礦記生滾粥

营业中

休息中

上星期晚上係太子接埋老婆後，行緊去旺角諗緊食咩好，又咁啱又開始落住細雨，見依間就腳就試下佢啦。原來依間粥鋪都好有驚喜，間鋪都唔算大，但都算坐得舒服。夜晚都差唔多坐滿，應該做開街坊生意。坐埋去睇除左粥之外都有啲小炒同小食可以叫。於是就叫左一窩雞粥2個人share,都好綿好好食，咁間野打正其號食粥，好食應該基本野黎，唔贊佢住咁就少少地叫左2樣小炒。一個蠔餅和黃金鮮魷，蠔餅炸得香脆，蠔肉都大粒和都幾鮮味。（睇返人地食評原來個蠔餅都幾受歡迎。😍，個鮮魷又係好香酥同好惹味，叫左2樣野份量都好足夠好夠食。雖然2個人叫唔到太多款野食，留返下再去試。真心好食！用咁耐OpenRice都未出過食評，依間係令我想出既！支持下小店👍🏻👍🏻👍🏻

特登同三五知己黎試下我朋友推薦既生滾粥身為食粥發燒友更係要試下入去叫粥果陣老闆推薦一定要食雞粥或者海鮮粥，咁我選擇食雞粥，黎到一試，粥好綿好滑再加埋雞，成個粥十分之香，好食！之後再叫啲小炒食下，叫左煎蠔餅，椒鹽鮮魷，鮑魚同胡椒豬肚湯本身粥鋪心諗其他野都應該一般般點知黎到全部都有驚喜😳全部野食比想像高質，無偷工減料，好新鮮最重要價錢唔貴，好低食！不過係可能係小店既關系，出小炒既時間就慢咗小小，不過慢工出細貨，最緊要好食！下次一定再黎 支持小店

深水埗太子交界又有新發現，以後食飯又多一個選擇🥰🥰小小店舖，全院滿座。食物和環境也不錯。樓面一個男和煮粥的那位女士十分友善，非常好招呼🙇🏻‍♂️🙇🏻‍♂️好明顯今日廚房忙到甩轆，所以啲炒野出到嚟嘅時候欠缺鑊氣😂😂今日叫咗一碗水蟹粥、生炒骨、薑蔥炒豬什和椒鹽鮮魷頭先已交代欠缺鑊氣，所以幾個小炒有點兒普通，不過我相信可以下次再試過💪🏻💪🏻💪🏻今日主要想介紹佢個水蟹粥，完全係蟹粥新定位😋😋😋一大碗都係講緊$51，超級抵食😱😱一碗粥，三個小炒，一碗白飯再加汽水三罐總共$340總括而言，一定會再返嚟幫襯😎😎

太耐冇出街食嘢，呢排疫情緩和返啲即刻一家三口出返去，一直跟住呢個師傅食，低調但有水準👍🏻👍🏻👍🏻椒鹽九肚魚100分，依家出面嘅中菜館或者大排檔嘅椒鹽都做唔到呢個質素薑蔥爆魚腩就算驚食魚嘅你都一定啱食，香脆可口，又啖啖肉，不得了海鮮粥呢個唔使我多介紹，入店必食，本身次次來係叫一鍋，今次諗住叫多啲餸所以叫一碗。冰鎮墨魚新嘗試！有突破！之前一直冇留意呢個餸，今日既然廚師推介，即管一試，口感爽滑，最緊要新鮮！估唔到傳統嘅中菜都有呢種鮮味！另外叫咗個菜單上面冇今日新鮮到嘅椒鹽賴尿蝦！最鍾意呢間舖頭就係呢樣野，每次都有驚喜！賴尿蝦好新鮮好多肉，再讚多次椒鹽真係一流！香港咁嘅環境冇加價，店主好野👍🏻

前排呢間鋪無開，原來係大裝修，仲以為轉左手，原來都係之前個大廚，裝修之後環境好左好多呀，不過因為疫情關係，又係晚飯時間，鋪頭坐滿晒人，最後屋企人都係選擇左叫外賣返屋企慢慢食，雖然鋪頭好多人，不過等外賣時間都唔算太耐，好快就拎得。拎到返屋企都仲係好好味喎！100%有驚喜！今次叫左4碟小菜，待應特別推介海蝦，所以叫左碟椒鹽海蝦，配埋冰凍啤酒，真係勁爽！等疫情緩和返，希望下次有機會可以堂食，一定更加好味！

落車時因落大雨，兩口子不想走太遠吃，於是便於這街道隨便找一間但求填肚，店舖沒有亮麗的裝潢而且並不吸引，店內整潔，餐牌簡單，有小炒、有粥麵、似夜宵店。由於是平民店，侍應都談不上服務，有人點菜和收拾吧了，不能要求有好態度。我們點了一個海鮮粥和豬肚粥再加一隻糉，每樣都有足夠份量而且味美，實在驚喜的是海鮮粥，賣相吸引，裏面細心地加了炒香了的豬肉碎，海鮮包括蝦、蟹、蜆、小勝子，粥味鮮甜，海鮮當然稱不上好新鮮，但這個價錢跟賣相都值得再光顧。

came here completely by coincidence and had a lovely meal,   the seafood porridge was delicious - though the prawns were rather less impressive than the crab and clams, most of the umami taste was actually in the porridge itself.  we also ordered the fried white fish which were another pleasant discovery, as were the steamed big shell "oil clams".   would like to return to try other dishes but it's quite out of the way 

