太興 (富榮花園)

营业中

休息中

今晚晚飯夜左少少食, 求其係屋企附近解決, 哩間太興岩岩裝修完無耐, 門面都光鮮左好多, 就試下食物如何啦。驟眼睇入面裝修都幾靚, 好光猛而空間感亦幾大, 睇黎唔錯wo落完order等晚餐到既時間無聊周圍望, 唔望由自可, 一望就發現可怕既事實, 隔離張櫈有幾粒剩菜, 再望落地下, 好多細細類似廁紙碎既垃圾, 然後望埋右邊同後面個枱底, 成埋用完搓埋1舊既紙巾係度, 個堆起碼有10舊8舊, 真係好嘔心! 原本想影低佢但太核突真係唔想再望同埋影落電話度! 感覺似係樓面懶得清理掃埋一舊收鋪先清理?但我到達既時間只係9點左右, 距離佢收鋪時間仲有成2個鐘!! 真係有無攪錯放大圖由於單已落, 焗住係度食埋佢啦, 叫左咸檸檬蒸倉魚同埋魚香茄子煲。食物味道同賣相都ok啦, 只能講合格, 因為佢價錢都唔平。咸檸水仲有食飯期間有烏英仔飛來飛去, 不過佢咁既衛生環境都唔出奇食完拿拿林走, 唔想再唔小心望到堆廁紙賣單138蚊, 無乜必要都唔會再黎食, 太污糟啦! 既然花錢去裝修得咁靚, 點解內部環境會咁惡劣架, 整得幾靚都無用

太興飲食集團1989年成立。太興燒味的營運模式，近似其競爭對手大家樂、大快活及美心MX等港式快餐，不過形象上是燒味專家！分店在香港太約五十多間遍布全香港。食燒味，太興有保徵！由以前的老燒味店多年不斷改善形象，更用明星，運動員做代言人。希望改變形象進軍年青，時尚燒味市場。My Hero, 太好味道 - 是他們的slogan!由於各種食物，店鋪，服務管理得企業化，所以食物好有水凖。今天我掛念他們的燒鵝，來了吃他們的juicy 燒鵝常餐。一如以往，好味🤤👍🏻我在拍菜單分享給大家的時間，發現他們有貼心計算好卡路里健康歺（可以看圖）！減肥的朋友可以試。還有很多不同產品，可以參考圖。總括當然是會繼續支持🥰👍🏻

今日悶悶地、走出奧海城、行下行下、去到富榮花園、見到間太興、行入去嘆下下午茶、裝修有點舊、怪不得要裝修.坐下叫左雞蛋西式多士配奶茶、懷舊一下、高危就高危、偶一為之、唔怕戒口三天咪0⃣️K、不用10分鐘就有濃濃蛋黃撲來、西多嚟那、切開應該有浸一過疍醬、重配純牛油粒、肯落本、奶茶不用講、太興強頂、濃滑香、別作它想.分店招呼、都可以、起碼有應有對、請坐、多謝、bye bye 隨處聽到、今餐不錯.都值得介紹.

今晚去油麻地富榮花園探朋友，見路口有間太興，順路經過不如試下，餐牌有龍蝦推介;有三種煮法、薑蔥、咖哩、香辣，見到圖片香辣好靚就叫了，來到真的好香，份量夠，是一隻波士頓龍蝦，配菜有蓮藕竽、萵笋片、雲耳，食味唔錯不太辣，可以免費升級，連飯和飲品(叫了奶茶)都係$88，兩個人加碟灼菜心$20，要多個粉葛鯪魚燉湯$38，埋單$146，兩餸一湯食到飽飽，坐得舒服，又有服務，二人除開，祇系每人$73，好過食快餐

