思想共鳴 (已搬遷) 新店位置

ғᴏᴏᴅɪᴇ ᴛɪᴍᴇ 今次食咗思想共嗚💛鮮茄烤雞螺絲粉($58) 佢既份量都幾多😆不論雞肉定螺絲粉都係🥰蕃茄味都好濃，有啲酸咁，唔係好甜🍝 螺絲粉係比較細個款，煮得都幾淋，溝埋啲醬都okay! 雞肉都幾多，肉質都幾嫩滑，唔會太鞋🙈🤩整體來講都幾抵食，lunch set 仲包一杯熱茶🫖

星期三係佛誕唔使返工，當然唔可以錯過星期二晚可以夜瞓大玩特玩嘅機會啦！所以約咗朋友收工後一齊去食好嘢。朋友好嘴刁，揀咗呢一間店試食，結果好喜出望外💛💛💛我哋一收工就趕過去，大概6:50到，已經有人排隊等堂食。我哋要等兩張枱，員工好貼心咁幫我哋留電話，等我哋可以去附近行吓涼下冷氣，唔使喺出面等～等左20分鐘就有位。我哋叫咗羊架（加$10配薯蓉），龍蝦汁海鮮飯，英式鮮奶紅茶同埋柚子茶。羊架有3件，比較多肥膏，但好香唔會好羶，配嘅黃芥末醬汁都好夾。特別要讚嘅係翠玉瓜同埋薯蓉真係好好好好好好食！！！！本來我同朋友好糾結嗌薯蓉定薯條好，真係好開心嗌咗薯蓉嚟食大家一定要試吓！龍蝦汁海鮮飯正正常常，都有唔少海鮮料。兩杯飲品都唔錯，夠凍啱哂喺呢度一定要讚下餐廳嘅員工好貼心同好有禮貌，成餐飯都食得好開心呀

📍卡邦尼意粉🧡煙肉夠多美中不足是沒有蛋汁芝士味亦偏鹹 但份量以下午茶來說是非常多📍忌廉蘆筍煙三文魚螺絲粉🧡❤️🧡❤️煙三文魚嘅份量較少但蘆筍非常柔嫩忌廉汁creamy得來 不會太搶味出色！螺絲粉細細粒方便咬📍Cappucino ❤️🧡❤️🧡❤️🧡斯里蘭卡水洗豆香味濃 冷熱的溫度剛好拉花又漂亮 是一杯用心的咖啡欣賞咖啡師的認真👍🏻📌食物新鮮製造因此需時等候不過今日放假 所以等耐啲又食到美食 就唔緊要啦📌歌單係好耐冇聽過嘅親愛的黑色又有周爸爸腎仔 ❤️很親切呢

第二次幫襯，因為要喺附近等人先入嚟，Full House留左電話，過左唔洗半個鐘就打嚟有位，很好～因為唔餓，叫左啲小食同飲品，估唔到食物味道有驚喜，唔好睇個薯蓉平平地$18，一啲都唔馬虎，好足料好夠味，有火腿、洋蔥、黑椒，而黑椒味唔會太搶，非常啱我！芝士焗野菌西蘭花椰菜花當然都好夠味，仲食要有蒜香😋😋可惜嘅係我飲得比較多水，一杯飲品個量都稍少，同埋未見有好特別嘅飲品抵飲，呢方面店家可以諗諗新野。有機會會隨時嚟～

今日黎到新蒲崗接朋友收工，順便喺度食埋晚飯。朋友向甚少踏足新蒲崗嘅我介紹左間抵食西餐，估唔到真係幾好食！基本上佢地嘅餐點份量都好足，啱晒大食嘅我😆呢個龍蝦汁海鮮意大利飯真係冇得輸🥲每一啖濕潤兼口感恰到好處飯都充滿着濃濃嘅龍蝦味🤤海鮮都好鮮甜爽口，有齊墨魚，青口同蜆肉！墨魚汁帆立貝墨魚意粉都唔錯，海鮮同樣係大隻兼爽口，意粉係我鐘意嗰種有咬口嘅口感，但我個人黎講會覺得龍蝦汁意大利飯會有驚喜啲😆另外亦嗌多左個黑松露薯條，薯條係新鮮炸起，熱辣辣，黑松露醬尚算濃味蘋果山楂茶飲落機潤，唔會過甜，飲到有好多山楂肉，證明幾真材實料🤣桂花烏龍冷泡茶就飲落有啖啖嘅桂花香，用作解膩都唔錯

