燉 (已結業)

燉 中午抵食: 地址: 荔枝角長義街10號昌隆工業大廈地下3A2號舖電話: 28161411返工搵地方買飯食,心血來潮想飲下湯,去左呢間燉湯專門店買,貪佢款多仲可以一次過買埋飯食湯今日試左個沙參玉竹雪耳瘦肉，湯真係足料，撈到幾塊大大件架豬肉，湯無落鹽，我一定會拎兩包自己返去調味中午加飯一齊買平好多，點份蟲草花排骨，記住拎甜豉油呀仲有蒸水蛋，跟飯買又平d ,滑溜溜仲有些事乾瑤柱絲碎3樣加埋都係80蚊有找,我同同事都鐘意來買飯同湯

環境方面：—　位置係地鐵站出口旁，十分方便。—　不過我同友人兩個女仔去食，門口好似垃圾桶咁，成日都有人圍住食煙，如果唔係見到楊明Ｐｏｓｔｅｒ，都以為係咩地痞茶餐廳。—　樓面櫃台尚算乾淨企理！—　不過去洗手間洗手時，廚房衛生質素未如理想。—　最後，其實楊生又唔係特別靚仔，最近同民意又有逆差，心諗睇泥雖然係老闆但代言人方面都可能要斟酌斟酌喇，真係成間鋪３６０度都避唔開楊生個靚樣呀。服務方面：—　正正常常食物方面：—　泰國原個椰皇燉雞　—　第一眼，夠滾！飲湯最緊要就係夠滾！不過味道就幾乎無椰子味，所謂原個椰皇燉雞，睇泥都係原個椰皇殼燉雞。雞方面，煲到爛哂，骨都斷埋，鍾意食湯渣既都算必點，全部都係你地最鍾意，「鞋烚烚」既「真。湯渣」！最後，椰子殼睇落奇怪，唔會係環保椰子殼呱。。。—　姐妹叫左個蘋果雪梨百合燉瘦肉，佢就話味道尚可，不過明明係瘦肉煲，但浦面果大浸豬油真是唔係好開胃呀，尤其我地啱啱做完瑜珈，好鬼Ｇｕｉｌｔｙ嫁嘛！！總括而言，地點十分方便，廚房心機亦都一樣，十分方便，食唔食，視乎大家個胃同銀包，係唔係都一樣咁方便囉！我諗除左楊生粉絲，都未必會返焯！

平時睇開無ｘ，諗住去見下楊明真人，所以見佢開舖諗住去試下，順便睇下會唔會撞到佢真人。餐廳位置好一般，唔係返工返個頭都幾頭痕，唔會特別為咗食佢而出去囉。門口都多煙頭，又多人食煙，門面整體唔討好，餐廳入面就太多楊明Ｐｏｓｔｅｒ，少少地都可以接受，但依家真係覺得有啲多，又大大張，坐落感覺都麻麻，幾唔自在。食客們質素都麻麻，高談闊論傾楊明，成班師奶傾到好大聲，好嘈，都幾阻住食返，寧願買走都唔坐低。到食方面，我叫咗個梅菜燘扣肉飯，點知食落好一般，飯唔算好熱，又唔多，個餸就幾重口味，真心同普通茶餐廳無分別，除咗貴少少之外。最於湯就叫咗個蜜瓜螺片燉瘦肉，諗住係招牌湯會好過個飯，但係蜜瓜其實唔應該用嚟煲湯，超級唔夾，陣味好怪囉，我諗我應該同楊明口味唔同了，未必識欣賞佢啲招牌菜口味。可能你會話每個人口味唔同，但我自己就唔會再試了。唔值呢個價，價錢亦都唔算公道，係公廠區收呢個價，絕對接受唔到，有好多其他選擇都好過佢。總結：無特色，定價不值，味道奇怪，不會回頭，只係賣明星生招牌，不如食渣哥。

近期見網上有藝人開設燉湯店，分店在長沙灣也有開設，比較近我於是去飲下湯，試試質素。入內見到牆上貼有藝人自己的宣傳報紙。餐廳主打以燉煮的烹調方式來推廣養生慢活。並且宣揚無潻加，無味精，無雞粉的健康自然製作。鋪內坐位不多，都係吧台位，好適合獨食、快食人士。雲腿菜膽燉豬肺 $60這款是新出的燉湯，湯料十分足，湯十分清甜，所以湯料我都食曬，豬肺嫩，雞腳都腍曬，菜膽甜，整體不錯，滋潤滿足。魚肚滑雞蒸飯 $29我試的是魚肚滑雞蒸飯，價錢親民。魚肚滑雞份量正常，雞件不太嫩滑但亦不乾柴，魚肚濕潤吸汁，米飯軟硬度較硬和乾身，整體味道清淡。蒸飯對比起燉湯略為失色。

