每次過時過節要送禮物畀人嗰陣，都好鬼頭痕：睇啱款嘅又out bud，啱價錢嘅又驚對方唔鍾意 ……其實收禮物嗰個都好頭痕㗎！等陣又收到相架嗰類都唔知點算。計開飯仔話，送同飲飲食食有關嘅就最好，實唔會嘥嘛。嗱，畀啲貼士你哋啦！

給 小朋友：

歐美靚糖 FANTASIA



主要入口歐美靚靚糖嘅FANTASIA，有好多聖誕專屬嘅糖、朱古力同曲奇，想散裝買或者成個禮籃買都得。禮籃嚟講仲有小童版同健康版，健康版裡面嘅嘢食全部都係有機同無糖㗎。最平30蚊一支薑餅人/雪人棒棒糖，最貴過千銀一個大集合禮盒，豐儉由人。

價錢：$30起
*預訂優惠：11月30日前訂有9折
聖誕禮籃訂購表格連結：https://goo.gl/P7AvFn

給 女神/女朋友：

松露朱古力 b. DÉLICES



基本上冇乜人唔鍾意食朱古力，而b. DÉLICES年就出咗幾款新口味嘅朱古力禮盒，包括夾心、松露、棉花糖朱古力同即溶可可球。估你唔到松露朱古力有荔枝香味呢，而可可球就有分原味同咖啡味，倒入熱牛奶就飲得！

價錢：$190起

新味馬卡龍   PIERRE HERMÉ PARIS



聽講唔少女生都好鍾意馬卡龍，而PIERRE HERMÉ PARIS就趁聖誕出咗幾款新味嘅馬卡龍同朱古力，啲味都幾特別㗎。先講馬卡龍，有榛子鵝肝味、波斯黑檸檬味2種新味，至於朱古力就有抹茶松露牛奶朱古力同栗子松露牛奶朱古力2種新味，連埋其他嘅松露朱古力，成set送畀女神肯肯定有分加！

價錢：$300起
*12月2-27日在崇光百貨開設期間限定店

花花罐牛油酥餅   Crabtree & Evelyn



如果大家有印象，Crabtree & Evelyn上年出過嘅聖誕系列禮品啲包裝好靚㗎，好朵花花喺個罐度又好colourful咁，花系女孩表示大愛！佢哋今年都繼續出咗幾款英式嘅節日美食，好似牛油曲奇、蘇格蘭牛油酥餅等等。其中新口味包括檸檬伯爵曲奇、手工英國無花果果醬同手工玫瑰鳳梨果汁糖。檸檬伯爵曲奇嘅檸檬味夠甘香，尾隨嘅係伯爵茶香，曲奇亦夠鬆化。

價錢：$75起

高貴美感茶具   Lady M 白色聖誕禮盒



要配得起女神，餐具方面都唔可以唔顧及，女神最鍾意就係去飲下午茶，Lady M首推呢個禮盒就啱晒。連包裝盒都配合裡面由法國過百年歷史的瓷器品牌 LEGLE特別製造嘅茶壺同兩套茶杯，包上白色同銀灰色為主調雲石紋理，簡單得嚟又高貴優雅，仲附有Gift Card，價值夠買原個蛋糕，拎去同女神食個Proper Tea 就夠晒Elegant！（JM Tone)

價錢：$1580/$1980

給 好朋友：

車打芝士餅 LeTao



人氣芝士蛋糕店都有聖誕禮盒裝呀，不過就唔係cheesecake，而係芝士餅同朱古力。3款禮盒各有唔同嘅配搭，除咗曾經同大家介紹過嘅紅茶朱古力，仲有白朱古力莓果脆片、原粒夏威夷果仁朱古力等等。而芝士餅就有高達芝士及車打芝士味、金文拔芝士及黑椒味。

價錢：$852起
*現於又一城設期間限定店

聖誕紅茶Shortbread Cookies   Tea WG  



Tea WG以茶聞名，聖誕禮盒裝當然都係以茶做主題啦。其中好代表聖誕嘅Shortbread Cookies，就加入咗聖誕紅茶，食出啖啖茶香。而特色禮籃仲包括咗嚟自46個產區嘅800幾種散裝茶葉、茶具、茶味果凍、馬卡龍……豐富到呢，愛茶道嘅朋友收到實好開心，有排試！

價錢：$148起

給 同事：

熊貓曲奇   奇華



通常送禮物畀同事，都唔想太貴（除非真係好好感情啦）但又唔可以太頹，呢兩款曲奇禮盒就啱晒嘞，cute版熊貓曲奇有朱古力同士多啤朵兩隻味，另外嗰盒就一盒包晒4款小食：蝴蝶酥、小紅莓牛油曲奇、杏仁片朱古力曲奇同手製鳥結糖，應該總有款啱佢哋。

價錢：$78起

給 成日OT嘅打工仔：

精選咖啡豆 Pacific Coffee



冬天出街最好就係有個保溫壼隨身，呢幾款聖誕熊嘅壼，可以裝到470Ml嘅水，都OK㗎。另外，紅色同銅色嘅泡茶杯都幾型，如果你身邊有啲鍾意飲茶嘅朋友仔，可以考慮下送呢個。至於鍾意飲咖啡嘅，仲可以送埋啲咖啡豆畀佢添，呢款豆酸度輕柔，帶有辛香同朱古力味，應該都幾受落嘅。

價錢：$88起