Saravanaa Bhavan (已搬遷) 新店位置

礼拜六同朋友仔去左尖沙咀位于亚士厘道的Saravanaa Bhavan食印度菜。呢间餐厅由印度人主理，装修简洁，露台侧边有洗手盘俾你洗手食野，餐牌有中英对照，点菜时唔使估估下。我地先叫左个North Indian Thali 北印度套餐，呢个餐有玛沙拉咖喱芝士、 牛油炒豆蓉 、玛沙拉鹰嘴豆、蔬菜干、杂菜黄饭、印度烤饼、特制鹰嘴豆酸奶、烤印度薄煎饼、酸瓜、甜品，菜式非常丰富。黄饭炒得好干爽，d饭粒粒分明，好有咬口；咖喱好香浓，每啖都有好浓烈的印度香料味；烤饼好香牛油味，烟烟韧韧，配合埋咖喱，令人忍唔住食完一啖又一啖！特色煎饼Plain Dosa 原味煎饼 - 煎饼大大份，煎得好均匀，咬落好脆口。随碟送上四款咖喱，特别推介橙色果款咖喱，辣得黎带d酸，好开胃。怕辣就可以沾黄色果款酱，唔太辣易入口又带点椰浆味。南印度甜酸香料汤 - 个汤望落有d似罗宋汤，饮落酸酸甜甜又辣辣地，都几开胃。侍应仲介绍我地左试下个酥炸花椰菜，唔会好腻，口感有d似鱼肉，配合埋d特制辣椒酱，味道不俗，果然无介绍错。