海港酒家

营业中

休息中

三碟小炒用50分鐘都上唔到菜，分別同3個侍應反映都hea我地，話炒野等30分鐘唔算耐，等夠50分鐘至上第一碟，果碟牛柳粒又少又油仲要唔熱（不過公平地講個洋蔥幾好食）隔離檯都食完走埋再返檯，我d野都未到火都黎

食咁多間海港酒家，呢間真係簡直不知所謂，啲人態度差，要乜無乜，要一壺水，頭一次就話無仲煲緊，算忍你，隔左幾分鐘再問，都係話等下啦吾會死架，我都仲忍住左，第三次就直接出現三壺，叫你拎走不必要個兩壺，就話放係茶几上面吾阻住係食嘢。唔阻住但影響我食嘢喎，攞走擺係茶水間好麻煩？要碟甜醬就要一個推一個，推三推四，拎一碟野好難咩？未見過酒樓係無豆瓣醬啲姐姐好似睇唔到人咁，乜年輕人就吾可以朝早飲茶咩？炒米粉出嚟係凍都算，辣醬都無，炒米粉無味。就連腸粉出嚟都係凍？飲個茶都要忍住啖氣食？

同學下月移民加拿大適逢呢排有咁多人中招餐飯應該係佢移民前最後同佢飲一餐嘅茶一心請佢食好嘢認知埋單都係百幾蚊唔洗超平因為佢有糖尿病唔食得糖分冇嗌飯淨係嗌啲點心肉已經食到好飽

🍴秋冬羊腩海鮮鮑魚宴 八人餐 $1380 另收加一 (7.5/10)🍴古法炆羊腩煲 (7/10)羊腩煲都炆得幾入味，唔會太濃，個羊肉呢一首比較鞋好啲，但係個皮就好軟滑 ！🍴堂灼唐生菜 (7/10)正常生菜🍴西蘭花炒帶子花姿 (7/10)帶子都幾滑，花姿彈牙，西蘭花都好爽口，OK嘅！🍴鹽燒六頭鮑魚 (7/10)鮑魚到爽口彈牙，但略嫌椒鹽鹹左啲！🍴清蒸蝴蝶龍躉班 (8/10)呢個好好食，魚肉非常鮮味有魚味，亦都好嫩滑！🍴蠔皇花菇扣鴨掌 (6/10)鴨掌炆得唔夠淋比較硬身，花菇夠大隻，同埋菜心都OK！🍴芥蘭炒臘味 (7/10)炒得都幾香口，不過比較油膩。🍴脆皮醬燒雞 (7/10)個皮好脆，雞髀肉都係比較乾身少少，但調味都OK！🍴臘味糯米飯 (8/10)臘味飯冇諗過咁好食，夠晒香口，糯米軟硬適中！🦀皇帝蟹 $1513 (8/10) 肉質非常鮮味，肉質彈牙，一絲絲嘅蟹肉，不過好重海水味，比較鹹！🍴燒鵝 $238 半隻 (7.5/10)燒得幾香口，魚肉都唔會太乾身。🍴燕窩燉蛋 $28 (0/10) 千祈唔好叫，一啲味都冇仲要勁細碗，又冇奶味有冇蛋嘅香味，燕窩好多毛😂推薦指數: 7.5/10連鎖酒

6/11/2022星期三晚，一行七人去食晚飯。原先酒樓分兩段時段，不過我哋叫得多嘢，就比我哋食到九點幾。去海港，梗係叫長腳蟹，加 $100 用蛋白蒸，味道ok.不過燒鵝真係一般，不見得特別。東星班，新鮮，蒸得啱啱好，好食！其他餸是一般水準，沒有驚喜。不過當晚驚喜是帳單，叫左六支啤酒，半打壽包，埋單是十二枝啤酒，三十九個壽包！係三十九個！！！好彩有check 帳單，如果唔係，就收多咗六百幾。唔知係唔係見我哋成枱麻甩佬，唔似會check 吓張單，先至比錢。所以亂咁打單，或者每個侍應都要孭數，不得而知。不過大家真係要自己小心。

呢排返工返到勁辛苦又勞碌~三五七位同事都舉腳贊成去拆大餐，今晚就決定去太子始創中心海港酒家開大餐~阿拉斯加長腳蟹及其他餸菜！🦀🦪🐏🍖🍚到達酒樓時，經理好友善安排我們七人坐大圓枱及窗口位，實行食得舒服啲及爽啲！早早揀咗一隻約六斤重的大🦀🦀， 簡單清蒸吧！6斤 阿拉斯加蟹 💰$1547🦀🦀 一上枱連隔離枱都嚟替🦀🦀打卡， 很大隻，🦀腳好粗壯~剪開啲殼~裏面啲肉超鮮甜、超滿足！仲有碗蟹膏，當然叫碗白飯撈在一起帶家開心分享食， 簡直係完美嘅組合🍚古法羊腩煲🐏🐏（ 送唐生菜一碟）$168有埋Gas爐keep住羊腩煲嘅溫度🔥🌡羊腩煮得好冧好入味！仲有埋冬菇及馬蹄，放埋唐生菜~真係暖笠笠，好味道！😋😋椒鹽滑豆腐 💰$88一粒粒外脆內軟的豆腐，份量又多~叫人食不停口！🤭🤭百花炸釀🦀鉗 7隻💰$266新鮮炸出來的蟹鉗外皮脆卜卜，肉質好實在， 食過番尋味！😍🤩海港燒鵝皇🦃🦃（例牌）招牌燒鵝，叫例牌冇錯！份量適中，肉質肥美，很不錯！👍😎壽包🍑🍑奶皇/蓮蓉 💰$15/1個大大個的壽包，兩款餡料都好味！但如果有埋鹹蛋黃在其中就更好！😝😝紅棗糕（半打）💰$48熱食的紅棗糕~味道很濃，煙韌彈牙，是飯後最佳甜品！🎉🎊

