篤篤車 (已搬遷) 新店位置

成日經過都見到門口有人排隊等位，好奇之下上網搵下料，原來係泰式湯底車仔麵，好特別喎，終於有機會試下！..要左3餸麵 $38湯底有5款（泰國鱷魚湯、冬蔭公湯、咖哩湯、牛腩湯同埋清湯），第一次嚟梗係試下推介嘅鱷魚湯啦！再揀左3款餸，通常食車仔麵我都會叫豬大腸，另外仲揀左牛筋同雞腎，要米線做底～.試左一啖湯先，清清地，唔係好飲到鱷魚味，可能我根本唔知佢係咩味😂，佢湯底有啲紅棗同杞子，好健康嘅感覺，我叫左微辣，佢係放左少少辣醬喺面，我撈勻左佢再飲啲湯，反而更鮮味，個辣醬好香！.豬大腸好淋好入味，都洗得好乾淨，不過就比較多肥膏，牛筋就煙韌有嚼口，雞腎都係好淋，無左佢應有嘅質感，米線就比較硬身，唔夠滑，仲有送左幾條鴻喜菇～.整體嚟講性價比高，我見其他食客嘅冬蔭公湯底好似好香，炸雞翼又好似好正，下次可以試試！

朋友介紹之下黍試下呢間主打泰式鱷魚湯底車仔麵，配料有杞子、紅棗仲有海鮮配料，我揀左青口，蝦同羅白，飲落好鮮甜，好補身，仲有不得不介紹泰色炸雞翼配甜酸醬好野味，價錢都抵食

泰式x車仔麵 香港車仔麵的湯底已經出哂名濃郁, 再加泰國元素 相信會有一番風味 一於試試 餐牌清晰 主打鱷魚湯底/ 冬蔭功湯 個人喜愛冬蔭功, 當然不會錯過! 三餸+小食+菜 套餐 $67 自選麵 - 冬蔭功湯底 - 中辣（自選）青口. 元貝. 豬紅. 豬皮. 豆卜 湯底辣度自選中辣, 與冬蔭功混合入口微酸, 好開胃! 配料份量蠻多👏🏻 點了不常見的海鮮. 青口新鮮帶甜. 豆卜與冬蔭功好夾 但如果豬皮可以再炆淋一點就更加完美了泰酥炸雞翼炸的時間剛剛好, 顏色金黃, 外脆內嫩 冬蔭功 推介！

呢間車仔麵喺元朗都幾受歡迎啊，假期來親都見到有條小人龍，特別有幾次lunch想食，都因為太多人而放棄，於是今日專登揀傍晚時間來，諗住冇咁多人，大概5點零鐘就來到，正啊，唔洗等，即時有位可以入座，不過要留意喇，呢個時間先來，有機會有D比較受歡迎嘅材料會賣哂。鋪頭細細，約莫十零個位，一邊係四人枱，一邊係對牆嘅座位，坐邊我就冇乜所謂，反正都係食碗麵，好短時間嘅事，亦都想支持下D小店。被安排到近門口位搭枱，聽到對面兩個客人嘅對話，都好安心，因為佢地都有讚話好食同抵食，佢地係睇左網上介紹由九龍入來的。好在我地住得近，想食隨時都食到。呢度嘅價錢唔貴，車仔麵自由配搭，三餸38蚊，叫餐67蚊，包左三餸麵、小食、菜同飲品，都係抵食。我同朋友一人點左個麵，佢叫套餐，我地share小食食，足夠有餘，埋單人均50蚊3餸麵(陳皮魚蛋、雞翼、墨魚丸)、泰國鱷魚湯 38配左油麵，揀左3餸，好夠食，鱷魚湯底第一次飲，好奇想試下係乜味，另外點左少辣，想惹味D。鱷魚湯底係白白地色，冇乜油份，裡面有紅棗、杞子，飲落甜甜地，又幾好味，而且唔會好口渴，俾左少少辣醬，又幾惹味。不過見有D人話覺得唔夠辣，我又覺得ok，自己唔係特別

