ 人Rating: 8/10🍤

早前成家人去私房菜晚膳此家果然名不虛傳，端出睇得又吃得的菜式，味道十分好，當中有幾款個人認為特別喜愛，跟大家分享一下荷葉蒸蝦飯感覺好澎湃呢，蝦的顏色好靚，新鮮，味道超卓，沒有太濃的味精味，反而有蝦跟荷葉的香氣，而蝦的鮮甜味滲入飯中，味道十分討好，而飯口感軟硬適中，口感煙韌有嚼口但不會生米或過爛，吃一碗再來亦不會抗拒，再有葱蒜的香氣，更是好吃鮮魚湯什菌味鮮甜，菜及什菌完全吸收鮮魚味，味美菜及什菌來得新鮮口感爽口彈牙，當中吸收了鮮魚湯，令本身菜的鮮加上魚湯的清甜味，更是好吃食材份量豐富，絕不吝嗇鮮魚湯呈奶白色，入口鮮，甜，魚味濃而不膩，清清口腔之餘，更為下一道菜作準備另外這款鯉魚形態的芒果布甸亦是我十分欣賞真佩服廚師的巧手，令布甸如此悅目吸引目光，不禁令人相機不停，拍多數張鯉魚十分細緻味道香甜，芒果味道濃郁豐富，唯獨稍欠粒粒芒果肉，不過卻令口感更幼滑，配上花奶同吃，更令其香氣滑度多添幾分整體此處食材豐富，味道亦突出，而且加上心思，絕對值得一吃的私房菜！

私房菜是我和家人的最愛，始終呀媽煮飯唔叻，煮極都係普通野、特色既中國菜一般都係出去食。蒜粒咸豬手超大隻，有好多粒乾蒜提升個香味。咸豬手雖然咸，但未至於接受不了，屬於咸香的一種。肉質控制得好好，仲有絲滑的質感，用口一咬就拉開左，連呀婆婆都食得呢！肉多骨唔多，所以特別抵食，唔洗加d咩調味已經好夠味。老火靚湯(白菜, 羅白, 豬肉)分量都唔細，幾個人飲絕對夠，白菜羅白都吸左豬肉的鮮香味，所以都可以食菜，唔算好鞋。豬肉雖然煲耐左，都有d香味，照食唔放過。食落就似新鮮豬肉，好鮮。成個湯大但係又唔多油，直接飲，好味過呀媽煲的湯。咸咸地，但包括菜和肉的鮮味，份量入得幾唔錯。帶子花枝片炒西蘭花，帶子煮得好軟林，西蘭花炒得好爽口，但係食落唔草青好好味呢碟菜雖然味道唔重，但反而突出蔬菜夠鮮這間私房菜價格適中，味道不錯，性價比都算高了。

這次是筆者第二次到訪名人私房菜，私房菜館開業於宜昌街一商住大廈內，不是大門上的招牌字樣，門面與一般住宅無異。 餐廳內是三房兩廳格局，地方四正，沒有特別的裝潢，用餐環境普通。餐單於到訪前早已訂定，10道菜＄310 一位免加一，每人奉送汽水，定價合理。 大白莱豬肺湯湯汁挺甜，大白菜亦見清甜可口，難怪細周生及魚仔也十分捧場！ 花雕蛋白蒸蟹是餐廳的招牌菜，用上膏蟹入餚，橙紅蟹膏充足頂角，味道甘香。蟹肉清甜美味，並泛著微微的花雕酒香。蟹汁落在蒸蛋內，亦賦予蒸蛋一份美味的清甜感，唯獨滑度方面仍有改善空間。荷葉蒸蝦飯，蝦肉鮮度中規中矩，蝦殼霉軟惹人扣分。蒸蝦下方是蒸飯，雖然飯粒明顯乾身了一點，但因吸收了蒜蓉、蝦汁及荷香，味道仍算不錯。 上回在此餐廳享用了一道珍寶扇貝，體型之大，事隔兩年，大家仍津津樂道。當大家抱著期待的心情靜候這客金銀蒜粉絲蒸扇貝，眼見面前細小成品，再加上帶韌的肉質，結果難免令人失望。清蒸沙巴海班，重量約斤餘重，魚香嫩感理想。帶子花枝片西蘭花與鮮魚湯什菌水準合預期，無特別驚喜。菜膽雞雞肉鮮味一般，雞脾部份口感軟嫩，其餘部位肉質未感突出。蘋果咕嚕肉以酸爽蘋果取代常見的菠蘿，

今日一行五人試呢間食生日飯，第一度菜係花鵰蛋白蒸蟹，但花雕味唔夠重，蟹洗得唔乾淨，開頭以為係羔，睇真原來有泥，令人失望。蝦蒸飯好好味，飯有淡淡羔香。蒸扇貝過熟。最令人失望係甜品，芒果布甸但無芒果味，太甜。環境尚可，俾左間房我地，可以盡情傾。

同事散水，食得多酒樓全包宴，轉轉口味食吓私房菜都好。尖沙咀有許多上樓的私房菜，水準參差，今次都係博一搏，希望冇頻撲以下是我的食後感 : 1.薑葱炒蟹-新鮮Good，薑葱可多些小，迫入味些2.黃金蝦-香口、好味，連殼都食埋3.糖醋松子魚-yummy..好過食蒸沙巴蠆4.蘋果咕嚕肉-可以，如用回菠蘿會更提酸可口5.鲜魚湯什菌-魚湯淡而無味、d菌有d嗡味㖭6.金銀蒜粉絲蒸扇貝-正、蒸的時間可減少些7.糯米雞-是事先預備好的，夠水準，味道佳8.帶子花枝片炒西芹-可以9.大白莱豬肺湯-Good10.甜品-賣相佳、口感、食味一般此舊樓單位共有2大房1細房及1大廳，我們24人2圍霸佔了整個大廳，大家坐得非常親密，好不熱鬧。以每位$310，在現今百物飛漲之下，實不為貴，仲包12罐汽水和白飯任裝添。老闆黄先生是位實幹型人士，不花巧，實話實說，我喜歡…，我事後有些見解提供了給他，佢都欣然接受，大家都有精益求精之心，乃飲食界之福。

今日朋友帶我黎依家定位於尖沙咀既私房菜，好期待！因為我係第一次食私房菜。私房菜係係一間大廈入面，而佢既裝修都好有家的味道。鮮魚湯什菌個湯係用魚淆至奶白色，飲落有好魚既鮮甜味，配上多種菌類，菌既份量都好多，而味道清清地都唔錯。最岩就係中和番其他餸既味道，唔洗個個餸都甘濃味。豉汁蒸鳝味道夠曬濃，而且夠入味。豆豉味好香，至於鳝都幾大條，蒸得岩岩好，魚肉好嫩，用黎撈飯一流蟲草花水晶雞好好味，蟲草花好有咬口，味道亦好濃。雞就真好好滑，蒸得岩岩好，味道都不錯，食到好似有d酒味。而隻雞肥瘦適中，唔係好多脂肪個d肥雞。芒果布甸係今日既甜品，倒模整成錦鯉既外型，都幾有心思。芒果布甸配上花奶係絶配，而且布甸入面仲有前粒粒芒果，甜味都好夠，相當唔錯。今日食得好滿足呀，中菜黎講水準都唔錯。