首先第一樣要講嘅係手信，咁梗係啦，你去玩得咁開心，都要照顧下喺香港嘅朋友嘅感受㗎嘛，係咁易買返少少嘢畀佢哋啦，就杯麵啦好冇？嗱，唔好睇少啲杯麵呀，好鬼靚㗎！
或者係爆谷桶都唔錯，係就係大個咗少少，行李唔知有冇咁多位呢？但真係好cute cute喎，隻眼仲識郁㗎好似！
手信講住咁多先，自己食先最重要嘛，係咪？嚟緊7月1號開始，去到9月4號，就會有幾個期間限定新節目同新嘢食呀！有冇睇中咗邊個先？
妖怪手錶
妖怪手錶呢排大熱，除咗喺東京同福岡有期間限定café，連環球影城都即將會見到佢哋嘅蹤影，由主菜嘅熱狗、三文治，到甜品嘅朱古力士多啤梨mousse、白朱古力mousse都係佢哋嚟。
One Piece
路飛又係一個不老嘅傳奇，無論邊個年代，都依然有好多粉絲。呢間海賊王餐廳就啱曬嘞，啲嘢食嘅造型全部都好逼真，特別係路飛頂帽，做飯又得，做mousse又得，得咗。
死亡筆記
一講死亡筆記，諗起嘅除咗係好型嘅L之外，一定仲有死神流克嘅蘋果。所以喺度一定有「蘋果」食！放心，唔係叫你山長水遠嚟食一個日本蘋果（雖然日本蘋果都真係又大個又甜又好食），而係食蘋果慕斯蛋糕呀！仲要係畀流克咬咗一啖嘅添呀哈哈！
龍珠Z
唔使得個睇字喇，佢哋粒仙豆你都有得食喇，原來可以恢復體力嘅仙豆，即係大粒豆豆朱古力嚟（誤）。另外仲有宇宙帝王菲利第一形態飲料桶、龍珠等等！
睇到我好想而家即刻就已經係7月可以飛過去呀！
文：Kar
隨時接收最新資訊
讚好OpenRice專頁！