深宵食堂

营业中

休息中

最近追紧电视剧深夜食堂，一间餐厅既菜单只有几款食物，但充满人情味。原来香港都有间餐厅叫深宵食堂，出于对呢套电视剧嘅迷恋，我约左女友去试试。餐厅大约有六、七枱，天花挂满具日本特色既迷你雨伞，墙上亦贴满樱花装饰。餐厅食物比电视剧嘅深夜食堂多好多，餐纸总共有七、八页，每页最少十款食物。豚肉芦笋卷既豚肉薄如纸，加上上菜时热烘烘，一咬劲多汁，而且口感超脆，好似薯片咁。盐烧秋葵看似简简单单，但适量既盐就已经带出秋葵既味道。厚烧牛舌有咬口但唔韧，牛味相当浓厚。鸡皮食落完全唔腻，每块鸡皮都好干身脆口。甲罗烧即系即松叶蟹膏酿蟹盖, 亦会加蟹肉。每次去日本旅行一定会食极唔停。呢个甲罗烧加左味道浓郁，配多士仲好味，感觉上无咁咸。自己作为黑松露狂迷当然要叫黑松露乌冬。黑松露既独特香味加上洋葱既甜令人难以抵抗。重头戏当然系芝士蟹肉玉子烧，用蕃茄汁写上「深宵」二字。蛋非常轻盈，蛋汁满溢，同时亦有拉丝效果，不过蟹肉既鲜甜味冇咁突出。虽然餐厅同电视剧相比完全大相径庭，但每款食物都几高质，没有奢华装潢却有说不到既窝心。