我一向都好鍾意食車仔面，今次有個元朗朋友介紹左依間俾我，話主打泰國特式湯底，一於去試下。叫左個鱷魚湯底，可以加麻辣，不過我叫左中辣都唔算辣。菜式我揀左豬皮、大腸、牛肚仲有朋友推介既珍珠元貝。幾個餸都好入味，特別係豬皮同珍珠元貝，口感好好。依間野有個套餐 ＄67包三個餸，另外仲跟個小食、菜同飲品，份量幾多。雖然食車仔面食過＄50好似偏貴，但依個set份量都豐富。兩個人一齊食share個小食都good enough。我小食叫左個雞翼，外脆而唔乾身，唔錯。飲品有薄荷葉青檸梳打，食車仔面有依類飲品，加分。

夜晚唔係太肚餓所以同媽咪諗住就食碗麵就算上次經過大坑渠附近發現有間新嘅車仔麵店一於今晚就試一試！篤篤車！喺門口排隊期間見到佢個鱷魚湯底幾吸引！我諗依個就係佢嘅賣點啦！八點左右成間鋪頭都滿座等左10分鐘左右終於有得入去食！兩個人我哋點了一個套餐同埋點了一個三餸車仔麵！我點了一個牛柏葉+牛腩+響鈴冬陰公湯底！而媽咪就點了一個豬腸+蘿蔔+牛腩-鱷魚肉湯底！先講一講個湯底先個冬陰公湯底真係唔會好辣好好味估唔到車仔麵有呢個湯底！有香茅和菇菌做配料👍🏻另外媽咪個湯底都好吸引係有嘅藥材味既鱷魚肉湯底！雖然唔係好食得出有鱷魚味😂但真係飲得出有好多藥材煲出嚟嘅感覺！住家湯味道！應該係冇加味精！咁多款配餸之中....最值得叫嘅一定係佢嘅蘿蔔同埋牛腩！蘿蔔又淋又甜又冇渣！牛腩又林又入味！套餐嘅小食我哋揀咗泰酥炸雞翼！上枱嗰陣熱到真係食唔到！十分熱氣😂外脆內裏多肉汁！炸嘅時間啱啱好！另外我覺得佢杯特飲都係必叫！薄荷青檸梳打！勁多薄荷葉！而且又酸又開胃！好清新嘅感覺！對於整餐飯感覺都係十分良好！有時阿媽唔煮飯一個人黎食都唔錯！但記得留意佢哋係關9點架所以到八點幾嘅時候其實好多野都開始賣晒！要食記住早啲啦！

尼次去到元朗比較偏既位置揾野食，發現馬田路尼間車仔麵店，店面細細但座無虛席再加上門口見到有個"鱷魚湯底"揀，咁大個人都無試過鱷魚湯車仔麵於是決定一試究竟。無乜位之下坐落對牆既"自修位"，雖然環境扣左分但車仔麵既餸選擇都多，基本上諗到既都有，叫左個套餐(幼麵，鱷魚湯，牛腩，豬大腸，響鈴，魚皮)，價錢都好合理，唔算貴兩個人大概5,60一定飽，真心幾扺。鱷魚湯底唔油，夠濃郁，仲落左紅棗個啲，真正係預你飲既湯haha，可以一試，相信岀面都無幾可會有尼隻湯底，吾油膩而且好養生，健康之選！而仲要讚既係大腸真係要嗌，個人本身勁中意大腸，呢到份量比好足，乾淨，而且肥瘦適中，而響鈴魚皮都係正常既味兩三舊，如果想有驚喜可以試下其他餸，下次經過會再食！仲有其他小食, 幾正!!

今日入元朗搵野食，見到依間車仔面鋪有人排隊就去望下。見佢主打泰國鱷魚湯幾特別，而人龍又唔算特別多就一於試下啦。題外話：排隊時見到有人示威，有朱凱迪，原來係抗議區內行人天橋造價太貴 兩個人食吃左一個鱷魚湯底一個冬陰功湯底，兩個都唔錯，個人較 喜愛鱷魚湯，飲落都香甜，感覺真材實料咁，據聞對女仕好補添。餸菜款式頗多，我揀左珍珠元貝、墨魚仔仲有我最愛既牛栢 。平時食車仔面真係少見有元貝，佢份量都幾多。其實車仔面d質素 都好難好差，依間最特出反而係個菜，馬拉盞炒芥蘭，車仔面中既誠意之作，最後仲有杯薄荷青檸梳打都好飲！

