天鴻燒鵝飯店

营业中

休息中

烧鹅濑粉&烧鹅饭上月中旬工作完毕后，路经元朗去食我最钟意嘅烧鹅濑粉，天鸿位处元朗区，属于比较出名嘅烧鹅烧腊店家，虽然位处旧区环境比较差，而且零装修，属于旧式嘅烧腊店，但系为咗食烧鹅唯有将就一下。店内环境及餐具碗筷清洁一般，但仍然可以接受，叫店员攞杯水自己洗下筷子匙羹还算可以。落单一碗烧鹅濑粉同一碗烧鹅饭再加多两杯冻柠檬茶收$134。烧鹅濑粉比嘅系烧鹅下装部位，颜色香味都属于水准之作，皮及油脂肥美而肉质软嫩，配上腌料香味浓郁，入口𡁻两𡁻满嘴油腻同皮肉组成爆炸混合体，天作之合问你点顶，又系另外一种美食感受。濑粉软滑又有咬口感，而汤汁比较淡味，其实烧腊店斩剩咁多下栏，应该放埋落去熬汤底，一定会增加整体表现。至于另外一碗烧鹅饭情况啱啱好反转，烧鹅系上半部，鹅皮微㶶发黑，而肉质就较为烟靭嚡口，同样一齐落order，水准落差大不同。至于冻柠檬茶嘅水准就可以唔使再提，似饮杯有颜色嘅柠檬冰水，今时今日真系好难饮到一杯像样嘅柠檬茶。