【國際新食力】東京銀座朱古力天堂

當而家連唔少連鎖咖啡店都開始著重推銷唔同產地咖啡豆、啤酒亦越嚟越多特色手工啤酒嘅時候，終於有人注意到朱古力啦！日本東京銀座喺6月1號將會有一間新嘅朱古力店開幕，同其他朱古力店最唔同嘅地方係，呢度嘅朱古力由烘焙、研磨、加工到最終成型都喺店裡面進行，有興趣嘅仲可以試食未加工嘅可可！

Minimal 銀座 Bean to Bar Stand顧名思義，由可可豆(Bean)到最後嘅片裝朱古力(Bar)都由店家一手包辦。

如果係朱古力忠實Fans嘅話，一定會非常好奇到底朱古力嘅製成方法同當中嘅奧妙，而呢間店就比各位一個機會去試下唔同階段可可豆嘅味道，包括係烘焙過嘅可可豆同研磨過嘅可可豆。

而且就好似咖啡豆嘅品種、烘焙方法同提萃方法會對咖啡嘅風味帶嚟唔同嘅影響一樣，其實可可豆嘅嘅品種、烘焙方法同研磨方法亦會對朱古力產生唔同嘅影響。呢間店有嚟自世界三大洲15個唔同國家嘅可可豆，分為NUTTY（ナッティ）、FRUITY（フルーティ）、SAVORY（セイバリー）等八大種類，買嘅時候可以留意一下朱古力包裝上嘅可可豆介紹。

特別鐘情朱古力嘅亦可以買唔同風味嘅可可豆自己慢慢研究，店裡面亦有朱古力飲品同雪糕，實行一邊食一邊學，仲可以一邊買。

Minimal 銀座 Bean to Bar Stand
地址：東京都中央區銀座3-8-13 光生ビル1F
開幕日期：2016年6月1日
營業時間：11:00 - 19:00 (星期一公休)

資料來源：アットダイム，トーキョーデイアウト

隨時接收最新資訊
讚好OpenRice專頁！