「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，首先睇下荃灣區先啦。

酸辣米線 唯一雲貴川風味


圖：RWWM、calvinbug

呢間米線舖，成日都好多人等位㗎，一個人食飯就啱晒，應該好快有得入！有一餸至四餸揀，湯底濃，辣味夠（如果有叫辣），腩肉本身都有少少辣，半肥瘦，米線係偏腍少少嗰款，整體嘅水準幾唔錯。溫馨提示，佢酸辣都當係一味餸……

蕃茄濃湯系 樓下冰室


圖：VivianWong0077、Lawrence Lau

一個人去茶記、冰室食嘢一啲都唔老尷，望一望四周可能好多枱都係自己一丁友，you are not alone呀！嚟到呢間冰室，必食蕃茄濃湯系，冇得輸呀，真蕃茄整㗎，真心濃味。而跟餐嘅蛋用牛奶炒嘅關係，比起一般炒蛋滑好多，嗌多杯紅豆冰就perfect池喇。

老火湯餃 餃子屋


圖：eatingsally、ChristinaYip

其實唔止葵廣多嘢食，荃灣呢堆連環商場都好多嘢食㗎，不過就唔係掃街而係坐低食嘅舖仔多。呢間專食餃子嘅，湯餃同煎餃都有。煎餃首推一定係芝士煎餃，雖然冇拉芝，但係脆卜卜好有芝士味。而湯餃嘅選擇就仲多，韮菜餃、椰菜餃、白菜餃、粟米餃、香菇木耳雞肉餃……不過重點係個湯底呀！足料老火湯嚟呀，食完餃記住要飲埋個魚膠淮山豬骨湯，冇味精但好甜㗎。

熱粥油炸鬼 滿粥


圖：蒨沂、阿丸

一個人食嘢，通常唔係食麵就食粥，快呀嘛，同埋平時好少機會啲飯局會約嚟呢啲地方食。呢間粥舖嘅粥好綿㗎，而且仲有啲普通粥舖好少有嘅粥，例如苦瓜粥同南瓜粥，甚至乎窩蛋鮮牛粥都有。特別而家開始涼，食完碗熱辣辣嘅粥又真係會幾滿足嘅。

手工拉麵  蘭州拉麵店


圖：Andrewaz、buzzhapeace

喺力生廣場地下呢個位，其實唔算偏僻，但一般人又唔會特登行過，一個人食飯又怕撞到朋友就啱晒。無論係刀削麵定係拉麵，都標榜住係即叫即拉，每條麵條粗幼都有啲分別，但係口感都一樣係咁煙韌同彈牙。鍾意食辣嘅，平時同朋友一齊食，可能要就住就住唔叫得咁多辣嘢，而家自己一個食，啱晒，魚蛋、雞翼、大腸等等N款麻辣小食任揀。

煙韌紅薯粉 川味美食


圖：momomomol、ryu_ng

呢間舖細細間，啱晒一支公靜靜地坐喺度食。餐牌上有好多種唔同嘅粉揀，不過識揀一定係揀紅薯粉，煙煙韌韌，好滑，索埋湯底好入味。每碗粉都超足料，配料例如雞絲呀腩肉呀咁份量都已經唔少，佢啲配菜仲要好多，細食啲分分鐘食唔晒，但唔食蔥同芫荽嘅朋友記得走青呀。同埋提一提呢度嘅辣都堅係幾辣，就算本身食得辣嘅都要小心。

文：Kar



其他地區精選文章：
下一站...天后！去電氣道搵食
走入荔枝角工廈 發掘唔同地方好味道
九龍城麻甩味食店推介


 

隨時接收最新資訊
讚好OpenRice專頁！