Saravanaa Bhavan (已搬遷) 新店位置

其实食印度咖哩都真系第一时间谂起重庆大厦，不过朋友话之前喺雅士利道食过一间都几好，环境比较宽敞，于是又去试下。餐厅系楼上舖，都叫干净企理，只提供素食。我哋叫咗平时比较少见嘅印度芝士煎饼，系一款以扁豆米造嘅pancake，中间包咗d碎芝士。块煎饼系无敌大块，成只纸鸢咁，配上4款酱汁。芝士煎饼就咁食有少少酸酸地，质地都几软熟，配上咖哩，又几好食。其实几款酱汁我唔系好知系d乜，橙色两款系咖哩，黄色好似有少许薄荷味，白色就真系完全食唔出。食印度菜又点可以唔食Naan Bread, 食naan 就当然要配咖哩！我哋叫咗个杂菜咖哩，好多青豆！不过青豆之外唔系好揾到有完整嘅菜喺入面，我估计系打成菜茸融入咗咖哩之中。呢个杂菜咖哩都几辣，食落好刺激，一路用手拎住naan bread, 再沾咖哩食，真系别有一番风味！我哋仲叫咗一款玛沙拉咖哩芝士，呢一款咖哩相对无咁辣，但就有浓浓牛油味，咖哩入面有一粒粒茅屋芝士，其实都几特别！今次用餐经验感觉几好，食物多选择，坐位又真系比较舒适，虽然系食素菜，但系可能食物都偏向浓味，所以一d都唔觉得寡！想食素又怕太清无乜食欲嘅朋友真系可以试下印度素食！