明嘅，忙起上嚟唔記得咗要早一個月Book枱唔係大問題，但如果你到而家呢一刻都仲未未有安排嘅話就隨時好大問題！唔洗驚，開飯仔喺大廳...幫大家搵咗呢幾間2月14號晚市暫時仲未Full Booking又有特色嘅餐廳，揀啱就好快啲打去訂枱啦！
灣仔窩心Cafe TicTacToe
圖：shunza
呢間Cafe雖然舖仔細細，但大廚心思絕對唔細。平時開飯仔就會推介有檸檬茶波波冰凍檸茶，但情人節一雙一對當日要揀有得意圖案嘅熱鴛鴦啦。五式芝士薄餅係薄脆Pizza底，五款芝士夾埋味道濃郁，一脆一軟口感豐富。意粉同漢堡都有水準。唔想揀？無問題，佢地仲有情人節套餐，有齊前菜、主菜、甜品同紅/白酒。
北角花樣年華西餐廳 紅星餐廳
圖：dyll
情人節想鋸扒又唔記得Book枱？呢間西餐廳幫到你，雖然係港式西餐，但環境復古得嚟又幾優雅，一啲都唔老土。嘢食以扒餐為主而且價錢公道。情人節當日分兩個時段，首輪係6PM-7:45PM，第二輪就係7:45PM-10:30PM，雖然兩個時段都仲有位不過卡位有限，想坐得舒服啲動作就要快喇。
中環正宗荷蘭菜館 Orange Tree
嚟到中環Soho區，可以揀呢間食正宗荷蘭菜嘅餐廳，雖然無卡位，但勝在環境寧靜而摩登歐陸風裝修亦相當有情調。佢地嘅海鮮同扒類菜式都相當有水準，不過情人節當晚只有Special Menu。順帶一提佢地午市有Semi Buffet，前菜、沙律、小食等任食，加一份主菜、甜品同飲品，Encore抵食之選。
上環轉角遇上西班牙 La Postre
老實講呢間西班牙餐廳唔係非常正宗，勝在美食賣相精緻。雖然佢地上環有其他分店，不過呢間近地鐵站之餘，開喺街角又有旺中帶靜嘅感覺。2月14號晚市有情人節套餐，另外亦可以散嗌。不過注意當日會有最低消費($250/人)，而且需要先交訂金($100/位)，老實講係有啲麻煩，但萬一搵唔到位食飯就更麻煩啦係咪？
灣仔小木屋法國菜 Haven
浪漫嘅法國菜簡直係無得輸嘅選擇，而且呢間小店裝修到好似間小木屋咁。佢地嘅情人節套餐包括頭盤、湯、主菜、甜品同紅/白酒。而且仲會送埋一支紅玫瑰同一張即影即有超窩心！不過注意一樣要先落訂金($500)。而情人節當日分兩個時段，首輪係6PM-8:30PM，第二輪就係8:45PM-11PM。兩個時段嘅2人枱都所餘無幾，要搶就要快！
灣仔花園入面嘆素食 OVOCAFE
圖：Salade
情人節送花唔夠嘅話，不如送成個花園啦！講緊係搬入活化後灣仔舊街市嘅呢間素食Cafe啫，唔單止隔離就係花店，餐廳本身亦加入唔少植物做裝飾，加上樓底高特別有花園Feel。Menu主打西式素菜，Pizza、意粉同飯等等都有。當晚亦會有情人節套餐，不過暫時得返6PM-7:30PM呢個時段有位，如果你另一半係素食者嘅話想Book枱就要快啦！
文：Cathy
更多【情人節】文章：
熱門文章推介：
隨時接收最新資訊
讚好OpenRice專頁！
