金龍泉 (已結業)

星期六因爲要同大女去小學買書買校服，所以就一早出左長發，見又未夠鐘又有d肚餓，就打算一家五口去搵間茶記個早餐啦。呢間茶記我記得之前係係商場入面嘅，但可能加租所以迫住搬左落去街市，新開嘅所以環境不算太差。我2個大女叫左個腿蛋治餐，其實真係通漲左好多，三文治餐都要27蚊，但我知其實出面好多茶記都已經收呢個價，但小朋友食得唔多又揀食，基本上係焗住要叫比佢地。腿蛋治都係同平時出面嘅一樣水準，但奇就奇在佢係咁多份早餐最遲黎嘅....我就叫左個煎蛋榨菜肉絲米粉，30蚊嘅餐，隻蛋中間仲係流心嘅，米粉係超力個種比較淋身嘅但起碼應該冇漂白？！榨菜肉絲都係罐頭啦當然，但就成碗麵偏淡，個湯底似滾水。老公叫左個火腿，腸仔，煙肉，茄汁豆，厚多士餐，呢個餐要35蚊，個人黎講係十分唔抵，但我老公就好中意叫呢d餐，貪佢咩都有咁，每樣料都得一件，茄汁豆得好少....所以係貴夾唔飽肚嘅。

話說長發街市裝修完畢，除咗翻新咗個街市外，仲開咗好多間小食店，好似話領展想塑造青衣夜市喎… 喺眾多小食店內亦開咗呢間茶餐廳。其實金龍泉開張至今食過三、四次，雖然每次都係黎食下午茶，但都可以寫少少介紹一下。金龍泉嘅下午茶係每日下午兩點至六點供應，食咗幾次都係叫燒味，叫過燒鴨米（要鴨胸）、叉燒河、叉燒賴，加杯熱飲一共$30。有時食叉燒最驚就係得個甜字，但呢間的叉燒唔會過甜，啲肉質都好柔軟同肥瘦得宜。份量喺下午茶餐黎講都算大碗，配菜果兩條菜心幾腍，湯底有韭黃味，唔係普通料。好喇，講完食物質素喇，改嚟講下間餐廳主要問題，其實係先天性問題…入金龍泉食野好似入咗黑洞咁，因為收唔到電話訊號。就算有一次我坐個收銀側邊都只係收到一格咁大把，更加唔好講話用黎上網。雖然餐廳有兩部大電視，入去食完出黎又唔洗成個鐘，但現代人有邊個唔上網？總言之餐廳老闆要諗一諗計搵啲專家解一解決呢個問題。