翠河餐廳 (已結業)

2019年2月26日（星期二）晚飯套餐叫咗西檸雞同埋肉鬆炒四季豆。例湯先上，係沙葛豬骨湯。撇完兩次油，依然油光泛面，飲唔到！炒四季豆，本應係大路嘅餸菜。點知又乾又燶！賣相醜樣、唔好味！西檸雞個汁酸酸哋、好啱送飯！但係雞件就唔掂！冇錯係新鮮炸起，但炸漿唔香，雞件得個大字件，冇嚟鮮味。炸漿同雞件係兩個獨立個體，完全唔黏連！一字記之曰：差小菜加配例湯或飲品平均都係60-70，價錢平 、不過食物質素唔得！唔怪得食飯時間都唔多人幫襯！要等位都係食物質素嘅保證嚟㗎 ！

这区食肆虽多，但似乎没有边间出色，这间亦不例外。叫了个咸鱼肉饼饭，应该是"薄饼'饭至啱，薄到无伦，鞋过柴皮，咸鱼多骨到痹，食完碟饭好似冇乜食野咁，杯冻奶茶都冇乜冰，D侍应好似听唔倒野咁，真系好唔掂。

真係把幾火。已經唔係第一次 今晚明明都唔算忙 啲員工就係掛住傾計 ,我已經示意咗三四次喺我面前行過見到我都當冇見到, 仲要一聲等等都冇就直行直過。 把幾火走咗， 以後都唔幫襯， 都呼籲其他美孚居民唔好去幫襯。 等佢哋正視員工太差呢個問題。

一肚氣早餐@美孚翠河呢間翠河員工的服務態度不好呢家分店一定不會再來寧願去對面大X樂好過雖然食物、收銀都OKAY是那個樓面不行對客人態度其差不願意下單下單又寸客人仲要打翻其中一個客人的奶茶，奶茶濺到幾個客人身上 是日早上去美孚探望老人 為免老人做飯 當然先醫肚 後探人 來一個炒滑蛋，多士，配沙嗲牛肉米線  炒滑蛋滑 多士香 沙嗲牛肉米線好吃 茶走  茶走香滑 是麥叔叔的奶茶無法媲美 All Day Breakfast  All Day Breakfast應該有的都都有 茄汁豆有 多士有 炒蛋有 香腸有 連薯仔沙律都有 OKAY的

今日去翠河餐廳，明明叫了套餐c，即是墨西哥雞扒併魚柳飯/意粉。我要飯，不要意粉，怎知侍應說魚柳沒有了，所以轉腸仔，好吧，反正我主要想食雞，就轉腸仔吧。連一杯飲料，和例湯。埋單40元。墨西哥雞扒併魚柳飯，剛才說了，侍應說魚柳沒有了，所以轉腸仔。腸仔兩條。雞扒肉質不硬，但又不算嫩，屬於正常軟硬度吧。雞扒份量不算多。如果細食的人，應該可以。白飯一碗。奶茶有茶味，跟其他茶餐廳差不多味道。如果奶味重一點，應該會更好。下午茶40元，這個質素，差不多吧。

下午茶時間去咗翠河，下午茶餐選擇幾多，但價錢較貴。👉🏼炸魚柳+雜果沙律+薯角呢個下午茶，實在難食到冇野想講，炸魚柳條魚極腥，唔點啲沙律醬係完全擺唔到入口，條魚都唔知擺咗幾耐，唔新鮮到極點。薯角賣相唔吸引，一啲都唔脆，一pat野咁，又係要點茄汁先入到口。沙律只係撈咗沙律醬，冇特別，亦冇美味之處。熱檸水係比較飲得落口嘅，檸檬幾新鮮，冇苦澀味，算幾新鮮。總結，以後唔會再來，食物難食，服務差，價錢貴，沒有值得留戀嘅地方。👎🏻

今日相約友人行經一間集團式經營嘅茶餐廳。算叫做找個地方吹吹水。因為我唔係好肚餓就叫咗碟豆腐火腩飯跟例湯加碟油菜兩杯茶就開始我哋嘅話題。本來兩人滔滔不絕可惜比兩杯茶打斷咗，我朋友問我係唔係杯茶掉轉咗，點解杯鴛鴦無啡味，但我杯茶亦是淡淡的無乜茶味。算喇繼續話題，例湯油菜跟住上，我睇睇覺得奇怪我問姐姐係唔係比漏咗蠔油腐乳之類，佢回覆：我哋無蠔油油菜係咁嘅！最後叫佢拿咗一小瓶豉油過來。飯亦到喇我朋友食咗兩啖就講豆腐變咗，我品嚐了一口果然酸了！唯有制造咗不必要嘅厨餘，以為集團式餐廳會有保證點知一樣乃嘢！總括來講食物淡而無味！最能夠刺激我的味蕾就是那塊豆腐了！淡淡的茶餐廳我頒獎比你

