文華饕記 (已結業)

今日黎左文華幫襯 食物超高質 幫襯左佢個常餐 茄米粉同蛋，員工態度好好，食物又唔算貴 $50到 奶茶沖到香港本地味道！讚呀 一定要黎試下 我下次都會再幫襯 可能會試下佢個takeaway

晚餐：清蒸河鮮 －沙巴 ＄98 (跟中湯或飲品)開邊蒸，易熟肉質剛好，有魚味，但沙巴魚肚位超多細骨，食時要小心我真係好鐘意食啫喱狀物體，魚皮就係之一，送飯一流。而我亦係要有米氣既人，最鍾意食飯，d 飯粒都ok 啦，以茶記黎講算唔錯，唔會話「生骨」义燒炒蛋飯 $68 (同樣跟中湯或飲品，凍飲+ $3)d 雞蛋真係炒得太老啦义燒質素一般，件頭多，义燒好大舊，但唔夠香，以茶記黎講都係唔夠香，同埋义燒應該有少少蜜味或者甜甜地，呢款就偏鹹跟餐中湯幾好飲，一星期每日唔同，今日係清補涼豬骨湯，可以去濕。順帶一提，我一值以為自己虛寒唔飲得清補涼，原來唔係嫁，清補涼係大眾湯水黎，當然啦，都係問番你自已既中醫師。講番個湯，個湯幾足料，幾清甜，跟餐黎講都算有驚喜。茶膽幾香，唔澀，唔錯晚餐都好多選擇丫總括，可能今晚人多，所以上菜有點慢，亦因為人多，餐廳樓底又唔高，所以感覺有點嘈。而食物質素就中間啦。

最近多左係灣仔食飯就愛上左黎文華饕記懲罰我比較中意佢地既早餐大推蕃茄牛腩粒米粉蕃茄似羅宋湯底有大量蕃茄碎 椰菜 西芹個湯底仲濃過岀面餐廳既西湯米粉又超索湯牛腩粒又大粒 又新鮮 勁重牛肉味完全唔係hea你既牛肉碎真係一試不可收拾餐配既炒滑蛋夠滑 又有蛋汁重點配奶油脆豬都唔洗加錢 即叫即烘成個餐連熱飲都只係 $38我次次早餐都係嗌呢個😭😭 大份足料又扺食有次去食 仲聽到佢地既bgm係願..歸香港多謝你哋🥺🥺另外都有嗌過佢地晚市小菜以茶記黎講 已經做到好好有鑊氣 足料大份雜菜煲大到食唔哂包湯/餐飲 湯都正路 感覺無味精 又有湯渣價錢又合理價錢又平 地點方便就腳解決肚餓一流一定會繼續懲罰💛

噚日(23-9-2020 Wed)朝因公事嚟呢頭,咁就可以同返中環嘅老公一齊出嚟,辨完公事就食早餐,前一晚search定附近嘅黃店,正正喺克街有呢間,我哋都要$38.00嘅港式早餐A同B,老公加$3.00要凍檸茶,我要熱檸水.兩杯嘢飲到嚟,正常冇問題嘅.之後係老公嘅牛腩粒番茄湯米線到嚟,睇見番茄湯都幾杰身,米線鬈鬈地嘅,佢一個人食晒,我完全冇試到.我嘅粟米叉燒通粉要等一段時間至到嚟,而兩份炒蛋同奶油豬仔包都到嚟,咁我食炒蛋同奶油豬仔包先.炒蛋正常冇花巧,亦冇乜落鹽;奶油豬仔包,個包有烘脆,錬奶多,比較甜.到粟米叉燒通粉喇, 粟米唔多,叉燒係全瘦,通粉,呢啲一般.環境:九成係可以坐6人嘅卡位,好闊落,冷氣開得好夠凍.抵食係2.5分題外話:間舖啱啱播黃家駒唱嘅光輝歲月,從未試過有餐廳會播佢嘅歌.

Lunch淨係飲咗抔咖啡，到3點有啲肚餓，又唔想食太飽，行到去克街，見到有下午茶包餐，一於試吓。平時茶記豬扒包就見得多，雞扒包比較少見，就叫咗個懷舊雞扒包（走醬）、熱檸茶。個包個樣唔錯，有少少生菜同半塊番茄。個包唔太脆，但都熱嘅，係塊雞扒有些少‘鞋’，又未去到‘檫子膠’，廿八蚊個餐，ok 啦！

最近去多了茶記，繼續於灣仔尋覓街巷地道小食。點了兩味推介的中式菜—水煮牛肉鍋、菠蘿京都骨。水煮牛肉鍋滿滿都是辣椒很重口味，唯獨牛肉反而淡淡的沒有很吸收到味道。最喜歡還是京都骨撈飯吃，酸酸甜甜又開胃！

今天特意來呢間茶記食下午茶試咗呢款雪山西多士上面滲咗白色糖粉同埋朱古力醬食物造型同口感都可以大熱天時間飲返杯凍鴛鴦係香港人好鍾意嘅下午茶之一茶記環境同服務都唔錯於是買埋外賣飯盒做晚餐雪山西多士+凍鴛鴦咸魚雞粒炒飯+霸王花湯

