富臨皇宮 (已結業)

依家夜晚禁堂食, 所以都買多左外賣啦~最近聽朋友講富臨勁抵, 好似仲平過5折,  D 餸最平$37已經有得買, 好經濟, 所以都買左2小菜, 1個揚州炒飯~今次叫左揚州炒飯、菠蘿生炒骨、日式什菜煲~揚州炒飯入面好多料，包括：飯、叉燒粒、蝦仁、雞蛋、蔬菜粒等等，飯炒得乾身又好食!菠蘿生炒骨碟底完全冇多餘既汁同油，所有汁都包住排骨，而且食落新鮮脆口，不油膩，酸甜適中，好好味～日式什菜煲入面有幾款菜，清清既湯，食落健健康康，入面仲有粉絲，有飽肚感～最後埋單先至$127，超抵食！！

最近6點之後都冇得堂食, 唯有買外賣啦~有日經過富臨發現佢地勁抵, 成48折, D 餸最平$37已經有交易, 抵到呢..仲要冇菜位冇加一. 今次叫左:揚州炒飯、花膠紅燒豆腐、蕃茄牛肉蛋~揚州炒飯多料多色，入面有: 有白飯、雞蛋、蔬菜粒、叉燒粒、蝦仁等等，D 飯炒到粒粒分明，食落齒頰留香!花膠紅燒豆腐真材實料, 入面既花膠真係好好味, 而豆腐滑溜, 好食.蕃茄牛肉蛋都唔錯, 蛋夠香, 牛肉份量都唔少, 而且蕃茄健康又有益, 食落好開胃~OVERALL , AROUND $130, 真心抵食. 下次再食其他野先.

第一次喺呢間嘢食午餐，位置優越，方便帶家屋企人去食。安排我們坐喺最遠的山旯啦位都算，劃點心紙要用我地枝私家筆都算，d上菜侍應自己都搵唔到張枱，重要當面發我地脾氣，講d好悔氣嘅說話！埋單時收銀嗰個人又俾插隊嘅廢老俾錢先，明明佢見到我地排隊先。佢係咁意同廢老講人地排隊先就算，單就同佢照埋!我係俾信用卡埋單，我見佢埋完單又冇講嘢，卡同單都一齊俾返我，我就準備走。點知個收銀勁大聲吆喝「喂！你去邊！你去邊！」 嘩 唔講我以為我自己食左覇王餐呀原來係冇簽名姐，大佬你頭先又冇叫我簽名，正常人收齊單同卡都走啦好啦 咁我留低簽名，你筆又冇俾我係想我自己喺袋度搵枝筆黎簽？一句講晒，不知所謂，態度惡劣，冇下次！

去富臨食飯而家有coupon 送，食滿$300減$100，最多可以用5張。無coupon唔緊要有個好平既餐牌，不過只能揀1款。想叫個片皮鴨食，但佢無得兩食淨係食皮無肉我又覺得唔係咁好。如果佢可以加錢兩食就好好多。

昨晚與媽媽去了土瓜灣富臨，真係難以想像一間大集團會有咁嘅水準，首先門口服務知客不見人，等了一陣，原來佢去咗幫收銀，ok她忙可以理解，我等一下，帶我進去入咗後，茶水供應都好快，但係叫服務員點餐就叫我等等等...我想等甚麼呀，原來等穿黑色西服的服務員寫單，寫單是否可以禮貌叫客人講菜名，不是說號碼，咁你張菜單寫號碼做咩，不如寫1234算吧，最後叫了5個餸，第一度乳鴿味到入味，但係一上菜我唔見有調味料，問個服務員，佢話師父說夠味，之後就咗去，之後來的餸真係夠晒味，超咸、超咸、超咸。青瓜海蜇就冇味，食物極度超難食。最後出去找數真係配服現在啲收銀，我有優惠卷，見到我揸優惠卷及現金，二話不說（你可以用2張）收2xx,我心諗連張單都未見過，點解我要比錢你，叫佢攞張單睇就比面色你睇。我以後都唔會再去，我返天水圍富臨。

因為疫情關係唔可以出外攪聚會，我們幾個好朋友就去左住在土瓜灣欣榮花園的同事家打麻雀，近晚飯時間要醫肚，朋友說商場富臨皇宮因肺炎疫情，推出指定外賣食物有折扣，平左好多，大家都同意買些回來大家食。外賣菜式都唔錯，有小菜、燒味、小食、主食等，全部都有折，價錢真係抵過自己煮。韮黃蝦仁炒蛋，蝦仁爽口，炒蛋滑嫩，加左韮黃更好味！魚香茄子煲，加入肉碎和少許咸魚碎做成濃濃的醬汁，味道鹹香，茄子林滑，伴均勻醬汁食好惹味！生炒糯米飯，糯米飯軟硬度剛剛好，用切碎的臘腸和蝦米炒，口感軟糯，香口又夠味。

今日公司太多嘢做，放工已是晚上8點，諗住買外賣回家食，同事說富臨皇宮做緊外賣優惠，。我就同佢一齊去佢屋企附近的欣榮花園分店買回家試下。外賣餐單都有好多選擇，小菜抵至四八折，燒味七折，部分菜式六折，酒樓大廚製作咁就真係好抵食。現場都有不少人等緊外賣，菜式都好受歡迎。點菜比錢後，等左一陣就煮好，而且包裝妥當有得拎。菠蘿生炒骨，一道色、香、味俱全的生炒骨，不但顏色好看，而且美味可口，排骨表面炸到酥脆，再加糖醋醬汁，酸酸甜甜的味道增加不少食慾，另外還加入菠蘿一起炒，不但能增加果香味，而且也能中和排骨的油膩感。北菇海參扣鵝掌煲：這是一度上等菜式，有滋陰養顏，抗衰老的功效，冬菇、鵝掌和海參都炆得好入味，冬菇爽口，海參和鵝掌富膠質，非常惹味！瑤柱金菇炆伊麵：份量都好多，伊麵炆得比較乾身，不會油膩，軟硬適中。加入金菇增加口感，瑤柱增加鮮味！

