新明發食家 (已結業)

听见人哋话食物同健康有好密切嘅关系，咁再进一步，我觉得美食对心灵嘅健康有更大嘅关连。食物未必一定要贵先叫美食，平平哋，但可以令自己食得满足嘅已经好足够。呢次系第二次帮衬新明发，今次目标好清晰，就系要试盅头饭同点心。章鱼肉饼饭，portion唔算大，$21一盅。豉油已放枱面，可以任加。饭够哂新鲜热辣，加啲甜豉油，连埋肉饼一齐食，口感味道一流。再加啲我最爱嘅辣油，够哂刺激。终于明白点解咁多人一坐低就嗌盅饭。烧卖，大大粒，只系$12碟。馅料方面，以猪肉为主，但亦有少少虾。虽然有啲肥肉，但绝冇油腻感，反而令肉更松软。口感之外，味道亦相当鲜味可口，确系令人回味。虽然呢度价钱优惠，但睇得出佢哋冇将货就价，要低成本咁去将一啲普通嘅食物变成美食，唔系更加考功夫吗？相比起其他以为卖平少少，食物同服务差就系应份嘅食店，呢度确系值得一赞。