SEDAP惹味馬拉 (已結業)

今次帶大家 食性價比極高的胡椒蝦><!!!!! 真係好惹味呀😋😋😋 到依加仲回味緊果道菜🤤真心值得推介～住港島區的我今晚特登山長水遠去到屯門除左搵朋友 另一個個目標就係依間別府集團新開的 惹味馬拉😋佢係屯門市廣場二期一樓30-31號舖 位置其實有少少難搵 因為佢個位喺商場入面係個凹咗入去嘅位 所以依到俾個溫馨小提示大家啦 如果見到零食物語 行埋去你就會見到左手邊的依間惹味馬搵嫁啦～～整體尼講 食物質素都唔錯 我最鍾意中間果個胡椒蝦同埋好玩又好味的紙巾飛餅😆😆😆 胡椒蝦我見佢係廚師推薦 同埋最重要係蝦依種海鮮尼講的菜色一般都要過百 但佢只係$82 所以我就叫左尼試下 真係無叫錯 好惹味呀佢的調味真係無得輸 我一個人可以自己食曬一碟😙哈哈另外紙巾飛餅就係最右邊 好有趣形狀好似個大糉咁的脆薄餅 下面配埋美祿粉同煉奶當甜品食 依種食法好新奇有趣 我都係第一次食 仲好好味越食越想食xd 大家一齊伸手一塊一塊咁整碎飛餅場面好溫馨👅仲有好多好想試但未試的菜色 唯有下次有機會再入屯門的時候再試啦~~~

同朋友係屯市行左陣街,諗住求其搵間餐廳醫下肚,路過見到有間食馬來西亞菜嘅餐廳,同朋友諗左陣,就決定入去試下啦!一入到去,第一時間睇餐牌有咩食,發現有好多選擇,不過我地好小食馬拉菜加上我有選擇困難症,甘就擇左一D個名聽落幾得意嘅黎試下, 所以我就叫左老鼠粉同愛他愛她啦!老鼠粉食落同望落都似銀針粉,不過味道就好濃郁,食落去都好腍,加上份量十足,都幾抵食! 而愛他愛她原來係魚肉,賣相好似街頭小食,而且食落去惹味十足!不過餐牌入面好多食物都係辣, 小朋友或者老人家未必有太多選擇比佢地擇建議可以出多D唔辣既馬拉美食比客人選擇總括黎講,食物質素同服務態度都唔錯,值得一試! 下次帶埋其他朋友去試!

話說響呢間嘢遇到我嘅至愛，就係老鼠粉😂 通常去親食馬拉嘢我一定叫雞飯，所以今次應該係第一次食老鼠粉，真係見識淺薄，唔知係呢度做法定本身老鼠粉就係咁，煲到腍哂有啲似平時打邊爐會俾朋友藐果啲呀婆烏冬咁腍到爆，當然味道滲哂入去好濃郁啦，加埋隻滑蛋真係不得了😍另一道大開眼界嘅菜色係少爺豆腐，初時以為只係單純嘅炸豆腐只係個名靚啲咁，但唔係咁簡單，原來佢將豆腐壓碎連埋啲魚肉撈勻整返做方塊狀再炸，所以當用一個食清淡嘢嘅心情去食，但食落原來好惹味果下係好驚喜的，又其實就算唔點個汁都已經好好食，點埋就有少少過鹹喇😌蘭花椰漿飯就明顯係服務相機啦，個飯有淡淡的椰香感覺唔錯，撈埋配料食口感更豐富，另一亮點係咖喱雞入味得嚟肉質好嫩滑，雖然咖喱少辣但都幾鐘意✨其他菜色都有一定水準，皮蛋有溏心夠濕潤唔乾口海南雞夠嫩而且陣雞香幾唔錯魔鬼魚肉質超滑但個人就覺得太辣唔係好食到魚味😌唯一有啲失色係串燒，平均四十零蚊兩串其實都幾貴，醬汁過甜沙嗲味唔重，不過有羊同豬頸肉就幾特別，可惜羊味唔係好出，牛就削咗啲，最好食係三款中最平嘅豬頸肉，燒到好脆口但內裏依然彈牙，隨串燒仲送薄餅點汁食添✨

話說今日夜晚八點鐘，門口唔使排隊，兩個人諗住入去試吓。侍應問我地介唔介意搭枱，我話介意，可以等兩人枱。2分鐘後，安排我倆入座坐4-6人圓枱; 仲睇緊餐牌嘅時候，未夠3分鐘，負責帶位嗰個侍應帶左另外2位客人坐落黎..... 算數，開始落單，落單前，侍應又無話有咩賣晒.....點知手抓餅配咖喱雞嘅手抓餅冇，炒通菜嘅通菜賣晒，最後決定離座...... 哥仔侍應即刻講左句，多謝光臨。以上唔算係食評，因為食都冇食過。完。

屯門嘅大型商場，終於有間有規模又好食嘅星馬菜。呢間舖兩日前先開張，今日下晝我就同一班朋友去食午飯。間舖既裝修，牆身，枱同櫈都好有東南亞風味. 餐單款式極多，我地一行七人，就叫咗十多款食物。 全部賣相，份量和味道都好好。尤其係海南雞，雞皮雞肉都非常滑。胡椒蝦則非常惹味，炸得好透，連蝦頭都食到嗰種。肉骨茶非常多料，有五花腩肉，排骨和豬肚，亦好有藥材味。串燒選擇亦很多，除豬牛雞外，亦有羊可供選擇。特別推介係老鼠粉，類似中國既銀針粉，但較軟身，加埋生雞蛋，真係非常滑溜，一定一定要試。