道

营业中

休息中

可能系因为疫情嘅关系，开始咗喺香港唔同嘅地方去寻找隐世嘅美食，而我相信好多时日本菜都系大家嘅首选，就我个人而言亦都系一样。拉面，可以话系融入我嘅日常生活，大约喺两年前，我开始喺香港周围去食唔同嘅拉面，虽然有好多人话香港嘅拉面同日本冇得比，但系其实只要你用心去揾，依然有好多值得尝试嘅小店，就好似我今次去屯门食嘅呢一间「道」一样，之前已经喺拉面关注组见到好多人去食，一直都好想试，但奈何未有机会，今次终于扚起心肝去到一试究竟！当日3:30去到，前面大约有六个人排队，最终我同女朋友4:00就坐低咗，由于我哋太晏去嘅关系，鸡白汤同炸已经卖晒，所以就同女朋友一人一碗分别叫咗酱油鸡清汤拉面同埋浓酱油鸡清汤拉面，先试一啖酱油鸡清汤拉面，汤底非常清爽，面质亦都软硬适中，而家佢嘅汤入面食得出有鱼干嘅香味，非常之顺喉。鸡叉烧嘅炭烧味好重，好食！糖心蛋亦都控制得唔错，食得出淡淡嘅味醂酒香，而另一碗其实分别不大只系汤底鱼干嘅香味更加浓烈，酱油嘅味道亦更加丰富。总括嚟讲虽然道去唔到我心目中嘅第一名，但系依然值得下次再嚟！