其實工作關係，好多時間都係一個人食飯，一個人食飯通常係去啲快餐廳，或者茶餐廳之旅，呢間翠河餐廳就係我經常幫襯的。雖然係一啲普通嘅楊州炒飯，但係唔係度度都整得咁有水準，你間餐廳可以話整得好好食，加上咁嘅價錢，材料都好豐富，所以如果你下次嚟呢間餐廳都可以試吓㗎！

我阿爸都幾鍾意跑馬仔，而家翠河開到好多地區都有，佢就話以前有隻勁馬叫做翠河，搞到佢而家都幾鍾意食翠河基本上每樣野都係幾十蚊又經濟又實惠，裝修完左乾淨左坐得又舒服啲位都幾好。小菜方面確實做得唔錯同泰興差唔多，不過價錢就再平啲。個咖喱牛腩夠晒入味，香味濃郁而且有啲 spicy, 絕對啱晒我口味！一個人一碗白飯都食得晒。魚香茄子直情拍得住酒樓水準，不過就真係好似冇鹹魚粒係入邊。就嚟世界盃，上一次世界盃睇通宵我都係喺呢度

好唔掂 浪費時間 浪費金錢 + 一肚氣飯都可以未熟 又唔夠熱 本人都第一次遇到這種情況 之前食過咖哩牛筋腩飯還可以 今天突登來吃 有烏蠅幾隻不特止 飯未熟 汁少到得四分一 腩得三件 筋得一條 簡直係不知所謂

喺美孚趕時間之下去左呢間茶餐廳食左個下午茶，有好多款揀，連埋餐飲$36，好快咁叫左碟芙蓉蛋飯，因為唔想食咁咸，所以叫左走色，即係走豉油，好快趣幾分鐘已經上枱，芙蓉蛋庶曬住所有白飯，夠足料，蛋亦炒得幾滑，好快趣就食晒成碟野，個下午茶包埋一杯嘢飲，叫左杯熱檸水，成件事連埋單十分鐘左右，啱哂趕時間嘅我，語時話，呢間野已經食過好多次，多數都係趕時間之下去食，佢對面雖然已經有間大家樂，但通常都好多人，排隊買飛再排隊攞嘢食，比較費時。

想食飽飽致開工。經過呢間，醒起之前喺中環返工，午飯都會幫襯呢間。諗下諗下就入咗去坐。叫個早餐食先個多士同煎双蛋正正常常咁。如果双蛋可以燶啲就更好味！個麵就比較硬喇。個湯都正常嘅。吾太咸。火腿絲就一定吾死得人嘅。間間茶餐廳都一樣。嘩！呢杯係咩嚟㗎？？我叫咗凍奶茶少甜少冰喎…… 的確係做到嘅，不過就淡到飛起，奶水嚟，冇茶味嘅……整體上我有啲失望……印象中中環嗰間好食啲㗎。呢間吾係平㗎，啲食物質素好一般。其實呢……服務態度仲更加要改善

呢度真係我見過最差既茶記, 沒有之一呢度其實好大, 但係除左面好d位, 入面果一半基本上係黎左咁多次都無人理既每次黎到都要行出去叫人過黎寫野, 執枱咁呢個位真係差到極點但因為佢真係好近屋企, 有時都會貪快黎左呢度食, 所以都知大約邊d野食好d, 邊d差d佢好食既係咖哩飯, 但其他好多都麻麻地既~ 所以除左咖哩飯我都唔會係度食~如果唔受得氣既, 都係唔好黎呢度喇!

Boxing Day 早上出街搵早餐食，大家樂好多人，唯有過對面翠河踫踫運氣，哈竟然好容易就攞到卡位👍🏼，佢D早餐都算全面算選擇多，價錢唔貴，但無論侍應態度、食物質素、飲品水準，都可以好飄忽，所以我今次嘅評分只係針對今次光顧而定🤣我今日叫左常叫嘅A餐，煎雙蛋香蒜多士配火腿通粉，雙蛋無穿黃，多士唔乾，碗腿通比平時大碗，味道適中，後叫餐飲熱咖啡多奶，今次好飲返喎，前排有D澀喉及淡口；埋單時有D窩心，俾單收銀姐姐，佢一句親切又自然嘅”走啦？！⋯⋯多謝！”，令我個心暖左下。

喺美孚揾地方食午餐，原本想去大家樂食焗豬扒飯，但係遠遠見到條龍排到出行人路，因為唔想排隊，所以去左對面嘅呢間翠河，諗住可以食佢嘅咖哩鷄飯，點知坐底之後發覺居然仲有唔少人食緊早餐，望下隻錶已經差不多十二點，奇怪之下再望一望餐牌，haha,原來早餐喺至到十二點，於是即刻叫個早餐(當係午餐食)，有煎蛋丶厚多士丶火腿片丶沙嗲牛肉米粉丶加埋一杯咖啡(係即磨咖啡，唔係用咖啡粉沖嗰隻)，都只係$31(慳返唔少㗎)，仲好飽肚唷。