雲桂香米線專門店

营业中

休息中

還有晚市的時候，也曾光顧這一路徳圍分店。荃灣說是香港米線粉麵最密集的地區之一實不為過。雲桂香分店實不為多，記得其經營年分比譚仔短，但質素控制較佳。配茶大路，該有都有。五款湯底，今晚想食小鍋酸菜。都算快手，熱辣辣。湯底濃厚，有花時間煲過，幾好。配菜選了雞絲，唔掂，好鞋。見有蟲草花雞湯，但我相信是煲湯雞，無味。冬菇好食，淋滑又有菇味。腩片，有軟骨，是刨片再滷，唔算鞋，入味。忘記了是魚卷？可以不點，切開了再炸。整體而言，質素對得上價錢，不妨一試。

喺好耐冇食嘅雲南米線🤩 大概有大半年冇食了 自從網上授課好少食到呢間性價比頗高嘅米線了🥲1️⃣墨魚頭 雲吞 小鍋米線小鍋米線一直都係我嘅最愛，湯底酸酸甜甜加少少辣嘅肉碎 真係好好食！ 😋😋但今次荃灣店嘅湯底同之前食嘅唔同，唔夠酸 肉碎都唔夠入味 米線亦唔夠淋身😕 墨魚頭 好彈牙爽口 亦好足份量 有10大部分同啲短短地嘅小部分 每次黎都必叫！而雲吞則太厚皮了 有少少食唔到饀的味道😕2️⃣豬軟骨 腩肉酸辣粉酸辣粉反而有驚喜，平時唔食酸辣粉嘅我 今次覺得個湯底較小鍋米線嘅入味，酸味夠令人胃口大增🤣👍🏻👍🏻豬軟骨肉同腩肉依然都係出色，軟骨好淋，但不失口感；腩肉半肥瘦加少少辣 啖啖肉真係好正，令人想不停食落去啊🤩

其實都覺得呢間野水準越嚟越差不過今日自己犯賤想食薯粉又走咗去買今日唔算肚餓但係口痕，咁就淨係嗌一個餸嗌左外賣小鍋薯粉小麻辣+雲吞 （本身都幾鍾意雲吞水餃又見佢menu有個雲吞湯, 諗住應該OK掛）個湯同啲配料都係嗰啲嘢啦，正常質素但係食食吓發覺啲薯粉好少，雲吞有兩大粒但係唔好食🙅🏼‍♀️ 芽菜酸菜都算多嘅但係呢啲配菜食唔飽我女仔，平時食量都唔大，雲吞真係麻麻哋淨係食咗一粒，薯粉食晒但係唔飽，仲要我本身已經唔係肚餓😂份量真係比以前少食左個寂寞👀

沒有跟政府勸喻，全部枱位置照舊，沒有封枱，沒有1. 5米距離，人人可搭枱，同陌生人一齊坐。門外又沒有人量體溫，入到去坐低，才有人同你check body temperature，sorry，太恐怖，以後都不會去了。在進食期間，不停有客人沒有戴口罩行去counter俾錢，好危險。食物太咸，沒有辣味，食完十分口乾，份量又少，難怪現在已遠遠被譚仔拋離，連我呢個忠實fan都怕怕了，無下次。有時自己愈做愈差，客人俾機會你，都要自己珍惜。

荃灣路德圍多米線就係眾所周知，有一間呢就屹立不倒好多年，就係我今日去食嘅雲貴川米線，呢間野我由中學識到而家差唔多30歲，非常多回憶。唔係好肚餓嘅關係，我今次只係叫咗豬頸肉小窩米線小辣，同埋凍豆漿，落咗單大約10分鐘就有嘢食。一想到枱見到咁多芫荽，心諗正呀，啱晒我呢啲咁重口味嘅人。食米線最緊要係個湯底，雲貴川呢度同其他米線唔同嘅地方係，佢個湯底唔係淨係得辣味同酸味，你好明顯食得出佢有一浸肉味，令到個湯底唔會好單調。再講一講豬頸肉嘅味，拍得住出邊啲東南亞餐廳，爽身有肉味，好唔錯。最後埋單45蚊，正常價

以前鍾意食其他間近兩年開始轉口味，主要係酸辣米線百食不厭bty炸雞翅係好好的選擇 不婚雞翅要現場食 一級棒 我阿媽老人家就比較鍾意蒜泥白肉多D鴨腎我就麻麻 見人見智啦通常我就去太子店多D 態度都ok荃灣店少去 不過太子店位寬闊d個人選擇:小鍋米線 中辣 海帶 外+一份炸雞翅+一份蒜泥白肉 以上

雲桂香米線專門店荃灣路德圍22號地舖荃灣路德圍一直係區內既美食天堂，其中最多應該係食米線既鋪頭，起碼超過5間以上，不過我唸到唔使唸永遠都一定係幫襯<雲桂香>呢間米線由1x年前初中時代，成日同同學仔一齊黎食，直到而家都係路德圍屹立不倒，真係好有感情，而且味道都係咁出色，保持到質素，每隔一排無黎，又會心思思想落黎食返碗米線1.首先要揀左麵底先，我自己一定係食小鍋米線，不過除左米線仲可以揀紅薯粉，水晶粉或者涼伴都可以試下2.跟住就要選擇辣既程度啦，由小小小辣至到勁辣，總共有6個級數，可以按自己既接受程度選擇3.最後就係揀自己鐘意既餸菜啦，我就最鐘意食呢到既腩肉同豬軟骨，整得好入味，每次黎都要食最鐘意呢到既湯底，真材實料有芽菜，酸菜，韭菜，葱仲有芫茜烹調而成，而且仲有好多肉碎，入口酸酸辣辣咁，真係滋味

