瀧宴日本料理

营业中

休息中

日本体验过铁板烧人均一千都系得主菜一块牛扒，几钟意香港铁板烧套餐组合丰富啲，由鱼生开始去到海鲜同牛都有齐，感觉开心好多。自家制酱汁煮南非鲍鱼好入味，柔软有弹性，加少少京葱丝好香。池鱼、鲷鱼同吞拿鱼新鲜厚切，作为前菜水准好高。金鎗鱼腩手卷估唔到系放左系最中饼上面，一咬唇上就沾满咗淡雪盐，混合幼滑嘅吞拿鱼蓉同松脆嘅饼底，口感同味道都好丰富。海鲜茶碗蒸水润嫩滑，大量蟹肉令成个茶碗蒸好鲜。季节吸物好清甜，大蚬大只饱满，清一清味蕾。野生生猛龙虾见住佢由水缸捞出嚟生㓥，新鲜到不得了，鲜甜幼嫩。 师傅仲将虾膏炒成酱汁，龙虾肉沾上天然甘香嘅虾油，每一啖都好珍而重之。香煎鹅肝可以话系我近年食过最好食嘅煎鹅肝，完全唔会过火或者有粉感，幼滑creamy，酱汁都恰到好处唔会太酸。美国顶级牛柳可以一次过试晒薄烧同厚烧，各有千秋。 牛肉薄烧包住大量香葱同炸蒜好香口，厚烧加少少黑椒同炸蒜提味，牛味好浓。烟肉香蒜炒饭镬气十足，蛋香、烟肉、炸葱同香葱嘅香气交融，简单美味。