新蒲崗我就真係好少去啦❤️❤️❤️既然少來梗係搵啲特色嘅食物去食啦上網好多人推介呢間黃店咁我就嚟到試吓啦👍🏻👍🏻👍🏻去到門口已經排咗一陣隊啦咁多人排我諗佢嘅味道質素都唔會差得去邊就咁睇啲裝修都OK幾靚嘅等咗20分鐘就有位咁我就拎起個餐牌睇我就叫咗兩個餐第一個就係菠菜忌廉汁煙三文魚大蝦意大利粉HK$68 呢個口感都幾清新同埋健康啲佢嘅忌廉汁配埋三文魚個口感都幾出色比較少係街道食到呢種口感❤️❤️❤️之後我就叫咗個 日式海膽煮蟹肉配意大利飯 配軟殼蟹HK$98 呢個份量真係好多 而且我個人都比較鍾意食軟殼蟹 佢即叫即整嚟到熱辣辣 真係好有口感👍🏻👍🏻👍🏻總括嚟講我下次都會再嚟食

這間小店的空間不大，只可容納十餘人，平日午膳時間很快坐滿。店內樓面只有一至兩位年輕人負責出餐和制作餐飲咖啡，所以在繁忙時間的出餐時間會較長。但年輕人非常有禮貌會主動跟餐。食物方面，這次點了煙三文魚沙律，豚肉泡菜餃子配壽喜燒烏冬。沙律醬比坊間的凱撒沙律醬杰身，幾好食係輕食之選。餃子香脆，烏冬正常發揮。飲料點了Long Black和Cappuccino。Long Black連酸和幾近沒有Crema，較之前幫襯時遜色。Cappuccino不太甜，朋友表示不錯。整體飲食不錯，非常值得支持

第二次來食lunch了～今次自己來食叫咗菠菜忌廉汁三文魚蝦意粉包埋一杯茶都係$68咋～上菜過陣新鮮滾熱辣～見到係啱啱整好嘅出曬煙～意粉同餸嘅份量都好夠 食落除咗三文魚同蝦之外仲有啲蘑菇！呢個價錢來講真係非常抵食！而且店員服務態度都好好～不過我覺得如果意粉可以再入味啲就更加好～呢個係上次同friend來食嘅時候就叫咗墨魚汁意粉～亦都係份量非常之足夠，不過我都係希望如果意粉可以再入味少少就好喇～但總括來講以六七十蚊嘅價錢，有呢個質素同服務已經係性價比高💛

呢間十分推介！！食物好多款，而且唔貴又高質素～西冷扒五成熟剛剛好，有肉汁，個醬汁都幾香😋意大利飯有青口、蜆、蝦，份量都幾足，三個人每人少少岩岩好！最推介個牛脷！！好香好juicy，肉質好有口感，煎到表面微焦。開頭一嚟到覺得個樣好似鵝肝。個燒汁豐富左個味道😋😋雞翼我鍾意辣味多啲，個汁好惹味，不過我朋友就覺得冇檸檬咁入味～薯條好實淨，啲醬有少少甜味，都好香黑松露味😃三個人食咗$395，覺得好抵食😁😁值得再去支持！

一直想試呢間cafe，終於同同事去咗食喇🥳 店入面有好多文宣，仲播抗爭歌同好多晴天林嘅二創歌xd🍝 菠菜煙三文魚大蝦意粉 （$68）估唔到意粉份量都幾大，同埋好香，會不知不覺食晒全碟😆 煙三文魚細細塊有好多塊🍣 大蝦有兩隻🦐 呢個價錢都幾抵😚💛🥃☕️ Whiskey chocolate (+$28)跟餐可以揀一杯英式早餐茶/ 伯爵茶/ 苿莉茶，但我見呢杯whiskey choco咁特別就想試😆 杯面有一層泡泡，撈埋一齊先飲。 估唔到佢whiskey味都幾重，但好香，我覺得好好飲！