相約朋友於灣仔食個中午快飯, 因此選了文華饕記, 午飯時間都要等一陣位。午餐有A至H餐選擇, 亦可選擇常餐或特餐, 選擇不算很多, 但看起來都很吸引。<<文華雞扒意粉>> HK$55掙扎了一下, 我選了F餐, 是雞扒配意粉伴以大量蔥油, 蔥油十分香, 用來拌意粉竟然好夾, 雞扒煎得香脆, 肉質嫩滑, 簡單的配搭已經好味。<<特餐-黃金雞扒司華力腸湯麵>>朋友選了特餐, 是邪惡的香煎午餐肉、雞扒、炒滑蛋以及牛油多士的組合, 麵是另上, 不會把食物浸淋。要讚的是, 覺得服務好好, 儘管店面很忙, 店員都會儘快處理食客的要求, 而且態度很好。

今日lunch 要食個快既，又黎到文華解決叫左個蘑菇汁炒滑蛋牛扒飯 $58炒滑蛋好正，好滑又好流心，蛋味好足又大份，正👍🏻👍🏻👍🏻個牛扒又大大舊，又夠厚，以茶記既牛扒黎講算唔錯，食肉一族岩曬👍🏻👍🏻👍🏻而磨菇汁又有驚喜，唔係d好假既汁，磨菇味好好味，值得一試😍😍另外杯奶茶，都出奇地好飲，奶同茶比例剛剛好，奶茶既粉絲一定不容錯過😍😍整體來講，質素中上，黎到附近一定要食💪🏻💪🏻

今日約左朋友一齊去文華饕記食lunch 為左避開lunch time 人潮 所以我地12點就去到~唔洗等位就入得 我同朋友都叫左同一個常餐黎食 懷舊風味沙嗲牛肉麵 配鮮奶炒滑蛋+蒜蓉多士 ($48) 配熱飲😋真係未試過食過一間茶記既沙嗲牛肉麵係有咁多舊牛! 同埋個沙嗲湯都好香😋! 配埋個滑蛋同焗脆左既包真係好滿足!介紹埋我上一次食既另外一個常餐先 – 雜菜牛腩粒鮮茄湯米線 配鮮奶炒滑蛋+蒜蓉多士 ($50)同沙嗲牛麵一樣又係有超多牛粒!超足料! 個湯底蕃茄味好濃~

返工前去搵間茶餐廳食早餐，文華饕記響做嘢附近，因為實在太方便。😂😂除左方便，其實間茶餐廳最出名就係牛腩粒蕃茄通粉，所以黎到灣仔一定要試😂😂蕃茄湯底唔同好清新，因為無落茄膏，比起其他茶餐廳更加健康，湯底有好多配料，牛腩粒好淋，煮得夠耐。奶油豬好脆，但奶比較少，如果加多啲就會好好多。而個蛋好有蛋汁，炒得唔會太老，加埋落蕃茄湯底好好食，蕃茄同炒蛋個味道真係好夾，所以大家黎食早餐，一定要試佢呢個招牌早餐👍🏻👍🏻

行街行到肚餓，咁岩經過灣仔，見到有間茶餐廳有好多人排，於是去試下😊間餐廳原來有兩層，等左一陣就有位，雖然餐廳好多人，但都有卡位坐，坐得舒適。佢有個特餐，好吸引，牛腩粒蕃茄湯意粉，仲有奶油豬同炒蛋，好抵食。👍🏻牛腩粒好軟，夠哂淋，又唔肥，蕃茄湯都好出色，好濃既蕃茄味，唔會太咸，飲完個湯底都唔會口渴👍🏻👍🏻奶油豬如果煉奶可以多返少少就好喇，佢牛油都塗得好好，而炒蛋份量就少左少少，但炒得唔會老，好有蛋汁，大家黎食既，可以試下個特餐，真心唔錯😋😋

咁岩係通利拎完飛，又想食港式小炒就揀左佢，食過下午茶幾好，所以就試埋夜晚嗌左一個散叫既啫啫菜煲（set有芥蘭但唔中意），所以貴幾蚊唔要set轉菜心，一個跟set既豉椒炒蜆同散叫既西炒飯。因為set有個湯，估唔到會無味精，完全係用時間煲出黎🤤個菜煲入面就有蝦乾，上枱熱辣辣仲好香，只係食到尾有少少油個蜆就真係入哂味，個汁好香，唔太細碟所以真係好抵食！唯獨係無影相既西炒飯…為左顔色？落雜豆，唉，浪費左炒得咁香既飯😭無就好了

◦•●◉✿✿◉●•◦😋: 𝟟.𝟝/𝟙𝟘💭: Oswin最鐘意食肥仔野🤤 🍗即炸雞髀食個時仲出緊煙，有肉汁，仲要拼薯角+沙律，好味～雞扒撈麵今次叫咗XO醬個味唔係太啱食，如果瑞士汁應該好味啲🙈 最後係勁邪惡既芝士流心西多士，食完即刻肥幾磅🐽🤣 ◦•●◉✿✿◉●•◦

在灣仔做完嘢要醫肚，在附近覓食。見到呢間名店，當然要一試。可能冇乜期望，反而有驚喜，比起另一間上市公司X 華好得多！叫咗咖喱牛腩飯同雪菜肉絲米加多士炒蛋。咖喱牛腩飯個汁好味，但飯就一般，如果煮得好味D 就更好。雪菜肉絲米不過不失。蒜蓉多士外脆內軟，夠蒜味，抵讚！炒蛋就一般。環境及服務都合格，茶餐廳黎講算坐得舒服，服務夠爽快，上菜速度亦快！電視勝在播港台節目，唔討厭！如果純粹想醫肚，坐得舒服又唔使諗，去呢間文華唔會出錯！