備長

营业中

休息中

今日去咗铜锣湾食串烧，拣咗呢间居酒屋，入到去拣咗坐吧枱，可以见到师傅即叫即烧。餐厅准备咗小小野菜同埋调味做前菜，俾食客清一清个口。去到叫咗唔少新尝试嘅串烧，首先系自家制免治鸡肉棒，配有蛋酱，点嚟食更香，免治制法嘅鸡肉鸡味浓之余，咬落去质地稔身易咬。之后叫咗最近新宠白鳝串烧，钟意佢香得嚟肉质结实，餐厅落咗黑椒同盐调味，食落弹牙而且烧到脂肪啱啱溶，油脂感满满。荔枝猪肉卷，配搭几新鲜，清新嘅荔枝肉令到猪肉冇咁油腻。主食叫咗墨汁炒乌冬，用乌冬煮真系比较少见，但系乌冬比意粉粗同吸水，所以好入味。而且加入咗墨鱼须同豚肉（有惊喜因为本身黑得滞睇唔到），豚肉嘅调味咸咸地，同炒乌冬好夹好好味。炒杂菜分量算多，亦唔算好油，系健康之选。牛舌厚切，名副其实嘅厚切，好厚身好好肉地，食落弹牙而且有串烧嘅焦香味。串烧豆腐外皮炸过，好香脆，仲有酱油调味。最后叫咗串烧粟米，上面搽咗牛油，好香好甜，仲好 juicy好多粟米汁。嘢饮就叫咗乌龙茶 sake cocktail，茶味清清地可以消滞，同时又有sake，一次过满足晒两个愿望。