稻(日本料理) (已結業)

农历新年期间日日都食中菜, 老细请食开年饭, 一于转下口味食日本菜. 睇杂志话呢间"稻"系日本名店"稻菊"的姊妹店, 质素实有保证, 果然无令我地失望. 老细俾钱梗系叫D平时唔舍得食果D, 最赞既系海胆冷素面, D海胆劲新鲜, 一睇D颜色就知系靓野, 鲜橙色, 好有光泽, 个waitress话最好捞埋D面一齐食, 但系我捞之前都系忍唔住净系夹左旧海胆黎食, 软绵绵, 超鲜甜. 我地其中一位同事系食素既, 以为无咩选择, 点知原来都有好介绍, 最特别系个杂锦渍物, 除左最普通既萝卜同姜, 仲有牛蒡, 蒜头, 腌菜等等, 越食越开胃. 我地食鱼生寿司拼盘, 师傅就特别整左个素菜寿司拼盘俾佢, 连我呢个食肉兽见到都觉得好吸引.我地仲叫左脆炸白饭鱼, 烧蟹脚, 天妇罗, 牛肉乌冬, 最后仲整多个烧饭团, 大满足呀! 下次黎试埋个 lunch 先得, D定食好似几抵食咁.