Amitie Kitchen

营业中

休息中

位于尖沙咀厚福街嘅H8有好多有质素嘅餐厅，部份系连锁店，亦有部份系只此一家嘅小店，今日我就选择咗呢一间冇其他分店嘅Amitie Kitchen。呢度午市做嘅set lunch价钱唔贵，仲有撑香港人嘅平民午市特餐。另外亦有午市优惠推介，主要系较高质嘅扒类。我哋拣咗一个set lunch，配嘅系南瓜汤，南瓜汤真材实料，饮得出系用好多南瓜肉打成，接近南瓜蓉嘅口感。另外我哋叫咗个Appetizer，拣咗香煎法国鸭肝多士伴车厘子酱，仲有啲加咗黑醋汁嘅沙律菜拌碟，味道清新。香煎法国鸭肝超厚身，份量比起多士还要多，而且鸭肝嘅味道同口感都不比鹅肝差，个人觉得性价比都算高。午市优惠推介嘅纽西兰牛扒味道都唔错，薯菜配搭亦都丰富，又红又绿嘅蔬菜令卖相生色不少。猪柳本菇扁意粉伴明太子忌廉汁嘅明太子酱汁混入咗忌廉之后变得香而不辣，而且浓稠度刚刚好，令每条意粉都挂满酱汁，猪柳同本菇嘅份量都唔少，仲混入咗红黄椒粒，口感丰富。餐茶就简单选择热咖啡同热奶茶，咖啡够香浓，奶茶够香滑，都系唔错嘅选择。