日月星快餐 (已結業)

剛剛睇完之前的食評，見在家附近，所以今天去試一試叫了一個外賣(下午茶)---炸雞脾+火腿三文治+柯華田=$16三文治和平時的沒分別但那隻雞脾真的好好食!!!如果不計kfc那些雞，我都不知有多久沒有食過炸雞脾了。但真係好好味，肉又唔老，而且皮又脆，真的是脆卜卜呀!!!kfc那些根本不能和這間比較，kfc那些太乾了。由於我是即時外賣，所以不消五分鐘就行呀!!PS: 這間店都是建議外賣較好呢~~

去日月星食飯最好等秋冬時份先去(外賣另計)。食物正，尤其是炒野。奶茶同咖啡都好夠濃。十分不錯。

今日我諗住打去叫佢送外賣下午茶,雖然只係30幾蚊生意仔,但估唔到佢地的態度會咁差,我打去的時候佢話半個鐘到,我心諗都ok la,打電話的時候係4點4,但等到5點3重未到,我就打電話去問下,佢就話送緊ga la,跟住等到5點半重未到,我就火都黎埋,我想食個下午茶,成個鐘都冇得食,我又打多個電話去諗住取消,佢竟然話煮都要時間la,要9個字至一個鐘先得,我心諗依家成個鐘都未有la,但勢估唔到竟然cut我線,結果5點8先送黎,送到黎的時候,我杯汽水d冰都溶晒,我都勸下各位真係要三思,堂食環境絕對唔識合夏天去食,因為冇冷氣加係停車場出口隔黎,環境唔得,送外賣都要等咁耐,不如食其他好過,如果唔係真係餓死各位,我自己就一世都唔會再食呢間野

上星期o岩o岩考完試..約左男朋友同埋佢個frd去日月星食..之前考試期間睇過OR食評..好似好吸引咁所以考完試即刻要去試...o個度環境其實比我想像中差..我叫左下午茶餐..有雞脾有火腿三文治同埋汽水..火腿三文治無特別...雞脾並無食評所講咁好..雞皮油雞肉鞋...一點兒都唔嫩..而佢gesize好似好大咁其實只係將隻雞脾切兩刀攤平佢炸...總括黎講唔去都無損失!!

因為上網睇左食評, 見到講到d雞脾咁正, 外脆內滑, 就特登由旺角搭地鐵過九龍灣試下.環境好似普通快餐店一樣, 外面有d椅俾客人坐係度食. 咁一場黎度, 梗係試個雞脾啦. 食落d皮真係好脆好好味, 但雞脾肉就唔係真係講到咁嫩咁滑. 而且佢只係將雞脾側邊的肉切開, 令佢感覺上大件左啊~一個$20左右既餐, 又真係可以食到好飽呢~

牛頭角算係一個我小去既地方，但機緣巧合之下一個月內第二次黎，聽人講呢度炸雞比火腿三文治餐好抵食，就走黎試下，炸雞比火腿治加杯凍檸茶都係$20.5又的確係好抵，如果係下午茶時間黎仲會平三蚊添。火腿治其實好普通，之但係隻炸雞比真係好正，應該炸起無耐夠熱，皮又脆，真係好正。但講到環境，自從食市禁煙後有好多餐廳都會用下呢條法例既灰色地帶，就好似呢間野咁，佢D位全部唔屬於室內範圍，所以D客可以食煙，我今日就好唔好彩撞正隔離幾個都係食煙既客，仲要風向住我，攪到我食野都食得唔開心，吸O左勁多二手煙，不過經常都講，自己有權選擇，最多下次唔再黎呢類餐廳既姐。

月初湊巧經過，地踎式快餐，想起她的馳名炸雞肶，便坐下點了一個炸雞肶茶餐，腿治，還是腿治，不考技術，也難以神化的，大概也不能要求有甚麼驚喜罷！炸雞肶，果然是生炸的！途經的話，不妨一試啊。

早前老婆帶我去日月星食馳名炸雞脾..雖然個阿姐塊面真係黑左d...而且都等好耐先有得食但真係好好味..最緊要係食下午茶.炸雞脾+3文治+凍飲=$163文治真係hea左少少既但主菜炸雞脾搭夠...雞脾唔洗講la...皮"翠"肉滑, 夠味又大隻而我只可以週末先可以去食每次午餐都係食椒鹽雞中翼飯繼炸雞脾後, 另一好味!!好味又平...p.s. 平時見佢都有好多外賣要送就知道有幾好味la!

終於有機會去試下炸雞比. 下午茶時段去到, 真係幾抵.雞比茶餐飲凍茶都係$16.5腿治好油...唔係好得...炸比就真係掂...好食!凍茶都OK.有機會再去食.

