上海老家 (已結業)

一星期前订咗位，嚟到发觉冇此需要，一来连续几日滂沱大雨，二嚟其实搞错咗应该系小菜馆格局而唔系私窦式私房菜。加上6点就报到，先嚟碟「蒜泥白切肉」同「红油抄手」做住前菜等friend。蒜泥白肉排列比较粗犷，唔似平时一片片层层叠，比一般厚身，有啲卷曲，十片左右，碟底垫咗不少青瓜丝，相对少辣油….抄手皮属于厚身，显得内馅份量略嫌少。见到「肉沫炒粉丝」，朋友提醒即是蚂蚁上树，霎时谂起电影春娇入面谷德昭用呢款𩠌来比喻女伴面容……。系够镬气，粉丝入味，但调味过龙，好咸吓，食完每啖要饮番啖茶。徘徊上海四川，想减辣所以断估拣咗「上海回锅肉」，呢道就调味适中，咸中有些甜，炒得肉爽菜香，豆腐干加多些少就更完美。我对「酸辣汤」冇乜兴趣，但无可否认呢碗整得几好。首先我以为嗌小，只系一个饭碗仔嘅份量，嚟到系成个汤面碗满，而且难得酸辣度攞到平衡，唔会只得酸冇乜辣，黑木耳、腐皮、虾球、笋丝、豆腐粒等用料充足，稀杰度适中，唔好此道都食咗三碗仔。「炼奶炸馒头」就有啲失准，只得个底脆，包面系腍，似食紧金黄色嘅蒸馒头多啲。自助落单餐牌𩠌菜款式会多过实体餐牌，太长不能尽录，因此只能断章节录部分。