文興酒家 (曾昭灝大廈)

营业中

休息中

好耐冇食中菜，今日放假就同屋企人嚟中环试下文兴酒家，楼面阔落干净，坐得好舒服。猴头菇螺头炖鸡汤好足料，饮落好清甜好香，一啲都唔油腻，钟意饮汤嘅一定要试吓。泰国樱桃鸭份量都几多，鸭肉好香，就咁食又得，点埋酱汁都好夹。虾饺同烧卖大大粒，入面好足料，啲虾都好弹牙爽口。蟹黄脆虾球系今餐最钟意嘅菜式，卖相超靓，每只虾球上面都有好多蟹黄同埋金箔，下面仲有多士，外脆内热，好好食。香浓牛尾煲真系好香浓，牛尾份量多，啲肉好腍，酱汁稠得嚟唔咸，用嚟送饭应该好正。海佬脆河粉好特别，店员帮我哋将炸咗嘅河粉浸入汤入面，口感好特别。汤底有蕃茄，加埋海鲜，都几清甜。甜品要咗暖心千层糕，甜而不腻，暖暖哋咁唔小心就成件食哂。下次再嚟就想试吓片皮鸭同其他煲仔菜啦。