間間酒樓也有燒鵝瀨, 但平常來說二十幾元是常識吧。$17.8仲要皮係脆既, 不是太難得嗎？坦白說這樣的價錢勝價比是十分高的。不過湯就味道不是特別出色，但依這個價而言，收貨了。櫻花蝦煎薄撐： 薄撐加入櫻花蝦比較香口，薄撐脆得來亦不熱氣。

人到中年病痛就開始多，我條腰骨赤赤痛，跟人介紹去到呢個區嗰度搵一個隱世中醫，醫完條腰之後就嚟到呢間酒樓，買兩個飯盒，去朋友屋企度食。我唔知朋友鍾意食乜所以我就叫咗同我 一樣都係 「切雞燒肉飯」 我諗應該個個都會啱食。sorry, 因為朋友屋企嘅燈光比較黃，所以影出嚟呢個飯盒都係比較黃。我嗰盒切雞燒肉飯，一見到就好開心因為有好多蔥油，不過再細心睇，就開始唔開心，因為切俾我嘅雞肉全部都係背脊位， 真係冇乜肉，雖然有人話個背脊位係會香味啲，不過我都係鍾意食肉多啲，雞皮都薄，但係肉質就比較嚡; 食一嚿燒肉都真係不得了，因為真係好咸， 而且豬肉嘅皮唔脆口，肉質都係嚡，真係very not tasty.

新裝修後第一次光顧,發覺食物素質稍為遜色了,胡椒豬肚湯沒有湯,而且鹹菜多過豬肚,只有數片豬肚而已, 菜苗餃的皮糊了,口感太差,饀料又沒有味道,好淡,燒賣和鳳爪不過不失,豬手最出色,炆得好軟熟,充滿著南乳味

年三十晚食團年飯，只有套餐可以𢵧，$1888，連條魚都冇，得幾件魚塊同魚腩，蟹肉扒魚翅衰過海皇羹，只食到雪藏味嘅漿糊。大蝦伊麵D蝦細過中蝦，伊麵淋到就溶咁。鮑魚都差過大排擋，又凍又唔新鮮。呢D皇宮應該都係做旅行團生意，街坊無奈地接受。唔想嘥時間寫200字，但係又一定要比個最差嘅評分佢，冇理由一間咁差嘅酒樓剩係得啲好嘅評分，真係唔想再有街坊中伏，呢啲酒樓應該只有生存空間淨係照顧大陸遊客，附近還有更好給街坊選擇

蝦餃燒賣, 我覺得正正常常無特別。雞札幾大件, 足料。叉燒腸有好多叉燒, 皮薄, 唔錯。福建炒飯都算多料, 竟然有帶子粒添, 但成碟飯都無咩味。芝麻流沙包都有, 但我凍左先食, 已經唔流了 (亦唔知本身流定唔流), 唔太甜, 幾好食。

今日約咗契媽同契老豆係佢屋企附近食個晚飯。佢揀咗依間酒樓，因為貪佢可以坐得耐。我地叫咗個堂剪BB豬半隻、瑤柱金菇扒豆苗、野山參燉水鴨、離唔開有白飯同啤酒。瑤柱金菇扒豆苗：由於豆苗當造，所以好幼嫩，易入口。配上瑤柱，對鍾意食菜既人，值得推介。堂剪BB豬半隻：見到佢令我諗起新年或者生日，睇賣相已經覺得豬皮好脆，食落去暖暖地，皮堅好脆，肉味鹹鹹地得黎腍，好惹味，食得多有點膩。野山參燉水鴨：對我嚟講好抵飲，大約會有8碗湯之餘，仲有湯渣。 湯渣有半隻鴨、瘦肉同其他藥材，所以飲落去有藥材味之餘仲飲到原汁原味。個度啲姐姐話每日限量供應，賣曬就冇啦。

兩條窮L由紅磡行到土瓜灣，開始肚餓但唔知食乜鬼嘢好，跟著見到富臨依間野，兩個你眼望我眼，四條腿走左入去食個晚飯~~~我地2個人夾埋得番$200，所以只叫咗個菠蘿生炒骨、豉汁蒸大鱔同2碗白飯。菠蘿生炒骨：有鑊氣，生炒骨啖啖肉，超香口，配上新鮮既青椒、紅椒同菠蘿，掛上酸味味嘅醬汁，味道好夾，好開胃。豉汁蒸大鱔：膳肉多到嘭嘭聲，即成碟滿，膳肉肉質夠厚，但略嫌新鮮。我地非常喜愛大膳嘅豉油汁，咁樣，我地食左一碗飯。

富臨一間超多連鎖店的酒樓，差不多區區都有。今次我惠顧的酒樓位於土瓜灣，此酒樓推出不同套餐，如BB燒豬，買一送一大閘蟹，特價孖寶（燒鵝加一斤白灼蝦），只可選擇其中一項，另一項就要回正價了。孖寶，燒鵝，來到的是燒鵝的下莊，噢，燒鵝脾啊⋯⋯好好味呀。推介指數：9/10孖寶，白灼蝦，睇得出是新鮮的，都幾大隻，好好味。推介指數：9/10大閘蟹，季節限定，全部是公，正價$48隻，多糕，約三兩，算係咁上下啦。推介指數：8/10