究極堂 (蜆殼街)

营业中

休息中

新一年新开始，今日就同老公去食我哋最钟意嘅日本菜。呢间餐厅之前在铜锣湾店食过，环境同质素都几好，今次就去左北角店。餐厅空间几大，日式居酒屋装修，木系家私。客人除左堂食之外，呢度同铜锣湾店一样，可以预订party room同家人或朋友自成一角去聚旧，去热闹一下。餐厅餐牌好多嘢食，种类多。职员先介绍餐牌，餐牌上亦有推介菜式。最后我哋拣左三款推介，沙律、小食同铁板料理各一。海葡萄海藻青瓜沙律：海葡萄有淡淡咸味，口感爽脆，配埋海藻同青瓜等食材就更加爽口，加埋旁边柚子醋食，味道清新。海葡萄系冲绳特产，在香港日式餐厅好少见，呢度竟然有，有D惊喜。甜虾唐扬：炸甜虾脆口，一口一啖连头食，好香口，咸咸地，几好食。薯蓉广岛蚝：广岛蚝够大只，焗得非常香，有酱油味道，好够味。底层薯蓉加左层芝士一齐焗，有拉丝感。而薯蓉就切成一粒粒，好似食薯饼咁，有口感同薯仔味十足，好好食。海胆右口鱼边虾卷：面层右口鱼边带轻轻烧过，暖暖地，有鱼油香味，配埋海胆食味道好夹，加埋虾卷同食口感丰富，有层次感，几好味。芝士什菌地鸡薄饼：即叫即焗，需时约30分钟。卖相几好，唔会焗到㶶晒。薄饼皮焗得好脆，鸡味浓，配埋芝士同菇食，食得好滋味。