1+2 餐廳 (已結業)

1+2豬扒餐廳，一聽個名就已經知係一間主打食豬扒既餐廳。響旺角區黎講，價錢算好抵。話晒一個價錢$80左右就包晒湯，飲品同飯。我地叫左2個餐。當然其中一個係招牌豬扒飯。豬扒好食，啖啖肉，而且肥瘦有齊。汁都好食又唔會太稀或太澀，而且份量岩岩夠撈飯，最緊要係芝士好多，岩晒我呢d芝士迷！勁推薦！另外就叫左個咖哩牛痢。呢個就有d一般了。牛唔夠入味，咖哩亦似平時自己屋企整既味道。不過我地最後結論係，1+2似係一間高級版茶餐廳。

岩岩同朋友係朗豪坊行完街，我地都覺得有D肚餓，所以搵左依間食下午茶。我食炸魚柳湯意粉，而同行朋友揀左炸豬扒公仔麵，炸魚柳同豬扒應該新鮮炸，等左大約10分鐘，2款食落都係脆卜卜，炸魚柳就比較普通，食落有雪味，沙律醬偏甜，點埋一齊食，我就覺得唔太夾。意粉麵質一般，湯底應該係用普通豉油調味，再加埋少少炸蒜，整體入口較淡。 炸豬扒食得出用美極醃過，一食落好大陣美極味，都尙算入味，不過我同行朋友話公仔麵麵質好差，仲差過大光麵，下午茶餐$47一碗麵加熱飲，抵唔抵食真係見人見智，不過我地無下次!

每逢lunch諗食咩嘅時候，一定會諗起公司附近嘅呢間1+2豬扒🐷~而且每次同同事都會清一式叫B1:香煎豬扒+薯菜+黑椒汁落單之後，通常15分鐘內就會送到~好難得有豬扒可以全公司同事都咁鍾意食~高峰時期，平均每星期都叫到3次外賣🤣🤣食咗咁多次，煎豬扒都保持水準~每次都煎到金黃色，又鬆軟~👍🏻👍🏻至於隻蛋嘅水準就無咁穩定，有時係流心，有時就全熟~但最欣賞呢個餐嘅係，每次都會配上一條茄子🍆、一堆薯條🍟&一堆蔬菜，啱晒我哋呢d平時返工少機會食菜嘅OL~感覺成個餐都健康晒~😍😍$50左右就有咁多嘢食，仲有菜&熱飲，真係超值~ 以為叫外賣都可以繼續無限encore~😆

其實我本身唔太鍾意食豬，但唔知點解公司附近有兩間豬扒都深得我心🤣一間係天機棧另一間就係1+2，兩間各有特式。前者係炭燒呢間就用香煎。講返主角先，叫左餐廳推介no.1嘅香煎豬扒蛋飯，$50連一杯熱飲，外賣加$1。食左咁多次塊豬扒都keep到個質素，煎嘅火喉/時間調校得好好，外表脆脆地啱啱鎖住d肉汁，食落好腍滑。汁有好多選擇，有蒜茸汁/洋蔥汁/黑椒汁/咖喱汁/茄汁/豉油，我個人鍾情黑椒汁，夾得嚟唔會太過搶左豬扒個味道（佢地仲有個加錢嘅皇牌沙嗲汁，係惹味嘅，不過我略嫌太搶）。除左豬扒佢地最大嘅特式係跟一條煎香左嘅茄子，同埋少量雜菜，雖然油左少少不過好食就得啦🤪唔好忘記仲有隻蛋，不過因為外賣嘅關係個蛋黃嚟到已經穿左😭

之前行過1+2豬扒餐廳，見門面唔錯，就拎定張外賣紙，今日就決定叫外賣試下!既然叫豬扒餐廳當然先試下豬扒！餐廳做緊椒鹽豬扒飯，外賣自取立減10元，但因天氣太熱，唔想出去，最後叫左餐廳推介的香煎豬扒蛋配薯菜，可以自選醬汁，我就揀左我至愛既黑椒汁。落單後大概15分鐘已經送到!打開外賣膠盒，最驚喜係有一條長長的茄子，真係意想不到!另外，當然有一大塊煎豬扒，仲有菜有蛋及薯條，好豐富!豬扒肉質好鬆軟，煎得好香而且鎖住肉汁，唔會太乾，好好味!p.s. 原來堂食有個沙嗲汁好好味，但外賣就試唔到，有點失望!

