莎樂美餐廳

营业中

休息中

好耐之前黎食其實都覺得都幾好味，但係依排黎食過幾次，真係差左好多囉，原本以為真係多人忙得濟質素先所以差左，但我今次六點已黎吃，店入面唔係好多枱客，但原來都係咁差。店員態度又差，個沙律我覺得係最難食個樣野，賣相差之如，個pet沙律係出哂水，塊扒嗌五成熟，但我切開係完全小小血水都無既 。真係*鞋拾拾*。環境又唔太乾淨，唔會再黎食啦

一心諗住嚟荃灣睇好戲 順便食個扒餐 附近無花X餐廳唯有搵間地道啲嘅扒房食睇過啲食評都知依間啲環境一般 比較懷舊啲 估唔到張餐巾真係好似啲人咁講係有咁多窿窿嘅 anyway 食個扒啫 遮到唔彈到個身一撻撻汁就得5點幾左右去到 唔洗等位就入得 叫咗個118嘅什扒餐 有雞牛豬扒雞翼火腿腸仔 聽落一定好飽 不過平過其他 就order咗依個 先食咗個餐包飲埋碗羅宋湯 都好ok之後豐富嘅什扒餐到啦 真係超級大份 侍應倒完肉汁 無咩滋滋聲 可能多料 之後另外俾多隻碟我 我將雞翼火腿腸仔豬扒分開放 先食扒類 雞同豬都正常 但牛扒硬到我以為自己食梗叉燒 雞翼係紅燒咁嘅 唔太啱我口味 腸仔又咸咗啲 其他都一般慢慢食 慢慢食 都係食唔晒 好飽咁樣樣食咗一半左右本身仲有雪糕做甜品 可惜係朱古力味 無其他揀 所以最後我都無食就俾錢走 埋單130

好耐冇食，環境都係咁差不過今次唔洗等位就入得lu搞笑。。。真係好耐歷史，塊布穿晒窿，d煙會唔會吹過黎嫁嗌左周打魚湯，好後悔，早知嗌紅湯，唔想食塊梳打餅羊架餐正！！份量都好多，一定夠食，我個份比家人好d，佢地好多肥膏，直情得兩隻手指厚既肉。我個份就好好，有肉有肥，有時d肥膏好香，一齊入口先正！！最後加雪糕！！但因為環境丫，d人好似好趕丫，冇左d美感，好似搞到我都要快咁！！扣左分，有時覺得懷舊式，唔一定態度上做到咁求其。

Lunch同老公好想去食扒 突然想起荃灣有間老字號既西餐廳 老公話細個已經食佢 我貪心咁更係揀食什扒囉 當然鐵板係佢地最吸引我嘅原因 d食物keep 熱辣辣 有湯 有面包 有甜品 有飲品 講緊$100 有找 份餐黎到成坐山咁大份量 如果細食真係兩個share也可 提一提汁嘅選擇 老公必選黑椒汁 我喜愛燒汁 其實還有洋蔥汁嘅 真係有懷舊風味 不過佢地嘅餐巾幾嚇人 穿晒窿架 d 鐵板遇到汁嘅煙充滿間餐廳 不過食材真的假不了 牛 雞 豬 雞亦 火腿 & 煙肉 薯菜 可另加飯or意粉 啱晒我d食肉獸 啖啖肉 超滿足 同埋d肉無雪味

一班廢青食Re-u飯緊係要大件夾抵食。呢間莎樂美就正中本廢青原則啦!未去之前已經聽同學講話間野係佢以前中學嘅窮人恩物，夠飽價錢公道，但係唔好對味道抱有太大期望，所以一開始都冇話有好高期待。去到門口一望係有D似高級餐廳FEEL，入面環境有D暗，但上到2樓就冇左D情調。同行男友人就叫左各自叫左一個雜扒餐，包餐湯、餐包、雪糕仲有杯野飲，埋單一個人都唔洗$110，而且以男仔食量黎講都食唔哂曬一個餐。間餐廳好在冇話最低消費幾多，所以我地幾個女仔2個人夾埋食一個餐都係勉強食得曬，Share返都係60幾咋，晚餐黎講都算係學生恩物。

適逢週年紀念，梗係要去慶祝下喇，又去到糧尾時候， 咁見上網見到莎樂美鋸扒又唔係好貴，咁就去試下啦，一去到個環境其實都幾舒服，都幾有情調嘅，我見到佢一餐都係百零蚊，都有好多餸架，塊排都好厚好大份，而且都有湯呀有餐包呀， 有埋薯條食，又有野飲， 如果講分兩方面真係冇得輸㗎，不過如果講好唔好味呢，我覺得可接受，不過塊肉係會覺得落咗好多鬆肉粉， 而且叫六七成熟，黎到都係全熟架啦，所以食落去都有老囉，不過算啦都係百零蚊，性價比都已經係好高㗎啦