太興呢間茶餐廳聽就聽得多，不過真係一直都冇入去試吓，其實最想試就係佢個冰鎮奶茶。今日難得公眾假期同屋企人終於黎試吓呢間久仰大名嘅茶餐廳。先來嘅係魚香茄子肉鬆煲都尚算惹味，有帶點小小嘅辣味同埋肉碎，算香口，送飯一流。之後就嚟咗西蘭花炒青衣魚球覺得呢個係全晚最高質嘅一個餸。青衣魚球真係好好肉質，質地好彈牙結實爽口，唔同而家一般嘅魚柳都係偏淋身同埋散嘅，所以呢個魚塊真夠鮮味，值得一試。最後係豉汁涼瓜炒鮮味牛肉苦瓜最重要就係夠苦，佢呢度應該用咗傳統有釘圓型那種深綠苦瓜真係夠好味。另外跟餐分別叫咗兩個湯同埋呢度最出名嘅冰鎮奶茶湯分別係鯪魚粉葛赤小豆湯同埋滋潤杏仁豬肺湯。湯嘅份量都算大。杏仁豬肺湯真係杏仁味好濃厚，好似飲緊一個杏仁糊咁樣，配合鮮味豬肺湯好滋補滋潤。平時唔鍾意杏仁味嘅我都覺得係幾能夠吸引都唔鍾意杏人嘅朋友。最後就係呢個冰鎮奶茶。其實咁樣分開冰同奶茶真係能夠保持茶嘅濃厚，而且餐廳嘅奶茶真本身真係夠厚身，茶味夠濃。其實呢個係飲奶茶嘅精髓，好多餐廳都唔能夠把握呢個技術。如果遇上一啲薄身嘅奶茶，茶味唔出。根本就稱唔想係好奶茶。不過呢幾日天氣十分炎熱，餐廳用冰好像較少，冰度唔係太夠，如果多啲相

話說我住附近既，不過平時基本上唔會食太興，因為印象中頗貴。今晚屋企人諗唔到食乜，結果話好耐冇食太興，不如食吓。點知就出事了。我嗌咗一個去皮雞胸飯。唔好問我味道如何，因為我食都食唔到。眼見加單嗰份食物都嚟埋，但係我個飯都未到，我就攞住第一張單，追吓佢啦，我餓啦嘛。點知佢睇下張再印嘅單，竟然冇咗個飯！個侍應解釋話冇晒呢個系列既飯(我心諗：咁你擺咩餐牌出嚟啫)，叫咗第二個同事同我哋講，但係根本冇人同我地講過...... 就直接喺我地張單上面砸走咗。我白坐咗十幾分鐘。個人㷫㷫地拍咗吓枱，冇再嗌其他嘢，去咗隔離買壽司返屋企食。仲有值得一提嘅係，間鋪好_多烏蠅呀大佬。門又唔閂，防蟲又做唔好。有隻烏蠅喺我「等餐」嘅時候喺咁嬲住我，從我件衫上撥走咗之後就停喺我手臂上。食附近其他餐廳又唔見咁多昆蟲。以後唔再食(呢間)太興。

放假訓到自然醒已經係下晝2點幾, 就係屋企附近求其食啲野, 見太興唔洗等位就行左入去, 叫左個下午荼重量級三文治配凍檸檬, 三文治不過不失, 只係麵包烘得有d乾, 但係服務態度真係麻麻, 舉手示意嗌野食, 明明有2個待應見到我, 都扮見唔到, 要出到聲嗌"唔該"先有人走埋黎理我, 野食黎到放碟又飛落黎, 我明白茶餐廳唔應該咁多要求, 但係你收得比較貴既價錢, 都要提供返好d既質素吧 。

服務員服務差，等個簡單早餐30分鐘都未有得食！🔥🔥叫服務員跟進叫左5次都只係叫等等！趕時間就唔好去尼間食。已經唔係第一次係甘，D服務員只懂得大聲講客人是非，管理都有問題！

一個工作中早晨，去到呢度快快食個早餐，門面光鮮，入內地方幾大，紫色座椅搶眼，卡位坐低好快落單，食物好快到，餐具放晒在桌子櫃桶，乾淨企理！餐肉滑蛋麵（$33）呢個係去太興我食開嘅，今次真係失望，個滑蛋少到得湯匙嘅尺寸，一啖就無咗，雖然都做到嫩滑，兩塊有肉絲嘅午餐肉煎得幾香，鹹香好味！不過比之前其他分店食嘅薄咗，菜心淋到咬唔開， 啲麵質都ok，湯底係出前一丁嘅麻油味湯底！好味！整體唔得！熱檸茶：茶底濃但有澀味！一般！同事食雪菜肉絲米（$36）香草腸多士：凍奶茶：雞扒拼香草腸（$33）賣相同參考圖片相差甚遠牛油多士：奶茶：店員有笑容勤快，態度幾好！太興一直想做到高級茶餐廳，食物嘅質素咁跌法，食物又縮水！要留到個聲望似乎有啲難度！