上星期橫風橫雨，但係因為呢個「篤篤車」嘅新字頭係新界殺出一條血路，所以就算兩父子變落湯雞，都要坐小巴入元朗去試一試呢個泰式車仔麵。我點左冬陰公小辣湯底河，配雞翼，蘿蔔，響鈴同辣豬皮。父皇點左鱷魚骨中辣湯底粗，配蘿蔔，牛柏葉，金錢肚。一黎就當然要試試佢個湯底，鱷魚骨湯非常足料，而且唔會好腥，甜甜地，非常特別！一試就後悔自己無點鱷魚骨湯😅 冬陰公湯就鹹左少少，不過好欣賞佢唔係椰奶味重嘅冬陰公，而係辣味重的清冬陰，好惹味！我同父皇都一致認同蘿蔔好好食，父皇話食得出蘿蔔無浸過糖水，天然甜同無渣！辣豬皮爽口彈牙，雞翼亦非常滑同入味！想特別推一推嘅係呢個炸魚皮配自家製清新醬。魚皮炸得好脆口但係完全唔油膩，浸一浸下d湯，超正。不過份量就少左d。要同父皇鬥快夾🤣 下次黎嘅時候，要一人一份炸魚皮！一定要讚嘅地方係你食完之後係完全唔會覺得口渴，真材實料，無落味精，呢個fusion fuse 得靚！就連平時食野特別有要求嘅父皇都一d微言都無！

每次經過都見到要排隊，今次喱個時段黎，竟然無人龍，立即試試✌🏻泰國風嘅店名用上特色嘅湯底作主打 配上港式味道嘅代表，車仔麵檔來襯托下午茶時間，配飲品重有優惠薄荷青檸梳打，加入大量薄荷葉令味道更突出👍🏻味道清新，唔會太甜必食嘅炸魚皮，魚皮薄身脆口，配上清新沙律醬超正👍🏻記得點沙律醬食，醬汁係店主自家制㗎沙律醬帶少少微辣，加入香料，味道酸酸辣辣，好開胃👍🏻鱷魚肉湯底，濃濃雪白嘅湯配上紅棗，杞子，未飲已感受到滋補，入口清甜，一飲再飲吖 冬陰公湯底，酸酸辣辣！‼️喱度嘅辣度重可自由選擇‼️炸雞翼(辣)，外表酥脆，充滿肉汁店主嘅湯底足以我純粹飲湯食麵已經滿足😍更何況，店主嘅滷水配菜，例如，豬腸，豬紅，牛筋.......等等，都非常出色👍🏻

元朗除左某間車仔麵出名外，又一新發現，雖然呢間係泰式湯底車仔麵有鱷魚湯、冬陰公湯、牛腩湯選擇第一次去，店員推介泰國鱷魚湯有套餐$673餸配自選麵、菜、小食（大）、飲品泰國鱷魚湯，湯底濃郁，個人認為配米粉或米線較好！可以揀辣度，中辣，雖然幾辣，但無掩蓋湯原本味道👍🏻車仔麵嘅餸同平時食開差唔多雞腎質感有D似牛舌！幾軟腍！羅白食落無渣！冬菇係新鮮冬菇！以為平平無奇，食落幾入味👍🏻小食叫左泰酥炸雞翼！有4隻，外皮脆脆，好入味！加左$6蚊改薄荷青檸梳打，食咁辣嘅嘢，飲返杯梳打，好夾！值得試👍🏻

早排見這間新開的車仔店常常很多人排隊, 心裡十分好奇, 襯今天一個人工作完, 早了吃飯, 便來這裡晚餐, 不用排隊, 太好了。每枱都有點餐紙, 自己圈想點的食物, 很方便, 今天工作太忙沒有吃午餐, 便吃多點。薄荷青檸梳打: 非常多的薄荷葉, 給了清新的香氣, 青檸梳打味道剛好, 不會太甜, 解渴。泰國鱷魚湯米粉 (蘿蔔、墨魚丸、豬大腸、冬菇、金菇): 先試一口湯, 有鱷魚的香味, 有材料煲出來的甜味, 墨魚大大粒, 夠爽彈, 但墨魚味不太強, 豬腸、冬菇不過不失, 金菇乾淨爽口, 還附送一些鴻喜菇, 最出色是蘿蔔, 必點! 幼嫩無渣又夠甜!馬拉箋芥蘭: 芥蘭本身有點苦味, 在這裡就沒有了, 因為馬拉箋很夠味, 有點稍鹹, 可能我比較習慣清淡, 不過濃味是泰式特色吧。泰酥炸雞翼: 雞翼炸得酥脆, 雞肉很嫩滑, 跟菜一樣, 也是味道稍鹹, 附上甜辣醬更添風味。

