金記客棧 (已結業)

母親節一家大細睇睇戲，買完飛未夠鐘一齊試下隔離新開金記客棧。入邊裝修都唔錯，三個人坐得舒舒服服，打開menu揀左幾款金記冰室無既試下，避風塘焗中蝦幾惹味，夠晒香脆可連殼食，最啱我呢d懶人。避風塘蒜香炒辣蟹無記錯仲有椒鹽、咖哩揀，隔離枱就叫左椒鹽，唔係我八卦人地，係因為坐係隔離都聞到勁香，即時有d想轉軚，話口未完就黎左，唯有下次啦。避風港炒都好味既，蟹肉本身夠鮮甜，但覺得辣方面可以重手返d。明爐燒鵝例牌張相影得衰，其實三個人好夠食，另外叫左兩個白飯share差d食唔晒，無計啦，要留肚夜晚食大餐嘛。話明明爐燒鵝，下邊堅有明爐，鵝皮夠晒香脆，口感好過出邊好多舖頭，最起碼我Like。最後埋單三佰頭，唔係貴啦又蝦又蟹，好食就抵食。

兒子忙於準備考試，要將慶祝母親節的活動延後一星期，所以決定應友人邀約，去數碼港走一轉。先到數碼港的商場逛一會，再去室外閒遊，聽友人講，Cyberport Arcade 入面有唔少水準不俗的食肆，就一於趁這次機會順道看看。會合友人後，由佢帶路，去了新開的《金記客棧》，原來此店是《金記冰室》的另一品牌，據說這個新成員是以 70 年代的避風塘小客艇為主題，除了招牌菜胡椒辣蟹外，鑊氣小炒更是廚房師傅的拿手好戲，聽落好似幾吸引，況且友人早已經安排好一切，入座後，安心等吃便可以了。既然餐廳以「客棧」命名，店內布置自不然充滿老香港情懷，例如放置於用餐區的中式木桌椅、設計成武林秘笈的餐牌、用來盛載砂糖的經典紅雙囍漱口盅等等，流露著古樸懷舊的味道，裝潢的確別具心思。事不宜遲，人齊後立即開餐，先來一客惹味小炒椒鹽鮮魷 ($88)，據說成品是用上每日新鮮返貨的鮮魷，再配以薄身粉漿製成。鮮魷表面炸至金黃酥脆，入口鮮嫩爽彈，吃起來鮮香誘人，連喼汁也不用蘸，味道已經極佳。秘製蜜桃咕嚕肉 ($78)，咕嚕肉用上新鮮肉排切件炸至鬆化，再加入酸咪咪的醬汁，並拌以蜜桃、雙色椒及洋蔥同炒，吃起來不但脆口、而且酸甜度恰到好處

今日同朋友去數碼港影相, 影到差唔多食飯時間諗住番出中環先搵野食, 咁啱見到有間新野, 朋友話橫掂番到出去都要諗食咩, 於是一於試下啦.間野係數碼港, 諗住都唔係平架啦, 但係出得黎食都係咁上下, 一場黎到就試下啦.因為時間尚早, 人唔算太多, 好快就已經有位, 一坐低就已經見到有本"秘笈", 咁搞鬼咁就睇下有咩咁西飛利.原來間野主打好多野避風塘野, 咁當然叫一兩碟啦, 我地就叫左避風塘炒蟹同蝦, 仲有叫左煮蜆同蒜頭炒棻.落左單之後D野已經好快黎.D蟹炒得唔錯, 夠惹味, 同D薑蔥一齊爆香一流, 同埋D蟹肉都入哂味.之後再黎個炒蝦都唔錯, 大隻得黎又辣辣地, 仲要係入味, 唔係好似出面個D咁D味係哂個外殼入面無味.之後黎埋個菜同蜆都唔錯, D蜆真係足料的, 有圖有真相.之後我地都係覺得食依D一定要有埋白飯先夠完滿, 最後一人一個白飯連埋佢D配料清場.

咁啱去數碼港出席活動後，又咁啱知道之前有食開嘅餐廳已轉手為「金記客棧」，而且在試業中，此餐廳是金記冰室集團以冰室以外另一系列，從門口電子屏幕見到主打避風塘菜式，身為金記粉絲，當然是試試。得兩個人關係，只點了明爐燒鵝例牌($108)、馬來咖喱牛尾煲($88)及椒鹽鮮魷($88)。明爐燒鵝例牌($108)，碟下面有點著火，令到食燒鵝時仍然微熱，鵝肉肉質算嫩又好咬口，鵝皮仍脆口，皮下沒有太多肥膏。馬來咖喱牛尾煲($88)，金記集團的咖喱是做得不錯的，另外不是太多地方有牛尾供應，所以要試下，咖喱汁味算夠濃，可以再香濃啲，牛尾吸哂啲咖喱汁，又夠淋，伴飯一流。椒鹽鮮魷($88)，鮮魷夠新鮮，脆漿炸得香口鬆化，魷魚煙韌彈牙，佐酒良物。可能因為試業關係，有些伙記未夠熟手，希望快些改善，大致上食物水準真是不錯的，原來有間VIP房，下次要拉大隊試多啲避風塘菜式。

期待了一個多月的金記冰室終於在數碼港開店，店名定為金記客棧。在它裝修期間，每天經過都窺探進度，等特美食。今早（4May)返到數碼港懷著期待的心去食個美味早餐，一睇餐牌，早餐套餐，承惠HK$42，包熱飲。雖感覺不便宜，但為美食多付一點，以為是值得的！奶茶 - 差先來一杯奶茶，與西環金記有極大分別。數碼港的金記客棧奶茶，超多奶，無茶味，比麥當當的更要差。煎雙蛋多士 - 蛋正常、多士淋晒一端上餐桌，馬上食口多士...唔脆，係「淋」架，靱架...再望真啲，外表係多士，但應該放了好一段時間等待我叫餐。鮮牛肉通粉 - 戲肉...極差牛肉被處理後無牛肉味，似經梳打粉處理過，全無鮮味；通粉淋到似浸了好耐，湯底...無味、無味同無味。職員態度 - 冷淡X子小廚原班人馬做樓面，一如既往，對顧客冷淡，差啲以為去了X子小廚。現在呢啲服務態度點留住個客人？因有此遭遇及食到咁差質素嘅食物，所以決心在Openrice 開個戶口同大家純分享。