由於新蒲崗係工廠地區所以中午放飯時段都好多人，不過一入夜顧客就少得可憐🥲之前牆外pepe俾人塗鴉，但店主霸氣回應：噴漆可蓋不了自由的思想見到餐廳門面已經值得衝入去食，見到角落亦有好多義賣靚靚飾物💛.👓菠菜忌廉汁烤雞螺絲粉 $58首先，份量都幾大份！螺絲粉係果隻偏細粒形，不過份量多，但煮得稍為淋左少少。加左豆苗，有好多塊雞件，不過多左少少雞皮。都幾多配料有菇菌煙肉翠玉瓜粒，忌廉汁底不過唔係果種超稠同creamy。評分：7/10👓黑松露野菌煙肉意大利飯 $78份量同樣好大份，配料同樣有菇菌煙肉翠玉瓜粒，因為係忌廉汁底所以整體感覺似上面個烤雞螺絲粉，可留意返一齊叫依兩個食會幾漏😳不過個人覺得意大利飯較為夾味整體好食啲！評分：7/10👓set lunch包熱茶一杯 (Latte 補差價$17)有個靚靚拉花，飲落夠奶奶泡夠厚咖啡味出，係好飲！評分：7.5/10

忌廉汁帆立貝大蝦意大利粉Price：$68📌忌廉汁幾Creamy😛帆立貝同大蝦數量唔少足夠餸哂成兜意粉😚大蝦爽口彈牙👍🏻配埋d菇超級正🥳呢個價錢黎講絕對唔話得🤩btw小妹唔中意d菜🤢好green好大陣草青味😭日式海膽煙三文魚炒飯Price：$90📌炒飯最緊要粒粒分明同夠鑊氣😋佢地呢方面做得好好✅炒飯好香🤤煙三文魚切碎係炒飯當中，食落有陣煙薰味相當唔錯😍可惜就係海膽份量較少，只得頂頭個點🥺一路食一路諗會唔會放係裡面🥲

睇檸檬地圖搵到佢，真慚愧住喺附近都唔知，一個人走來試吓，一踏入門口就好有親切感...海報，擺設，音樂都啱哂feel. 點左個龍蝦汁海鮮意粉同一杯Long Black。個汁夠味唔太稠，海鮮唔係乜珍貴靚嘢但唔駛80一個餐我完全收貨，正所謂有蝦有蜆你仲想點！意粉質地啱啱好，上面沈執溫室豆苗喺面靚靚仔仔。杯Long Black 仲有驚喜，輕焙咖啡有果味花香，帶微酸但唔係澀，成件事一個＂和＂字。一邊品嘗一個簡單而美味嘅午餐，一邊欣賞周圍嘅擺設同海報…信念，堅持，憤怒，失望，加油，乜鬼感覺都湧晒埋嚟！ 好想坐耐啲可惜有下場。下次必會再嚟，寫寫而家已經想再去。

一開始看到舖頭名，完全聯想唔到同意粉有關係，但好多人推薦呢間良心小店，一定要支持下。鋪頭真係唔大，我地等到一張面壁的高枱。意粉定價好合理，仲包埋一杯野飲。好欣賞意粉汁收得剛剛好！意粉軟硬度都好適中，不過海膽有dd臭味，但好輕微，整體個汁都係好味，反而d冷藏海鮮就好普通。意大利飯同樣收汁恰到好處，味道非常夠，粒粒入哂味。不過意大利飯嚟講可以硬返少少，飯裡面混了洋蔥粒、翠玉瓜粒同菇粒，我好鍾意，令飯質地唔會太單調。係一杯nutty的咖啡，送濃味pasta唔錯。

6點禁食堂，唔知佢有冇開，見網上有電話就WhatsApp 問有冇開，順便問埋menu睇。落巴士前15分鐘落單，一落車就有得拎。日式海膽煮蟹肉意大利飯配軟殼蟹拎返屋企都要15分鐘，但啲飯依然好夠熱，軟殼蟹依然好夠脆，冇被倒汗水影響到。意大利飯正宗嘅煮法係偏煙韌偏硬，會食到好哽胃好濟。但佢呢度煮法有啲唔同，食晒都唔會好哽胃。啖啖飯都有紫洋蔥 翠玉瓜 雜菇，重點係蟹肉！個汁唔算咸，幾條菜啱啱可以平衡返，唔會越食越’漏’，附送茶包慢慢嘆。