以前姑媽住淘大既時候都成日叫外賣上o黎食,上o黎openrice先知佢地出名既炸雞肶..今次就來打破我可以食熱氣野既rule啦!=pstaff們好好態度呀=)同fanfan一人在lunch時間叫了一個茶餐~炸雞肶+熱狗<--$20~在tea time食會抵好多呢,,$16 ja~!熱狗唔似一般求期就算ge冇heart野,麵包皮真係脆的!雞肶真係好大隻,雞肉好滑!再飲埋杯至愛的玉泉忌廉,食飽飽^(++)^哈哈,雖然又食炸雞肶又飲汽水真係好junk food咁,但真係勁滿足...嘩~都唔知幾耐冇食過炸雞肶！

忽然好想食沙公仔面, 就買左個义燒公仔面少油同熱杏仁霜公仔面: 唔知係咪叫左少油, 所以真係唔係好油, 但係唔係出前一丁,只係大批來貨既普通公仔面. 不過都少得幾好味, 只差左唔係好見到有义燒, 得幾件好微少既袖珍版. 同埋幾條芽菜絲. 真係好似食緊齋面咁, 但係好想食, 無計杏仁霜都幾好飲, 好香杏仁味, 不過唔係人人受得呢種味!!另外仲有:上海粗炒: 好油, 好似飲緊油咁, 不過個面幾好食, 幾煙Un炸雞肶沙律盒: 今次隻雞肶超細隻, 不過都係咁好味, 好滑. 個沙律夠醬, 幾好, 但係啲薯仔好似未熟咁, 好硬, 麻麻地, 諗住唔係餐\應該會有啲生果, 但係唔係囉, 只係份量多啲

因為睇得多食評關係, 見此店近我公司就決定lunch來買個茶餐試下先..叫左個炸雞比+火腿治+凍檸茶...杯茶ok啦..不過件三文治真係太hea連少少牛油都無搽不食都無咩所謂..反而件雞比真係點呀...我係中午買晚上先有胃口食..晚上食都覺得好正仲有少少脆啦..我估我即食既話仲更加好味..下次再試過先.

入開九龍灣貨倉處理大量積壓後，下午茶時間肚裡打鼓，想在德福的空調雅坐外的另一選擇，故二話不說的跑過來。當天天氣很熱，座在路邊都幾挑戰，但有把牛角扇正中對著都好一點，不過旁邊不時有汽車貼身駛過的情景，都算幾獨特。當然生炸雞脾是這裡的招牌菜，非點不可，故來了一個下午茶餐，腿治、雞脾及涷飲。雞脾等一段時間才有，看著蒲扇樣大的雞脾都幾開心，左反右反看到她們的炸法跟其他快餐店不一樣，她們應在厚身地方下了一刀，另外亦將部份骨肉先行分離，醃一會之後才炸，因受熱平均及時間可短些，故食味較好；而雞脾真的食不出有雪味，這點在醃制的方法上運用得宜。腿治外帶回家沒有品嘗，反而一杯錯有錯著的涷好立刻加杏霜真的令人回味無窮。其實收銀阿姐及負責前台的白頭先生都幾好傾，他們不作聲的樣子確實很兇似的，但閑聊起來又客客氣氣，見他們跟街坊的招呼問候已感到，而跟他們聊的就是杯獨特的好立刻加杏霜，下次更可要求特別訂做。臨走前再外賣一隻雞脾回家，個多小時的車程後雞脾的味道不太走樣，利害。

日月星我都幫趁左成10年，一直都保持水準而main point係平！靚！正！乒乓波板咁大既炸雞髀你見過未？奶茶真係好飲！見到有d comment 話某個員工黑面兼幾惡咁答哈哈! 我食咁耐就未遇過啦~不過人總有情緒一個員工並唔代表全部員工既!我對日月星好有信心，絕對係平！靚！正！之選

4月8日同朋友去日月星食, 諗住又平又快丫嘛…之前睇過joe o既食評, 諗住最好叫餐, 抵D嘛…當時1點45分左右, 去到見有下午茶餐, 有炸脾喎, 就問個收銀阿姐有無下午茶餐. 個阿姐好黑面兼幾惡咁答, “無呀! 個牌有寫時間架!”攪到我有D驚. 之後個阿姐仲好似好嫌我煩咁…>_<最後我要左豬扒餐(有豬扒, 火腿, 餐肉, 煎蛋), 份量的確係抵食.我要左咖喱汁. 個咖喱汁同白飯就麻麻地喇…雖然係抵食, 不過我覺得服務都好重要. 都明知係快餐, 唔要求乜野好禮貌好笑容. 但起碼唔好黑面對客人丫…