呢間餐廳食豬扒出名，我都係受同事影響，所以決定試試，佢午餐B1 豬扒煎蛋飯又真係唔錯喎😛😛裏面仲有d雜菜同茄子，個飯既份量都算大，因為佢連塊豬扒都好大塊😋佢有得自選汁，有黑椒汁，咖哩汁，茄汁，蒜蓉汁等等，選擇都好多，隔唔中食下都唔會厭。仲可以揀薯菜/飯/意粉，佢塊豬扒唔會話好乾，餸飯一流，不過個煎蛋就一般，但重點係塊豬扒度都正常既🤣但係個價錢又唔算平，一個飯$48 未計凍飲同外賣，如果平d既話，整體感覺會更吸引。下次有機會都希望可以試埋牛扒 ，感覺上都唔會太差🙈

1+2豬扒餐廳個名咁特別， 一於走入去試吓先☆*:.｡. o(≧▽≦)o .｡.:*☆真係估唔到叫咗個豬扒飯，竟然有咁多配菜(>^ω^<)首先講吓我最鍾意食嘅雞蛋(*☻-☻*)雞蛋煎到半山熟，撈埋啲飯一齊食，味道簡直難以形容，蛋同飯嘅香味配搭一齊，好好味(⁎⁍̴̛ᴗ⁍̴̛⁎)估唔到竟然有茄子（≧∇≦）仲要係咁大條嘅 茄子（≧∇≦）你幾時落口唔會覺得好油，仲有啲鹹鹹地嘅汁加埋一齊，味道都幾好㗎↖(^ω^)↗最後我想講嘅係嗰件豬扒，真係估唔到有咁大塊，如果放落塊面度，有半個面咁大，咬落去啖啖肉，我諗下一次我會再嚟食，因為真係覺得好大件呀。（＾ν＾）

餐廳位於旺角，多得有次朋友帶我嚟食先知有間唔係咁起眼嘅舖仔，今次到我帶幾個朋友仔嚟食。餐廳樓底好高，座位唔多，客人亦比較多，食物質素唔錯，價錢又唔貴。香煎豬扒飯，豬扒鬆軟，茄子仲保留靚靚嘅紫色，有菜有蛋，都幾豐富。鮮茄燴牛脷意粉，意粉同個汁嘅味係唔錯，不過牛脷好細件，而且好少。吉列豬扒腸仔飯，扒炸得好乾，外面有啲硬。鮮茄焗豬扒飯，豬扒切塊，都幾厚，飯粒粒分明，好味。芝士蘑菇煙肉燴意粉，無咩芝士味，整體可以。

日日係旺角返工，諗3餐食咩基本上係我地一班同事最頭痛既事，今日lunch去左朗豪坊附近呢間1+2豬扒餐廳, 既然個名叫豬扒餐廳當然係嗌個豬扒飯試下啦！今日嗌咗個香煎豬扒煎蛋飯，可以自選醬汁，我就揀左我至愛既黑椒汁。個飯既份量好充足，一大塊煎豬扒，呢到個配菜竟然有一條茄子，好少地方會見到呢個組合，不過條茄子都好好味至於個主角--豬扒，真心覺得好好味，原先見到咁大塊，仲要有返咁上下厚度，都有啲驚佢煮得好乾，但係食落仲好 juicy，非常好味!

The food here is surprisingly good for the price. The dinner set comes with garlic bread, soup, a drink and a main dish. The garlic bread is very tasty and the soup is a good size portion, the iced lemon tea is refreshing and the meat is tender and juicy.  The service is quick and professional and the downstairs seating is a good diner atmosphere, but the upstairs space has much to be desired. Better to stay downstairs to eat. The staff do not speak much English, but they try their best to help.

