川粵小食 (已搬遷) 新店位置

見呢間舖開咗一排都無幫襯過，終於今日有機會。入到去，有個中年uncle黑口黑面，望住電話就走咗出去舖外，廚房內還有兩個年輕啲嘅男子喵一喵我亦無理我。見menu推介，就隨意地order咗個「鹵水雞翼溏心蛋飯」。【食物】雞翼幾好味。Thats all。隻溏心蛋係剛從雪櫃攞出來冰凍嘅蛋配熱飯感覺惡劣。下午茶茶送豆漿一杯，但係紙杯上。【賣相】發泡膠飯盒堂食。隻壓扁咗嘅蛋出嚟已經爆開咗啲。有兩樣嘢我係特別對香港嘅各餐廳好不滿嘅地方：（1）無提供紙巾，或要買。餐紙其實同筷子一樣重要，要人分開買餐紙係  極  賤  格  嘅表現；（2）一切如杯、碗，等餐具用  即  棄  ，最唔環保。食物差。服務無。極不環保。一定唔會再去。

呢間小店其實都幫襯左大半年，主打川式米線及飯，平均三十幾蚊，以材料味道嚟計絕對係誠意之作。早排見佢地開埋夜市，夜市祇做川式乾鍋及串燒，就先試下佢地嘅乾鍋。兩人餐可選三葷兩菜，肉類有豬大腸、肥牛、雞軟骨、魷魚鬚、排骨 ......（仲有好幾樣）；而菜就有金菇、蓮藕、豆角 ......（又係仲有幾樣），另送飯同汽水。味道有孜然（唔辣）、香辣及麻辣，當然可揀大中小微辣啦，今次我就試大腸、肥牛、魷魚鬚、豆角及蓮藕，麻辣小辣。雙人餐個份量都好足下，除左揀嘅材料外，仲有洋葱同蒿筍，味道唔錯，夠惹味，麻辣度適中，配飯無得彈，絕對會番轉頭幫襯。唯一唔好就係間鋪太細，得兩個堂食位，不過見到佢有摺檯凳，可能夜 d 會有開埋堂食掛？

四川肥牛麵口淡淡想食米線，叫左四川肥牛米線小辣，出面街食開果d通常肥膏同肉各一半，呢個明確少膏，肥牛係真係好食👍🏻，但湯底較淡，唔明四川點解可以甘淡😂😂

次次經過都買來食，好好味。口水雞好食，個汁有D麻，但又吾係好辣，好有四川當地小吃架味道。因為之前食過其他鋪架口水雞，覺得只係得過辣字，一D都吾好食，但哩間好食，而且價錢又吾貴，好值得一試，又有水準。

每次經過都會食.超好味柴灣小食越來越小，有一次和仔仔經過就試下，真係好好食！之後耐左老闆都好親切！現在有時間就會去食/叫外賣返屋企食！值得一試！價錢都好平！所以介紹比大家

黎過呢到食米線都好多次啦，平均每個星期都會黎一次，好多時都係外賣，貪佢呢到快靚正。只要係whatsapp落完單之後出門口，行到店鋪就有得拎。值得一讚既就係send 完個whatsapp msg 後，唔洗5秒就會有人reply你，非常efficient。呢到係小店，得4個位，所以大部分客都係叫外賣。我自己食過抄手，口水雞同墨魚丸米線，全部都好好食，墨魚丸好彈牙，抄手皮薄餡靚，口水雞好滑。餸雖然只有一款，但係份量都幾多，大約等於一般雲南米線店既兩餸咁，除此之外，仲有好多菜，呢樣係港式餐廳真係好少見。湯底方面，我試過小辣亦都試過中辣，本人覺得小辣唔夠辣，中辣又太辣，所以要求過小中辣，呢個辣度對我黎講真係剛剛好。飲品方面，只要加3蚊就有啦，好多時我都係叫熱豆漿，豆味濃，熱度又剛剛好，冬天飲真係最適合。