很久沒有寫食評，實在按捺不住非寫不可...昨晚九時許與丈夫晚膳，多次來這裡進餐已深知這裡衞生情況欠佳兼沒有服務可言，但始終對老舖有份情誼結,所以來個「隻眼開隻眼閉」。坐在樓上近樓梯位置，慣常叫了「西冷」及「美式什扒」配白湯。白湯很咸，已接近接受不到的程度，微暖；餐包正常。還未吃完那個餐包，女侍應已走過來收走牛油及碟子。拿走湯碗後，馬上放下一兜燒汁，但扒還要等好一段時間，看著燒汁冒著煙都等到放涼了。主角來了...　女侍應已急不及待問我們餐飲的「柯打」，我們沒有理會，打發了她。薯菜換來一塊「千年油薯餅」，咬下去這塊深啡色三角形硬塊，只覺得經過不只一次的「翻炸」，那陣臭油味濃烈。扒，很明顯「縮水」了，「什扒」的牛，變了牛柳小粒；豬扒，肉質是「霉」，「西冷」的扒，像是被切去了一半，而所有肉類沒有肉味。吃罷還很口渴，調味很重手。上意粉、餐飲時，侍應隨意放，意粉放上餐叉上，欠些打翻；飲管放在餐檯的骨頭上；扒還未吃完，已上雪糕。已非繁忙時間,為何這樣催逼呢?!用餐吃了一半的時候，鄰檯冷氣槽下的三位男生𥤮然「嘩」了一聲，隨後見到冷氣槽罅隙位有很多黑色灰塵以及狀如黑豆的物體緩緩滾下來，在場人士，如果是熟

天氣炎熱，假日最好就係同埋個女一齊出去行商場嘆冷氣！今日黎左荃灣一行，尋日同事話呢間餐廳好出名，好味夾抵食，就拉太太黎試下睇睇menu，假日鐵板餐一啲都唔貴，有湯有餐包有野飲有雪糕都係$64！呢啲價錢去邊度搵？我地揀左周打魚湯，湯濃又夠味，餐包熱辣辣，配埋食簡直正！扒我揀左黑椒美國薄牛扒，都唔係好薄啫黑椒味正，真係有啲嗆喉感，牛扒上到枱已經全熟到了，剛剛好！肉質嫩滑，唔韌，仲食到少許牛味！我最欣賞墊底的薯條，條條粗大，就算係啲汁浸住，我都覺得仲好脆！食飽仲有朱古力雪糕球，好美味的一餐呀！搵晚黎食晚餐先！

男士們喜歡食肉，我另一半也不例外。由於佢好鍾意食肉，所以佢呢日就帶我去呢間到食。我叫了一客肉眼扒鐵板餐，前菜有甜餐包，同湯。甜餐包香甜軟滑，羅宋湯酸甜微辣，十分開胃，配料雜菜十分足夠。肉眼扒可要求熟度和醬汁，我要了6成熟和洋蔥汁。肉眼扒份量十足，厚度好夠，入口鬆軟有咬口，肉質鮮美，肉汁完全封鎖在扒內。

莎樂美係一間歷史悠久既老店, 中學年代有咩慶祝活動都會去食一餐好既. 最近經過想懷念一下, 所以入左去食晚餐. 內部裝修同以前一樣, 無咩變過, 枱面仍然有棵好舊的膠玫瑰.晚餐有個鐵板牛柳粒飯$83, 牛柳粒份量幾多, 肉質唔夠軟腍, 無乜肉香, 祗能靠個汁提升味道. 跟餐有周打魚湯, 夠忌廉味, 稠身唔太稀, 不過無咩材料.整體味道已變一般, 不過服務仍然保持, 份量亦十分足夠.

上次同班朋友唸住去食扒既時候，因為呢頭都多扒房於是我地就黎左餐廳到食扒。餐廳環境好幽雅 至於服務方面 侍應 嘅態度都非常良好上菜速度普通 至於餐方面份量非常足夠 牛扒亦都非常厚 口感好鬆軟 配汁火方面亦配合得好好 豬扒都係厚切嘅 啱曬大胃口嘅朋友

由細細個時已好鐘意幫襯依間莎樂美, 服務生很好, 杯朱古力雪糕依然吸引, 好好味但當日叫左碟焗豬扒飯食, 塊豬扒應該用'嫩肉粉'浸左好耐, "林"到將近"梅"肉一樣及超級勁"咸"根本食唔落... 負責做焗豬扒飯那位廚師要認真試味或再試食自己既手藝了

莎樂美出咗名啲西餐就係抵食夾大件，不過呢呢隻就係港式西餐，都算係有佢嘅特色啦！但今次唔係想介紹佢嘅扒餐，只係想講下呢度好正嘅懷舊嘢！由細到大都好中意香蕉船，就係兩條蕉夾住好多嘅雪糕，有啲啫喱忌廉脆脆餅係上面。雪糕有士多啤梨香草同埋朱古力味，我估係用雀巢啦。最鍾意嘅唔係佢嘅味道，而係食得返小時候嘅一種回憶。

今晚和老公選擇西餐作晚餐，選擇了歷史悠久而味道都保持水準的莎樂美。我叫了一個西冷牛扒，七成熟，和羅宋湯。羅宋湯熱辣辣，而雜菜的料很充足，十分好味，十分推介！西冷牛扒明明叫了七成熟，卻是上了三成熟。告訴了侍應，他立即幫我將塊扒拿入廚房再煎過。牛扒肉質很冧，很入味，真是大件夾抵食！套餐附送咖啡奶茶，而凍飲不用加錢。套餐亦附送雪糕一球，非常抵食！可惜我覺得衛生仍有待改善。事緣在我們吃雪糕的時候，有個侍應在我們附近剪指甲！！！雖然有一米多的距離，但這關乎衛生的問題，怎可能在乘客面前剪指甲呢？十分嘔心！

今日和屋企人黎到荃灣食晚飯,屋企人1早巳選定了食莎樂美,這裏環境以氣氛為主,暗暗的,全埸只用射燈仔來照明,但裝修比較舊,我點了雜扒餐,1見雜扒餐來到,原來是很大盆的,基本上豬扒,牛扒,雞扒,火腿,腸仔,全部都有,食落味道好食,全部以炸物為主,肉味足煙韌豬扒味有豬味,牛扒有牛肉味,雞扒味有雞味,份量超多,食唔哂