一品滷水專門店

营业中

休息中

今晚要斩料加𩠌，见舖头新开张，仲全场8折，抵！由厨窗外望，有好多选择，唔知拣乜好，最后要咗半只卤水鸭、卤水鸭舌、卤水中鹅翼、卤水鸡蛋和卤水豆腐，超丰富！卤水鸭 （$75/半只，未8折）好有份量。师傅刀功了得，每件大小差唔多。鸭脾上一件好香嫩，鸭皮下有少少肥膏，甘香油润，唔会太肥腻，岩我心水。净肉就啖啖肉，点啲卤水汁，味道更浓更咸香；配啲酸汁就酸咪咪，另一番美味。卤水鸭舌（$60/4両，未8折）好肥美，皮滑内爽，色泽深浓，卤得好够味，唔驶点任何酱汁都好好味，用来送啤酒一流，就马上开返罐！卤水中鹅翼（$50/3只，未8折）都好大只，同样卤得非常入味，一啖啤酒一啖佢，滋味！卤水鸡蛋（$6/只，未8折）蛋白好有弹性，蛋黄就粉绵，整得好入味，卤水香和蛋香都有，正！大卤水豆腐（$10/件，未8折）外皮柔韧，内里腍嫩，淡淡嘅卤水味，亦有豆香。