太興而家D午市套餐四十幾蚊一個, 都算合理價, 入面D卡位都好舒服, 環境舒適。除左燒味出名, 佢D小菜都做得唔錯的, 食物有一定水準。午餐唔要飲品加錢轉左做羅宋湯, 個湯好香濃, 有牛肉同蕃茄既香味, 加上雜菜同胡椒粉, 真係好好飲!呢個梅菜扣肉, 選用優質的五花腩肉, 脂肪同肉形成間條形, 通透既脂肪, 入口即溶, 肉質軟熟, 個種感覺真係難易形容既好味, 其他餐廳有D用唔靚既腩肉, 又鞋又無即溶既口感, 呢到食真係無得頂。呢個涼瓜排骨用豆豉黎煮, 個汁幾野味, 好啱撈飯, 排骨肉質鮮嫩, 味道唔錯。

6點前非常肚餓 路過太興有tea set有飯食就入去喇墨魚四寶飯 輕盈版只係$30 仲有熱飲雖然話係輕盈版但份量都唔算少喎女仔一定飽呀另外試左兩啖肉燥米粉都好好味 同樣30幾蚊食完已經夠飽唔洗食晚飯覺得自己慳左錢

好耐都冇食太興，上週六趁上午比較得閒，去嘆份港式早餐黎醒腦提神。其實好想飲冰鎮奶茶，好好味，但個日唔飲得凍野，唔開心，唯有點熱奶茶。好在太興的熱奶茶都一樣滑一滑，同時茶味都好香好濃，比起維他個D唔知乜鬼港式奶茶／特濃奶茶好十條街。炒蛋多士又係好正，D蛋滑到呢... 如果我皮膚都咁滑就好了。多士烘到脆脆地又暖身，搽埋牛油又係好好味，就咁又吞左好多卡路里落肚!仲有一份火腿生菜絲通粉，味道都唔差，食完飽到唔駛食午餐lu~ 埋單$32，其實又唔貴，遲D再去食埋下午茶。

早前看過雜誌，得知太興推出了罐裝奶茶去過太興的朋友，應也品嚐過其冰鎮奶茶，老實說，雖是連鎖餐廳，水準也真的不錯是日，經過太興，也就買一罐來試試$11，以細罐裝(250L)來說，不算便宜用了五款來自斯里蘭卡的茶葉拼配和荷蘭的全脂淡奶口感幼滑，茶味沒有想像中濃郁經過的，不妨也買一罐來試試~

坦白講，太興既收費不嬲一D都唔平，甚至可以講拍得住全港最貴既茶記「翠華」！不過，正所謂人一世物一世，今日就「一生總要豪一次」食左個$32蚊下午茶餐既餐蛋麵！全名係「頂級午餐肉滑蛋公仔麵」既餐蛋麵果然一分錢一分貨。侍應一放低既時候已經聞到陣陣既麻油味，飲頭一啖湯已經飲得出係出前一丁熟識既味道，正！再試麵底，應該唔係普通公仔麵既麵底，因為麵質爽口之餘亦都有少少煙韌既感覺，抵讚！滑蛋方面，老實講當然冇「澳牛」、「翠華」之流咁滑，咁香，不過都叫做收貨啦，算係食到D咁多滑既感覺。最正、最正既係午餐肉，一食落口已經知道係非一般普通茶記之流，係一塊真係「肉」既午餐肉instead of 一舊用粉整出黎既物體！食得出肉既爽口口感之餘重食到「白豬仔」果陣午餐肉味，正！$32食個餐蛋麵真係好貴，不過貴得有道理，抵俾！

下班後去考試，未夠六點已經到達試場，還趕得切去附近吃下午茶 連鎖茶餐廳，平時多數去翠華，倒是第一次去太興。太興環境舒適，走高檔路線，如果有 wi-fi 就更為理想。看看餐牌，全以套餐為主，晚市款式比酒樓還要貴 你相信這是手打多士嗎？麵包鬆軟，但沒甚麼特別，吃不出是手打的。奶醬查得均勻，滿是花生粒粒。只有小小四片，$24 連餐飲是偏貴。柑桔蜜，本期望是酸酸甜甜的柑桔飲品，意想不到竟然是咸柑桔。當天我沒有感冒，喝咸柑桔感覺怪怪的，只喝了半杯便放棄了。茶餐廳格局，酒樓價錢 ，寧可正正經經去酒樓吧。