成間餐廳由未入門口開始，你就已經開始畀小丸子包圍喇，餐廳有兩層嘅，周圍都係影相位，分分鐘連廁所你都想影埋，相信小丸子迷入到去就會好忙咁掛住影相。又要影景，又要自拍，又要影嘢食……
打開menu，啲嘢食都好有心思咁融合咗小丸子同佢嘅同學入去㗎，款式都幾多下。其中一定要講下嘅，係永澤同學，即係嗰個洋蔥頭呀。佢道代表菜式真係好出色！就係「永澤の洋蔥湯」喇！
咩話？你見唔到佢個樣？成粒洋蔥咪就係佢個頭囉，係菜湯嚟嘅~ 洋蔥裡外都有湯，裡頭仲有其他素菜。而呢個洋蔥亦比我哋平時見開嘅大，問一問原來係台灣自己出產嘅洋蔥嚟呀，個湯好甜，真係要講十次「好正呀」！
另外嘅小丸子照燒雞飯、櫻桃嫩鴨胸燉飯、南瓜盒子等等嘅味道都比一般食開嘅卡通主題餐廳好，但要求都唔能夠太高嘅，之但係佢哋嘅造型就堅係呃like-able嘅。櫻桃嫩鴨胸燉飯啲飯係用紅酒一齊煮，砌到成個永澤頭咁樣（係呀，又係永澤）。
但甜品就相對失色咗少少，得兩款造型蛋糕揀，一係小丸子，一係花輪同學。揭開面頭塊造型朱古力，下面係由mousse同朱古力蛋糕製嘅既兩層蛋糕，朱古力味超濃，換句話講即係都幾甜。飲品本身想試個抹茶歐蕾㗎，可惜當日3點幾已經賣晒（你哋想試就早啲去啦），咁就叫咗杯小玉拉花嘅咖啡同花輪朱古力Fraby，again，呃like-able！
櫻桃小丸子主題餐廳
地址：台北市信義區逸仙路42巷9號
其他台北新開主題餐廳文章推介：
台灣又開卡通主題餐廳 cute爆蛋黃哥菜式出現注意
奸夫入侵台北 Craftholic Cafe 10月試業
文：Kar
隨時接收最新資訊
讚好OpenRice專頁！