今日同小朋友行到好攰就入黎食下嘢，叫咗一個魚肚蒸排骨飯$29 ，蜜瓜螺頭瘦肉燉湯$58，不過喺5:30pm前套餐有得減$8兩樣清清地都好啱小朋友食嘅😊魚肚質地淋身，女女都食到，至於份量可以$5加飯，蒸飯無得輸，配上李錦記豉油。而蒸飯送來時間唔算耐，好快就有得食而燉湯方面係餐廳主打，無味精，真材實料，應該無落鹽，有蜜瓜甜味，呢個湯第一次飲，連女女都肯飲。。我仲食到螺頭嘅湯渣，成個湯飲完唔口乾，如果大碗啲就好嚕😂

朋友經常話飲靚湯，今日就剛巧去到荔枝角地鐵站，想起“燉“店舖就在地鐵站附近，非常方便。店舖沒有花巧的裝飾，四周簡簡單單，只放了幾張 high chair。店舖是以自助型式，自己到前台取餐，用餐後自己把餐具放到回收餐車，盡量減少人手成本，所以價錢亦非常便宜。今日就一於飲盅靚燉湯，猴頭菇螺片燉瘦肉，用料非常充足，燉湯清甜好味。 另外盅頭飯亦相當出色，今日食魚肚滑雞蒸飯，細細盅，最適合女仕，飯面鋪滿很多餸，飯很乾爽，非常好味。

放工去咗荔枝角，因為媽媽谷有媽媽報料話呢度有間嬰兒品牌開倉，所以過嚟睇吓有冇咩啱小b。血拼完就係附近食埋飯先返去，補充吓體力，血拼嗰陣真係唔會覺得肚餓架。離開開倉嗰棟大廈之後發現對面呢間有燉湯蒸飯，二話不說就入咗去。好多選擇，三心兩意㖭。店員見我諗咗好耐，佢問我最近夜唔夜瞓，之後介紹咗幾款湯俾我，佢仲話啲湯係無加味精同鹽，原汁原味。燉湯有好多款，而且有啲仲係時令限量發售，仲有糖水甜品㖭呀。本來想叫個蒸飯，點知全部沽清，下次要早啲去買。蒸飯沽清唯有點客飯，豉汁釀涼瓜飯，份量超大份呀，飯真係盡量食，但都食唔矖，下次再去要叫少飯。我其實都幾鐘意食涼瓜，不過老公唔食，所以少咗食。個豉汁釀涼瓜好入味，唔會太咸，肉質鮮嫩多汁，送飯一流。主角出場，海底椰麥冬百合燉瘦肉，清熱潤肺。最近夜瞓唔夠瞓，個人好燥咁，問咗個店員意見，點咗海底椰麥冬百合燉瘦肉。材料好多呀，味道清甜帶甘非常滋潤，我最鍾意係個湯夠熱，飲落去好舒服。嗰晚返到去瞓得好好而且第二朝起身感覺個人無咁燥，下次會再去試其他湯，仲有個蒸飯，超級念念不忘。

近排天氣乾燥,返工午餐時間想飲湯滋潤吓。餐廳名單字「燉」有多款燉湯選擇， 餐牌上各款燉湯都標示有咩功效， 揀想飲咩燉湯仲可以按功效揀湯！午餐優惠組合，點一個飯加配燉湯可以減8蚊，今日我呢個配搭組合只需79蚊。泰國原個椰皇燉雞， 原個椰皇濃郁椰皇香甜味，內裡湯肉充滿椰香，燉湯火喉夠不太肥膩。蟲草花排骨蒸飯，材料滿滿，健康蟲草花份量頗多，排骨的骨肉分佈平均，淋上飯醬油美味度增。食多個甜品再滋潤多啲。 鮮奶燉花膠$48絕不馬虎，一大片花膠鮮奶甜度恰好，鮮奶仲有小小起膠添，呢個甜品都算落重料。呢個午餐勁滿足。

一直知道藝人楊明開了間燉湯店叫《燉》，我這個湯控當然想一試，湊巧今日經過九龍位於荔枝角的分店就好毫不猶豫地內進了。《燉》主張無潻加、無味精、無雞粉的健康燉煮方法，很適合現代講究養生的一代。鋪內坐位不多，先買票然後到鋪尾的廚房取，快捷方便。原來《燉》不只有湯，還有魚、菜、蒸飯套餐等。逢星期一至五購買燉湯的話還可以減$8配蒸飯。一心想喝湯的我就只點了一盎有效驅寒止頭痛的《天麻川芎白芷炖鱼头 $68》。藥味香濃而不苦，亦無魚腥，魚頭亦燉至魚骨都變軟腍。用料十足，燉的香濃，所以貴精不貴多，湯的份量濃縮了所以覺得份量少，但其實都是精華所在。渴至底部亦是滿滿的藥材。川芎可行氣活血，有袪風止 痛的作用；白芷同屬辛溫性質 ， 袪風止痛、消腫排膿；魚頭就夠暖胃養血，不但適合體弱影頭痛的朋友，還是秋冬暖身湯品之選。買的比自己燉的方便，價錢又差不遠，閒時飲湯養生都不錯。