住呢區都十年，都留意到租呢個角落位既鋪頭通常都做唔耐，轉下一間又會轉手俾下一間，從來唔記得d店舖名。但係唯一只會記得「礦記」，而且真係值得食。呢間舖曾經一段時間冇做到，我都唔知點解，突然前幾個禮拜見佢重新開翻，真係好興奮，即刻走左去買碗粥食。我比較鍾意叫蠔仔粥，d蠔真係「蠔仔」，但我覺得大細啱啱好。如果係普通生蠔d大細，反而太大。其他粥都係綿粥做粥底，而蠔仔粥係稀飯做粥底。但我偏偏唔鍾意稀飯，所以每次都會要求換做綿粥，老闆娘都好樂意咁做。蠔仔粥d蠔仔都算鮮，而且份量十足。價錢唔算太貴，而且d粥都係大大碗，好飽肚（以女仔角度）。間舖由老闆娘同佢老公一手一腳支撐，真係地區小店，我唔會話好食到媲美米芝蓮既質素，但係有時候d人情味，好需要我地大家去支持。

聽到重開嘅消息立即過去試，原來真係以前嘅老闆老闆娘做番。質素依然咁正！我們2人叫咗海鮮粥（鮮甜到停唔到口，有膏嘅蟹、蝦和蜆肉但唔鮏），椒鹽九肚魚（唔多粉，而且魚肉鮮甜，其他店會用好多粉炸根本食唔到魚肉嘅鮮甜嘛）和胡椒灼蠔（蠔肉大粒又唔鮏，menu 冇㗎，要攞到靚貨才有，記住嚟度就先問老闆有冇）。店舖之前經過轉手略有裝修過，所以而家比以前好坐好多。總括黎講，一定會繼續過嚟食，下次叫多啲人試多啲款式。 若果想食其他，事前打俾老闆問下，我以前見過，另一枱慶祝生日，連乳豬都搵老闆代訂。p. s. 我好少寫食評，但此小店真係好有心，又抵食好味，所以一定要推介俾大家

因為近公司，路過呢度好多次，見到menu專賣生滾粥，竟然有蟹粥~ 想試但未有機會。今晚好想食粥，就諗起佢~看似平凡既小店，原來食物好掂! 老闆娘話今日蟹唔夠，問我轉海鮮粥o唔ok~ 嘩，粥一嚟到，一碗都夠2個人食，蟹有蟹蓋，幾隻蟹肉，1個細蟹鉗，肥美蜆有幾隻，大蝦1隻，粥底有啲蟹糕同肉碎，好鮮甜，好食過澳門果啲又貴又難食，仲要呢度一碗HKD42咋! 老闆娘推介食白灼生蠔，係點wasabi食既，台山黎唔太大隻但鮮，HKD168，因我地第1次黎，叫啲平民價錢穩陣啲所以冇食蠔，點知枱枱都話要叫呢款生蠔喎! 下次一定要試!我地仲叫左及第湯飯同豉椒炒蜆，及第好足料，豬潤大片厚身好味，湯都好飲~ 炒蜆肥美大隻仲有好多隻，唔係得啲殼~ HKD60! 我覺得抵食好味過愛文生~下次黎要試沙薑豬肚，炒雞什煲，蠔豉粥，咸肉糉，豉油皇炒麵，椒鹽田雞，羊腩煲。。。。。好多好多

幫襯過咁多次，同老細都好熟，每次去食一定會介紹我當日有咩新鮮海鮮返貨，今日就有呢個爽蠔，雖然係大陸蠔，但係蠔肉煮熟都好大隻，脹卜卜，用薑葱辟左陣腥味，蠔肉都幾爽同埋好鮮甜。

平時晚晚都幾乎滿座，見佢餐牌主要都係食粥同粉麵及小菜。今次叫左個蠔仔粥，蠔仔大粒爽口，隻隻都脹卜卜，湯底鮮甜，有點大地魚湯的味道，一窩份量都多，有4-5碗，兩個人食都好夠食。

平時晚市行過,見都幾多人係裏面,以為佢剩係食粥,原來都好多野食,有基本既炒粉麵,有小菜等舖內都頗為狹窄,約有5張卡位及幾張圓枱,能坐約30多人.隔離枱既阿叔問老細有咩正野食,原來佢每日都會有唔同既新鮮海鮮攞到返尼,會介紹比客人食.而menu上係唔會有既.入到尼緊係食粥啦,有超過十幾廿款既粥,最貴既蟹粥到普通既皮蛋肉粥不等.及第粥有豬心,豬肝,粉腸,豬潤,肉丸,非常足料,粥底夠綿,好夠甜.蠔餅好香脆,好多蠔肉,一D都唔腥,但略嫌太多油家鄉炒米好大碟,有蛋,魚片切絲,豬肉絲同葱,米粉炒得好爽口.蒜蓉蒸蝦放左好多蒜蓉係蝦面,但撈得太多鹽,太鹹;蝦夠新鮮爽口,粉絲吸收哂蝦的精華,但確實過鹹.下次可以外賣粥返屋企食