黎食午餐，唔駛等位，卡位搭枱，無所謂啦，都坐得舒服，唔迫唔嘈。我叫左炸雞脾蛋配薯條，朋友叫左椒鹽豬排配薯條，兩個午餐跟野飲總共$100, 唔貴，侍應好有禮貌，落單唔會好趕急咁，我朋友唔知揀咩汁好，侍應就主動講通常其他客鍾意揀咩汁去配呢個餐，幾細心。炸雞脾唔係想像中炸粉炸到外皮好吉列好脆果種，所以感覺無咁熱氣，雞肉唔乾身，味道正正常常，薯條就外皮硬左少少。至於朋友叫既椒鹽豬排配薯條，第一眼見到覺得好細份，因為d椒鹽豬排係切左一條條的，要配飯先會夠飽同視覺上滿足d, 不過d椒鹽豬排勝在味道好。下次黎一定要試返豬排蛋飯，見到對面枱食好似好吸引咁。

平時係旺角返工，話就話好多野食，但其實如果想搵間靜靜地價錢又合適既餐廳，都唔係咁易，呢間係同事推介的日常食用餐廳，大約周到都係$50-$60 一個人，味道都OK

係朗豪坊對面，店面不大，典型港式餐廳。機緣巧合之下，同朋友入咗去試一試。本身對呢間餐廳冇咩要求，諗住質素同普通茶餐廳一樣。點知食落先至處處驚喜❤️我叫左豬扒餐，有曬餐湯同餐包。我飲嘅係南瓜湯，都唔錯，但南瓜味爭小小。不過佢啲麵包粒超級加分！到主菜上場啦！首先佢擺得超靚，一碟滿滿嘅，有火箭菜，雜菜，茄子，薯仔同兩塊豬扒。可以睇得出佢好有誠意，薯仔係經過處理嘅，表面嗰皮有淡淡的蜜糖香，正！豬扒冇雪味之餘，肉質都唔錯，算係高級豬扒！我揀咗黑椒汁，個黑椒汁同所有野都好夾咁嘅價錢食到咁嘅質素真係覺得好驚喜環境方面，我哋坐咗卡位，都係舒舒服服嘅。希望依啲香港小店繼續保持水準，越食越有！加油！

聽朋友既推介黎左呢一間位於旺角朗豪後面既1+2豬扒餐廳平時如果經過就咁睇，一定唔知道可以係到鋸扒！所以黎到呢間食野都係一個驚喜Menu上面豬牛羊都有，而且價錢最平係$78比起出面一餐鋸扒要百百聲係唔平好多我地叫左美國西冷牛扒配薯菜($88)首先黎左餐包同餐湯餐包有少少硬，湯就正正常常，可以再濃味點而正菜都黎左，份量頗大旁邊碗上矮瓜、薯仔同沙律店員無問到我地要幾熟最尾整左大概六成熟左右，不錯不錯牛肉肉身非常嫰滑可以好好地令醬料融入到肉入面切切下會有D肉血流出黎心心眼😍！下次有機會再去食過

1+2豬扒食過好幾次, 因為有我既至愛沙嗲醬. 每次返兜原因都係因為佢, 沙嗲醬夠辣又唔會太重味遮蓋左豬扒既味道. 兩樣野夾起上黎PREFECT MATCH如果鍾意點醬既朋友, 可以試配一下牛舌一樣正!! 個人覺得點起辣辣既沙嗲醬更加惹味.有要求既我其實一向唔太鍾意去茶餐廳, 但1+2 既坐位夠闊落出奇地配埋燈光柔和環境下. 唔多人既時候確實可以舒服地HEA一日慢慢傾計.而今日不例外, 出開旺角建議左朋友去呢度食LUNCH叫左個豬扒撈粗. 當然唔小得加沙嗲醬一齊食. 豬扒一如以往肉積夠嫩煮得恰到好處, 外面煎得脆脆地有層次...唯獨係粗麵既味道可以改善一下!!咁就完美.下次真心想試羊扒, 見到有人ORDER賣相好吸引!!!!!另外叫了杯特飲,朱古力咖啡. 味道不錯FEEL到有HEART的. 價錢唔貴仲有靚靚裝飾, 值得一讚!!!