今日早上去開荔枝角，做完嘢已經接近午餐時間～於是就周圍行吓搵嘢食呢一間係專賣燉湯嘅，見到門口show 左好多燉湯相～於是吸引咗鍾意飲湯嘅我入去試下燉湯款式有很多，見到有燉鮑魚湯、燉魚頭湯，仲有原個椰皇燉湯🥣午餐有套餐優惠：一款飯配一個燉湯可以減$8元第一次食我揀咗「泰國原個椰皇燉雞湯」 $58 試下成個椰皇原汁原味！個湯好清甜入面有瘦肉同雞肉～而且冇味精非常好芋頭炆五花腩飯 $38 芋頭份量頗多，而且好粉，好吃！

今日去咗荔枝角做嘢，係工廠區真係冇乜特別好嘢食，前排病咗成個星期，又要戒口，日日食粥食藥食到好悶，又唔想食茶餐廳咁油膩😣見到地鐵站隔離有蒸飯燉湯套餐就食下先，17:30前去食仲有湯飯套餐優惠添，湯可以減8蚊，去到蒸飯岩岩賣曬，得客飯，要等15分鐘！我揀左個沙蔘肉竹雪耳燉瘦肉湯補補身同蟲草花肉餅蒸飯湯好足料，清甜，飯粒粒分明，唔會太濃味，肉餅唔會太粉，不肥膩，我無落是油，都好好味，夠健康！有家嘅味道！

知道有藝人開左尼間燉湯店，但屋企日日有媽媽靚湯，所以一直到無唸過特別去試。點知今日經過荔枝角分店，見到menu 除左燉湯，原來仲有蒸飯，蒸魚，涼茶，甜品，小食等吾同野食，入去食完之後又覺得可以encore 喎！.清蒸沙巴龍躉配白飯及油菜（$99)尼條魚，睇完menu 一眼就睇中左佢。原因係知道出街食飯一啲都吾clean,，如果有得揀，盡量都會揀原材料製作的食物。所以原條清蒸沙巴龍躉好得我心，味道方面由於無加味精同色素，食完吾覺口渴，加多$20有餐飯，有肉有菜有飯，大滿足得黎，營養又均勻，吾錯wo!

今日喺荔枝角見客，中午的時候經過依間燉養生😋😋之前都睇過佢哋啲周刊介紹都想試吓但係本人住喺將軍澳實在太遠！咁啱今日路過而佢又喺地鐵站口，一出嚟就見到！天氣秋涼最好就係飲燉湯，我問過收銀姐姐有咩嘢最出名佢介紹咗花膠鮑魚雞湯，川芎白芷燉魚頭（佢仲話呢個湯對頭痛一流）😍😍佢仲話如果跟埋飯會有優惠跟住我就點左個玫瑰頭抽雞中翼😋個雞翼都好香酒味甜甜地送飯一流，啲飯一粒粒最啱我唔鍾意食爛飯嘅人🤩個魚頭湯藥材味好濃，打開個燉盅成半個魚頭....飲完個湯一啲都唔口渴（真係冇味精）我一啲鹽都唔加簡直原汁原味！食完真係好飽....其實依咁嘅質素啲湯又有大量湯料都幾抵食！ 兩個禮拜後會再嚟荔枝角見客下次會試吓佢哋其它食物😋

個湯又貴又小料，味道好一般，特別係個蒸反，難食到無朋友。。。。。。。。。。。。。。。。。。。。。。。。。。。。。。一個湯加一個反，都過一百蚊，加上難食，真係可一不可再。。。。。。。。。。。。。。。廣告吹大左，只靠明星效應無實力，食物無介紹得甘健康。坐位好逼，又坐得吾舒服逼到甘，更加覺得難食，吾掂！當日未夠七點，已經聽到個職員話無呢樣無果樣，你要咩湯佢無咩湯。。。開住門但又咩都話無！！！！！！

有朋友推介話正，咁咪試下，本來無咩期望。買咗一碗花膠燉雞，一碗紅棗桂圓頓雪耳。我自取，返屋企20分鐘路程都仲熱。返去打開蓋，老實，喜出望外。D料真係多到爆。湯濃無味精，糖水清甜，應該唔係糖精做嘅，食完無口渴。open rice app 訂X master card俾錢，仲無喇喇平$30。無超所值，我覺得原價的話，同鴻X堂差不多，不過話嗮新鮮燉，我覺得值。所以我都幾時買咗套票。啱嗮二人家庭嘅我地環境乾淨企理，美中不足係凳有D高。服務一流，好親切p.s. 因為食飽飯去買湯同糖水，無點飯，不過見到好多人點，個樣好似幾得