今日同朋友去完堔水埗，行街睇格仔鋪，因為飲左咖啡，食左蛋糕做下午茶，就唔太肚餓，咁我地就決定返荃灣食米線做晚餐，之後再返屋企我地8：00左右到荃灣路德圍，就睇下食咩米線，咁我朋友就想食雲桂香米線，咁我跟佢，去到米線鋪，見到好多客人，全部坐滿哂，等左一陣就入去我叫左小鍋米線小辣加大腸米線質地好滑，而且唔會過淋，湯底酸酸辣辣，配米線一流，大腸滷得入味，唔會咬唔到，我食過出面有d大腸，跟本咬唔開，這間米線就做得好

大大碗價錢好平,食品相當唔錯有幾種特定既配搭俾你,首先選擇其中一個,辣方面都有好多選擇,微辣,小辣,中辣,大辣,特辣等等,當然都有唔辣,但係因為佢本新有肉碎,而肉碎係有少少辣,走辣既時間就會連肉碎都冇埋,有少少清, 我地今次食既係佢既小鍋米線,面我就走左唔辣,所以冇肉碎,但佢都唔係清湯黎,味道還好而餸方面我就叫左豬扒,豬扒係炸既,可以另上,咁就唔怕放入湯度搞到軟棉棉,味道方面就非常香口,雖然係炸,但係都唔會好油。地理位置非常好 荃灣MTR過去只要5分鍾

不嬲食開，0K，好味，今日領教某d態度差的員工吾係人人都咁健康，加上天氣轉涼，冷氣大吹住頭，問可唔可以向上，扮完㩒制仲吹到紙巾都就吹落地隔離坐食完再問可唔可以調位又話俾2個人，咁即係趕客其實好味嘅米缐有咁多間，都吾一定揀佢態度最好嘅員工係收銀個位有笑容有禮貌Dated 19/11

雖然是米線的忠實支持者，但卻不是常常吃米線。在街上很容易便找到一家米線店，但好吃的卻不多。這家位於荃灣的米線店，我卻常常光顧。米線的淡或濃都是任君選擇的，我喜歡吃清淡的，但吃清湯米線實在有點單調，便點了小鍋米線加豬大腸，味道為少辣。米線湯底很濃烈，酸辣的程度也很夠味，雖然是辣，但很易入口。米線的質地幼長潔白，口感不錯，烹調時間剛好，軟硬適中。配料亦很多選擇，但由於麵既份量很多，加上小鍋米線附上的肉碎酸菜等的附料很多，我通常只會叫一道配料，不然便吃不完~

今次呢一間係我仔介紹我嚟食，因為佢之前試過沙田嗰一間佢話好好味喎，所以今日特登同咗佢嚟荃灣呢一間食，我哋各自叫咗小鍋米線再加餸。第一碗小鍋米線走辣加肥牛加雞絲，雖然加嗰啲餸係好普通但係配合埋小鍋米線裏面嘅味道都幾好味， 飲品就叫咗個凍朱古力 ; 另一碗就係小鍋米線走辣加豬軟骨加雞翼，個豬軟骨個味道好好味又冧，雞翼啲鹵水味亦好濃郁入味，雖然碗小鍋米線唔係辣嘅但都好ok， 飲品就叫咗鹹檸七，懷念以前嘅味道 ; 再加咗個醬伴皮蛋小食係有少少辣嘅都可以接受ok

之前食譚仔食到生無可戀，網友介紹食依間好過食佢。真係無食過，又比人貴，客又唔多，但對手低咗可能顯到佢高返，試返次。雞絲菜心小鍋米線，湯底同麵都有幾款，試個最穩陣，首先米線量都多，夠爽滑，湯底係荃灣最出名老闆娘過隻味嘅超淡化版，最勁係個菜，菜心多到變主角係好事，不過菜都要熟嘅，硬都預咗，但粗過幾條咬落仲有菜腥味真係接受唔到，仲有雞絲，我唔專登夾出嚟驚你唔知，食麵唔一定要雞絲嘅，成本高到睇唔到不如唔絲啦，起碼要食到有肉。麻辣青瓜，首先麻辣為何物？酸有關？成兜嘢只有陳醋同蒜蓉，係好上味，浸住過啲直頭濃味，但肯定同麻辣無關。主角青瓜係正常嘅切件，新鮮，唔講依啲真係無樣好。結果完全高唔到，誰叫荃灣有個老闆娘，未食過佢可能先會覺佢湯底得。

好多間食米線都只係有米線，原來雲貴香係有得轉米粉。 米粉已經令我開心，點知佢仲有墨魚頭呢個餸。好似係$13。加埋個通菜，整碗米粉係$47個湯叫咗微辣嘅麻辣！岩岩好食到口😂墨魚頭佢都俾咗好多，菜份量都唔孤寒！都係啲通菜仲有少少啱啱綠完果種青味

荃灣真係有好多米線餐廳, 今次黎到雲桂香, 朋友好鍾意食米線架, 話要帶我食盡荃灣米線喎。 平日晏晝黎到已經爆哂好多人, 等咗一陣就可以入座, 未食過佢既辣就由小辣開始啦, 另外點了一個麻辣拍青瓜。麻辣拍青瓜, 勁多辣味, 比一般辣, 但青瓜清爽吾互補, 做前菜一流。小鍋米線本身有哂芽菜酸菜肉碎等等, 都已經好惹味, 我就叫咗魚肉春卷, 蘿蔔同雲吞, 值得得一提米線屬於幼少少, 而且比一般米線多咗煙韌感, 我幾鍾意食佢呢隻米線。 蘿蔔都夠清甜, 雲吞仲好大粒好足料添!呢間米線我幾鍾意, 會成日黎食。