咩酒樓？！前台掛住講電話 傾完先施施然應你 提你就快last order, 我已經知唔想做生意入到去行左個圈原來唔係帶位～自己去問完經理又是但篤個位比你 又冇人開茶 鋪枱布都冇人 ！仲要地方好污糟！！一定唔會再去！！

又喺到食阿拉斯加蟹嘅季節喇，每年到呢個時候，老公就會自動自發問我哋食唔食蟹。今年亦都唔例外，一知道阿拉斯加蟹上市，就二話不說在海港訂枱食蟹啦！已經特登唔揀週末，但係食蟹嘅人一樣喺咁多。為咗要揀大隻啲嘅，老公一早就落到海港揀蟹，結果真係俾佢柯打到一隻六斤半重嘅阿拉斯加蟹。隻蟹真係好好味，非常鮮甜，咁大隻蟹四個人分，真係食得非常滿足，啲蟹膏仲滿到爆曬出嚟，要用隻碗仔載住😅剩食蟹唔飽肚，所以跟住又嗌咗啲餸食飯。根據以往經驗，我對海港嘅小炒實在冇期望，誰不知嗰晚叫嘅每一樣餸都炒得非常有鑊氣，唔通喺轉咗個大廚？如果佢可以維持到呢個水準，咁平時食晚飯我都會考慮海港喇！當日隻蟹$258一斤，比舊年貴咗啲。唔緊要啦，又唔係成日食，最緊要係食得開心，咁就值回票價啦！

又到左秋冬食蟹嘅季節，我全家人都最鍾意食蟹，每年都會食一次阿拉斯加長腳蟹，今次海港做緊$258一斤，比之前貴左，想食都冇辦法，即叫即蒸，夠晒新鮮大年隻，過足食蟹鋪癮😋

年年大概呢個時間都會來太子呢間海港，因為有抵食長腳蟹食！個人好鍾意食清蒸，夠鮮甜又啖啖肉！今日叫左隻6斤11長腳蟹，好滿足！ 真係冇需要點任何醬汁，熱辣辣拆開即食已經好鮮甜

星期六一家三日到海港飲茶，本以為海港集團會有一定的水準，但環境及食物令我極失望，東西不好吃，地方很污糟，廁所像公廁。不會再光顧！但不得不說服務員態度還可以，但真的不會再去。一個字差，強烈建議要好好清潔。

朋友結婚請食飯，聽講一圍都要4-5000蚊，等左五係好耐，上菜都算快，滴海鮮都算好食既，就係好似普通左滴。最好食個龍蝦伊麵了，只乳豬都脆既，都好食。其他就普普通通啦，總體可能價錢偏貴。

今晚同家人一齊出去食餐晚飯，見近期好多人都食阿拉斯加長腳蟹，加上海港張廣告雞乸咁大隻蟹，所以就走去試下，但十分之失望，蟹殼好大好粗，剪開入面，就無咩肉，無鮮味，真係有啲後悔叫左，隻蟹唔好食都算，就檔自問選錯左隻蟹，但他們d小菜真係唔多得，個蒜片牛柳粒，鹹到食唔到，直頭退返比他們，我估師傅可能落咗兩次或三次鹽，我從來都無食過咁鹹的牛柳粒，隻燒雞都好一般，肉質麻麻，上到枱微温，其他叫果d小菜都只係勉強可以接受。總括來過這間酒樓我係唔會再來食！完

6/6/2022 好想食近排有熱嘅「松葉蟹」，今日就嚟「海港酒家」，外賣一隻「清蒸松葉蟹」($298)返屋企慢慢食，慢慢嘆！佢哋包裝得好好，用錫兜原隻「松葉蟹」放入去，拎到返屋企都冇問題。「松葉蟹」好鮮甜，多蟹肉，又多蟹羔，超正呀！用蟹羔撈埋啲蟹肉一齊食，真係好美味！喺屋企食蟹，可以好自由，用手拆蟹殼，大快朵頤，$298一隻，好抵食。酒家蒸好晒，一返屋企就可以即刻食，夠晒方便。而家食蟹唔一定要堂食啦！

朋友介紹如果食阿拉斯加長腳蟹就去海港酒家食，見佢推出338蚊一斤堂食就和家人一起去試試。可能佢食阿拉斯加長腳蟹出名所以去到嘅時候蟹的數量剩餘很少，比較重的蟹已經畀人訂了只剩下三斤多的重量選擇，我們想試蟹嘅原味所以就選擇清蒸阿拉斯加長腳蟹，果然沒有令我們失望清蒸的長腳蟹味道鮮甜十分好味，值得一試再試，如果下次再食可以叫斤數重一啲的，很久沒有吃大鱔了，所以叫了一個豉汁蒸大鱔，蒸大鱔的火候夠，肉質爽脆鼓汁濃味，其他餸菜都是一般酒樓的味道。