怎至夠「惜食」？我知，你可以唱句：「食得晒先至好嗌，食物咁珍貴切勿浪費，做人要惜食，千祈唔好嘥！」除了「食幾多嗌幾多」，想做個「惜食」之人，小編會想到平日食飯時遇到的「咪嘥嘢食店」。這些食店的出現，源自環保署於2015年11月開始推出的「咪嘥嘢食店」計劃。轉眼間，一年過去，大家可曾發現，參與計劃的餐廳當中，有著平日未必會被人留意的「惜食」細節？

在西營盤的Pesto Cafe，是本港其中一間「咪嘥嘢食店」，店主劉生分享了屬於他們的「咪嘥嘢」小故事。透過這些經驗，不其然提醒我們 ── 平日對食物多「走」一步，會多了一份體貼和食材善用。
 

親切小店「Pesto Cafe」

開業了七年的Pesto Cafe，舖仔細細，裝修平實，食物主打價錢大眾化的西餐。店主之一的劉師傅分享道，在開業之前，曾於同一條街的另一間餐廳做了兩年工作，與區內不少街坊混熟了，在因緣際會之下，了解到不少街坊的飲食習慣，從而幫助之後另起爐灶的Pesto Cafe發揮自家製的「咪嘥嘢」精神。

店主之一劉師傅。

「當初參加『咪嘥嘢食店』計劃，是認同『惜食』及『咪嘥嘢』的理念。我們會留意食客嘅飲食愛好，留意有無啲嘢係佢哋唔食嘅。」細心留意食客的喜惡，令他們在安排餸菜方面有「特別的安排」，諸如一個簡單的「是日套餐」，同樣可以使出妙法，真正做到「食得晒又唔會嘥」。
 

牛小排的「少」

美國特級牛小排拼脆皮雞扒配黑椒汁

牛小排是牛肉中部位較上乘的部份，用來做扒食的話，質感和味道都不錯。而在餐牌上可以找到的「扒美國特級牛小排拼脆皮雞扒配黑椒汁」套餐，也許對某些人來說，份量頗大。

「有兩個老人家每次嚟都嗌呢個（套餐），佢哋會唔想嘥嘢，會兩個人分食一個餐包，或者唔要套餐送嘅例湯，又試過走雞扒，甚至乎走菜。」劉生說，牛小排是店內其中一個受歡的套餐選擇，難得有食客會說出喜好，他們便盡量配合安排。
 

青口走了的「海鮮天使麵」

海鮮天使麵

用龍蝦汁煮成的「海鮮天使麵」，海鮮味加上龍蝦湯味重，這個麵都有個「天使般」的故事。

「嚟呢度好多都係熟客，試過有個後生仔，淨係唔鐘意食青口；初時發覺佢所有嘢食晒，淨係青口唔食……」留意到這位後生仔的口味後，有一次，劉生忍不住提醒他「我哋可以走青口」。當青口「走了」，他們主動提出以價錢較貴的蝦作替代。那次，後生仔沒有「嘥嘢」，把整碟意粉食得乾淨浰落。
 

餐牌相片手機「尋」

劉生不諱言，除了特別安排食物的「出場」，連餐牌上的相片都會「咪嘥嘢」！每一幅餐牌用的照片，也是平日出餐或伙記用餐時「順勢」拍個照而成，不會額外去烹煮餸菜再影一番。
 

「咪嘥嘢」的伙食

食客以外，員工對於「惜食」亦有所體會，在店內當侍應的琦琦說：「試過有人叫豬軟骨米線走豬軟骨。（咁攪笑？）係啊……呢個都係另一種嘅『咪嘥嘢』嚟！」另一方面，餐廳會為員工提供伙食，而老闆當知道琦琦不吃洋蔥後，在平日伙食中大多數餸菜都不放洋蔥，好讓她不會「嘥嘢」浪費。
 

劉師傅的「咪嘥嘢」之道

問到師傅自己的「惜食」之道，他說：「以前多數食中菜，但宜家開咗西餐（廳）之後，西餐有更多嘅認識，咁可以做到更啱香港人口味嘅嘢。只要嘢食整得好，啲街坊係無乜機會去浪費嘅，佢哋會清得好乾淨。」從食物的質素開始，令客人食得晒，變相減少製造廚餘，如是者，又真正做到「惜食咪嘥嘢」。
 

後記：由餐牌設計，以至食客日常的飲食習慣開始，從微處著眼，可以不經意減少浪費，「惜食」其實可以好casual又窩心的。
 

文：Jamie
相：Calvin Kwok