今日同女朋友喺元朗打完羽毛球 大家都好攰啦 所以食番啲澱粉質補充下能量 行過見到有間車仔麵 睇落好似好好食 所以就入去試下啦 首先入到去叫咗一個辣湯 入面有雞翼 牛腩 而女朋友就叫咗清湯 有冬菇 響鈴 酸菜 同埋雞腎辣湯真係名不虛傳 真係幾辣 辣到我係咁飲水 好刺激呀 但係啲牛腩 完全吸收哂啲湯味 除咗刺激之外仲有濃郁嘅牛肉味 嘩真係正呀 食到我一路係咁標汗而女朋友嗰款比較清 冬菇 好鮮味 而且其他配料 都完全吸收曬湯嘅精華 雞腎個樣雖然似叉燒但係非常之有咬口 值得一讚 之後我哋再叫多一個 炸雞翼 呢個炸雞翼炸得非常之香脆可口 點咗酸辣嘅汁 味道更加有層次 非常非常之好食最後就叫埋嘢飲 叫左青檸梳打 貪佢冰凍之餘 酸酸嘅味道亦都可以為我哋解辣同埋解滯

篤篤車位於大坑渠間B仔涼粉對面，其實唔難搵。到達店舖，店內多人，好彩等了5分鐘，就有位。細看餐牌，呢度係主打泰式湯底，有冬蔭功和外面少見的鱷魚骨湯底。餸選擇多，而且價錢合理。如果食得辣，店長都推介咖哩湯底！呢度有幾款唔同嘅湯底，我叫左咖哩湯底同薄荷青檸梳打。牛筋炆得夠腍入味，膠質口感重，比起其他店舖出色。仲有豬大腸，呢個誠意推介，佢比起我哋一般出去食嘅大嚿好多，好滿足。而且清得好乾淨 入囗一啲怪味都冇，如果真係要挑剔就係有啲會比較肥，不過味道係正宗豬大腸好香咁。金黃色嘅炸雞翼，醃得好勁，鹹鹹香香，咬落個感覺似煎又似炸。啲肉都脹卜卜，個醬汁同春卷嗰個係一樣。炸嘅時間控制得好好， 咬起來， 十分香脆， 味道相當不錯啦！薄荷青檸梳打係必加之選， 味道清新， 夏天一流， 跟餐只加$11， 抵啦！ 地方環境雖然唔算好大...但都係企企理理，值得支持！

上網見到元朗有間車仔麵有泰式湯底，呢日同友人嚟開元朗，就一於嚟試下。舖頭唔算太大，大概坐到十幾二十人，感覺乾淨舒服。車仔麵我同友人都揀自由配搭嘅三餸餐($38)，我係泰國鱷魚湯底(小辣)，粗麵底配辣豬皮、咖喱魚蛋同墨魚丸。友人就叫左咖喱湯底，米線配冬菇、豬紅同鷄腎。我哋另外叫左份網紋春卷(細)($15)、炸魚皮(細)($15)，同2杯薄荷青檸梳打(跟餐每杯$11)。鱷魚湯底鮮味濃郁，自選嘅三餸辣豬皮、魚蛋同墨魚丸都好好味，仲有杞子、紅棗同蟹味菇做配料，加上彈牙的麵底，正！朋友嘅咖喱湯底夠晒惹味，鷄腎入味唔韌，豬紅同冬菇亦出色，呢個湯底比較辣，啱晒鐘意食辣嘅朋友。網紋春卷配上個酸甜醬食落鬆化唔油膩。炸魚皮脆卜卜夠晒鬆化，配上沙律醬好好味！薄荷青檸梳打真材實料，用料豐富，飲落透心涼，正！呢餐樣樣豐富，價錢實惠，我會再嚟幫襯！